ព្រះសីហនុ ៖ ឯកឧត្តម គួច ចំរើន អភិបាលខេត្តព្រះសីហនុ ថ្មីៗនេះបានធ្វើឱ្យឧត្តមភរិយារំភើបចិត្តជាខ្លាំងជាមួយនិងទឹកចិត្តក្នុងនាមជាស្វាមីម្នាក់ សុខចិត្តក្តាប់អំបុករាប់ម៉ោងតាំងពីកន្លែងកម្មវិធី ដើម្បីផ្ញើភរិយាដែលកំពុងរង់ចាំនៅផ្ទះ។
តាមរយៈផេកហ្វេសប៊ុកផ្ទាល់របស់ឧត្តមភរិយាឯកឧត្តម គួច ចំរើន បានបង្ហោះយ៉ាងដូចច្នេះថា «រឿងនិទានមុនចូលគេង! «ទឹកចិត្ត!អំបុកគេដាល់ដាក់បេះដូង»(ប្តីចេញទៅកម្មវិធី ប្រពន្ធនៅផ្ទះកំដរកូន មិនបានប៉ុន្មានម៉ោងប្តីមកពីកម្មវិធីវិញ។ គ្រាន់តែឡានឈប់ភ្លាមប្តីចុះដើរសំដៅមករកប្រពន្ធឱ្យហុចដៃមកឱ្យប្តី! ប្រពន្ធហុចដៃភ្លាម មិនដឹងថាជាអ្វី ស្រាប់តែប្តីទម្លាក់អំបុកពីកណ្តាប់ដៃប្តីមកដៃប្រពន្ធហើយប្រាប់ថា យប់នេះគឺយប់អកអំបុកសំពះព្រះខែ! ទឹកចិត្តប្រពន្ធពេលនោះហួសចិត្តមិននឹកស្មានថាប្តីខ្លួន បែរជាសុខចិត្តក្តាប់អំបុកក្នុងដៃតាំងពីកន្លែងកម្មវិធី ជាប់ក្នុងឡានរហូតដល់ផ្ទះដែលមានចម្ងាយឆ្ងាយសិបគីឡូ! សួរថាតើចង់បានអ្វីទៀត? នេះហើយទឹកចិត្ត! តាមពិត សម្រាប់ប្តីនាពេលនេះចង់បានអំបុកមិនពិបាកទេ តែសុខចិត្តក្តាប់អំបុកក្នុងឡានយកមកផ្ញើប្រពន្ធ ដែលចាំនៅផ្ទះអត្ថន័យគឺថា អំបុកមួយក្តាប់ជាទឹកចិត្តប្តី បេះដូងប្តីបានដាក់ក្នុងអំបុកដែលក្តាប់ជាប់ជិះឡានរាប់សិបគីឡូម៉ែត្រ។ គ្រួសារសប្បាយជុំគ្នានាថ្ងៃបុណ្យអ៊ុំទូក អកអំបុក និងសំពះព្រះខែទោះជាឆ្នាំនេះ មិនបានប្រារព្ធពិធីបុណ្យមែនតែទឹកចិត្តនៅដដែល។ ជូនពរសុភមង្គលគ្រប់ក្រុមគ្រួសារ»។
ក្រោយពីបានបង្ហោះរឿងនិទានដែលកើតឡើង ពីរឿងពិតនៃជីវិតគ្រួសារយ៉ាងកក់ក្តៅរបស់ឯកឧត្តម គួច ចំរើន និងភរិយារួចមក ក៏មានអ្នកលេងបណ្តាញសង្គមហ្វេសប៊ុកជាច្រើនចូលទៅខំមិន សរសើររំភើប និងចែករំលែកលើបណ្តាញសង្គមផងដែរ៕ ដោយ៖ កូលាប ក្រហម