ភ្នំពេញ៖ ក្រសួងសុខាភិបាល បានចេញសេចក្តីជូនព័ត៌មាន ស្តីពីការហាមឃាត់គណនីបណ្តាញសង្គមហ្វេសប៊ុកឈ្មោះ NEW4U Businesses កំពុងផ្សព្វផ្សាយលក់ផលិតផលឱសថគ្មានលេខបញ្ចិកា និងគ្មានការទទួលស្គាល់ ពីក្រសួងសុខាភិបាល។
ក្រសួងសុខាភិបាលនៃព្រះរាជាណាចក្រកម្ពុជា សូមជម្រាបជូនដល់សាធារណជនទាំងអស់ឲ្យបានជ្រាបថា៖ យោងតាមការពិនិត្យឃើញលើបណ្តាញសង្គមហ្វេសប៊ុក មានគណនីឈ្មោះNEW4U Business កំពុងផ្សព្វផ្សាយលក់ផលិតផលឱសថ Total Natural Nano Dreap គ្មាន ចុះបញ្ជីកា គ្មានការត្រួតពិនិត្យគុណភាព និងគ្មានច្បាប់អនុញ្ញាតឲ្យផ្សព្វផ្សាយពីក្រសួងសុខាភិបាលឡើយ គិតត្រឹមថ្ងៃទី២២ ខែតុលា ២០២០ ព្រមទាំងបាន ផ្សព្វផ្សាយភូតកុហក និងបំផ្លើសហួសពីការពិតដោយគ្មានមូលដ្ឋានវិទ្យាសាស្ត្រត្រឹមត្រូវដូចជា ជួយបញ្ហាជំងឺភ្នែក កន្ទុយថ្លែន ភ្នែកឡើងបាយ ភ្នែកក្រហម ទឹកដក់ក្នុងភ្នែក និងភ្នែកក្រហម ។
អនុលោមតាមច្បាប់ ស្តីពីការគ្រប់គ្រងឱសថ និងច្បាប់ស្តីពីវិសោធនកម្ម ច្បាប់ស្តីពីការគ្រប់គ្រងឱសថ តម្រូវឱ្យរាល់ការចរាចរផលិតផលឱសថគ្រប់ប្រភេទក្នុងព្រះរាជាណាចក្រកម្ពុជាត្រូវមានលេខទិដ្ឋាការ ឬបញ្ជិកាពីក្រសួងសុខាភិបាល ហើយរាល់ការផ្សព្វផ្សាយផលិតផលទាំងនេះត្រូវមានការអនុញ្ញាត ពីក្រសួងសុខាភិបាល ។
ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាព ឬឈានដល់ការបាត់បង់អាយុជីវិតរបស់អ្នកប្រើប្រាស់ទៀតនោះ ក្រសួងសុខាភិបាលសូមជូនដំណឹងដល់បងប្អូនប្រជាពលរដ្ឋទាំងអស់ត្រូវបញ្ឈប់ការប្រើប្រាស់ផលិតផលឱសថនេះជាបន្តទៀត។
ក្រសួងសុខាភិបាលតម្រូវឲ្យម្ចាស់គណនីហ្វេសប៊ុកខាងលើនេះត្រូវបញ្ឈប់ការនាំចូលចែកចាយ ឬលក់ និងផ្សព្វផ្សាយឱសថទាំងនេះជាបន្ទាន់ និងប្រមូលផលិតផលខាងលើនេះមកកម្ទេចចោល។ ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកឈ្មោះ NEW4U Businesses ដែលនាំចូលចែកចាយ និងផ្សព្វផ្សាយលក់ផលិតផលឱសថខាងលើនេះទៅតាមច្បាប់ស្តីពីការ គ្រប់គ្រងឱសថ និងច្បាប់ស្តីពីច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន។
ក្នុងករណីបងប្អូនបានជួបប្រទះឃើញជនណាមួយកំពុង លក់ ឬចែកចាយនូវផលិតផលឱសថខាងលើនេះ សូមបងប្អូនប្រញាប់ផ្តល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿង សំអាងនៃក្រសួងសុខាភិបាល៕ ដោយ៖បញ្ញាស័ក្តិ
