ក្រោមការអនុវត្តការងារក្នុងខែតុលា ឆ្នាំ២០២០ ក្រសួងសាធារណការ និងដឹកជញ្ជូនបានត្រួតពិនិត្យរថយន្តសរុបចំនួន ១៣៩.៥៧៦គ្រឿង មានរថយន្តលើសទម្ងន់កម្រិតកំណត់ចំនួន ៤០.២១១គ្រឿង ស្មើនឹង ២៨.៨១%។
ថ្លែងក្នុងកិច្ចប្រជុំប្រចាំខែតុលា ក្នុងឆ្នាំ២០២០ របស់គណៈកម្មាធិការសម្របសម្រួលអចិន្ត្រៃយ៍នៃគណៈ
កម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍បានឲ្យដឹងថា រថយន្តផ្ទុកលើសទម្ងន់ក្រោម ៥% មានចំនួន ៤០ ០១២គ្រឿង ប្រហែល ២៨.៦៧%, រថយន្តផ្ទុកលើសទម្ងន់ពី ៥% – ១០% មានចំនួន ៧គ្រឿង ប្រហែល ០.០១%, រថយន្តផ្ទុកលើសទម្ងន់ពី ១០% – ២០% មានចំនួន ១០៥គ្រឿង ប្រហែល ០.០៨%និង រថយន្តផ្ទុកលើសទម្ងន់លើសពី ២០% មានចំនួន ៨៧គ្រឿង ប្រហែល ០.០៦%។
លោកថាការពិន័យរថយន្តដឹកលើសទម្ងន់សរុបមានចំនួន ១៩៩គ្រឿង ដែលមានទឹកប្រាក់ពិន័យចំនួន ៤៨៦ ៨៤៩ ៥០០រៀល។
តាមរបាយការណ៍ ចំនួនរថយន្តដែលចាប់បានមានការថយចុះចំនួន ៣៦គ្រឿង បើប្រៀបធៀបទៅនឹងតួលេខខែកញ្ញា ឆ្នាំ២០២០ ដែលមានចំនួន ២៣៥គ្រឿង។
លោករដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ក៏បានផ្សព្វផ្សាយលើសេចក្តីជូនដំណឹងលេខ ០៤៩ សជណ សក.គតលទ ចុះថ្ងៃទី២៨ ខែតុលា ឆ្នាំ២០២០ ស្តីអំពីការពង្រឹងវិធានការយ៉ាងតឹងរឹងបន្ថែមចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ដែលនឹងត្រូវអនុវត្តចាប់ពីថ្ងៃទី១៦ ខែវិច្ឆិកា ឆ្នាំ២០២០តទៅ។
សេង ឈួន ក៏បានស្នើម្ចាស់អាជីវកម្ម ម្ចាស់យានយន្តដឹកជញ្ជូនធន់ធ្ងន់ត្រូវអនុវត្ត និងពង្រឹងការអនុវត្តដឹកជញ្ជូនឱ្យបានត្រឹមត្រូវ តាមបទប្បញ្ញត្តិដូចចែងក្នុងមាត្រា៦០ នៃច្បាប់ផ្លូវថ្នល់ និងក្នុងករណីយានយន្តដឹកលើសកម្រិតកំណត់ ២០% ត្រូវធ្វើការដកបណ្ណបើកបរ និងព្យួរទុកចំនួន ២ឆ្នាំ ឃាត់យានយន្តទុកចំនួន ១ឆ្នាំ និងបញ្ឈប់អាជីវកម្មមួយឆ្នាំប្រសិនបើនៅតែបន្តបទល្មើស៕ ដោយ ៖ CEN
