បាត់ដំបង៖ សាលារៀនគ្រប់កម្រិតនៅទូទាំងខេត្តបាត់ដំបង បានចាប់ផ្ដើមដំណើរការចូលរៀនក្នុងដំណាក់កាលទី៣ តាមប្រកាសរបស់ក្រសួងអប់រំ យុវជន និងកីឡានិងបានអនុវត្តនូវវិធានការទប់ស្កាត់ជំងឺកូវីដ១៩ នៅថ្ងៃទី២ខែវិច្ឆិកាឆ្នាំ២០២០នេះ។
លោក យី សុងគី ប្រធានមន្ទីរអប់រំ យុវជន និងកីឡាខេត្តបាត់ដំបង បានមានប្រសាសន៍ថា នៅក្នុងខេត្តបាត់ដំបង សាលារៀនរបស់រដ្ឋទាំងអស់ បានបើកឲ្យសិស្សចូលរៀនក្នុងដំណាក់កាលទី៣ ទាំងសាលារៀនដែលធ្លាប់ជួបគ្រោះទឹកជំនន់ក៏ដោយ ក៏បានចូលរៀនវិញដែរ ហើយតាមសាលា ក៏បានអនុវត្តនូវការណែនាំរបស់ក្រសួងអប់រំ និងក្រសួងសុខាភិបាល ក្នុងការទប់ស្កាត់មិនឲ្យមានការរីករាលដាល នៃជំងឺកូវីដ១៩។
បើតាមគ្រូបង្រៀននៅសាលាបឋមសិក្សា២ធ្នូ ស្ថិតក្នុងក្រុងបាត់ដំបង បានប្រាប់ឲ្យដឹងថាក្នុងសម័យកូវីដ១៩នេះ សាលាបឋមសិក្សា២ធ្នូ ក្នុងដំណាក់កាលទី១គឺបង្រៀនសិស្សតាមប្រព័ន្ធអនឡាញ ការប្រមូលផ្ដុំបង្រៀនជាក្រុមតូចៗជាដើម សម្រាប់ដំណាក់កាលទី២គឺបានបើកឲ្យសិស្សចូលរៀន ក្នុងថ្នាក់រៀន ប៉ុន្តែមានការរក្សាគម្លាត ដោយក្នុងមួយថ្នាក់មានសិស្សតែ ២០នាក់ ក៏ដូចជាការចេញលេងឬចេញពីរៀនតាមវេន។មួយវិញទៀត ក្នុងដំណាក់កាលទី៣នេះគឺមានការរៀបចំឲ្យសិស្សរៀនក្នុងថ្នាក់អាចចាប់ពី ២០ ទៅ៣០នាក់ ប៉ុន្តែក៏បានអនុវត្តតាមវិធានការទប់ស្កាត់ជំងឺកូវីដ១៩។ក្នុងមួយសប្ដាហ៍ ឲ្យសិស្សរៀនតែ ៣ថ្ងៃ តែគ្រូតែបង្រៀនពេញមួយសប្ដាហ៍និងកាលពីទឹកជំនន់ឡើងខ្លាំង សាលារៀននេះក៏បានលិចនៅទីធ្លាសាលានិងបានផ្អាកការសិក្សារយៈពេល ៣ថ្ងៃផងដែរ។
គួរបញ្ជាក់ថាដោយសារបញ្ហាទឹកជំនន់ តាមសាលាមួយចំនួនក្នុងខេត្តបាត់ដំបង កាលពីការចូលរៀនក្នុងដំណាក់កាលទី២ បានផ្អាកការចូលរួមរៀនផងដែរ ប៉ុន្តែរហូតមកដល់ពេលនេះ តាមសាលាដែលត្រូវទឹកលិចទាំងអស់នោះ ទឹកបានស្រកអស់ហើយ ៕ដោយ៖អ៊ុងសារុំ