ភ្នំពេញ៖ ករណីបុរសជនពិការបើកកង់បីឥណ្ឌា (PassApp) ទៅប៉ះរថយន្តស៊េរីទំនើប ៥៧០ ចំនួន១គ្រឿង បណ្តាលឲ្យឆ្កូតដាច់ថ្នាំ និងខូចខាតកំពិតគួរសម ហើយត្រូវម្ចាស់ឡានទាមទារសំណងរហូតដល់ ៣០០០ ពាន់ដុល្លារ កំពុងបង្កការវែកញែកហេតុផល និងក្តីអាណិត ពេញបណ្តាញសង្គម។
បើតាមប្រភពព័ត៌មានបានឲ្យដឹងថា នៅព្រឹកថ្ងៃទី៤ ខែវិច្ឆិកា ឆ្នាំ២០២០ នេះ មានហេតុការណ៍គ្រោះថ្នាក់ចរាចរណ៍មួយបានកើតឡើង ដោយកង់បីឥណ្ឌា (PassApp) ១គ្រឿង បានបើកប៉ះរថយន្តស៊េរីទំនើប ៥៧០ ១គ្រឿង បង្កឲ្យមានការភ្ញាក់ផ្អើល នៅក្នុងបុរីអគីដេវីឡាអូបែកខ្អម រាជធានីភ្នំពេញ។
អ្នករត់កង់ជនពិការខាងលើមានឈ្មោះ ភួង សាម៉េត អាយុ ២៨ ឆ្នាំ មានស្រុកកំណើតនៅភូមិរមាស ឃុំគោខ្ច ស្រុកកំពង់ត្របែក ខេត្តព្រៃវែង និងត្រូវបានដឹងថាគាត់ទិញ PassApp បង់រំលោះ ដើម្បីប្រកបរបរចិញ្ចឹមជីវិត។ តែទោះយ៉ាងណា សម្រាប់ទំហំនៃការខូចខាតខាងលើនេះ ម្ចាស់ឡាន ៥៧០ បានទាមទារសំណងចំនួន 3000$។
ដោយឡែក មហាជនមួយចំនួន ក្រោយពីបានឮម្ចាស់ឡាន ៥៧០ ទាមទារសំណងច្រើនបែបនេះ ក៏បានលាន់មាត់ភ្ញាក់ផ្អើល និងថាទារនេះហាក់ដូចជាជ្រុលពេកហើយ គួរណាស់មានការយោគយល់បន្ធូរបន្ថយឲ្យគ្នាផងទៅ។ ខណៈអ្នកខ្លះបានលើកឡើងថា បើនិយាយតាមច្បាប់ក្រុមហ៊ុន ធានារ៉ាប់រង គឺគ្រាន់តែធ្វើឡានសងប៉ុនណឹងទេ បើមានរបួសស្នាមជារឿងផ្សេងមួយទៀត។
តែយ៉ាងណា មហាជនមួយចំនួនធំទៀត ដែលមិនចូលចិត្តចរិកបើកឈ្លើយ និងគ្មានការប្រុងប្រយ័ត្ន របស់អ្នកបើកបរកង់បីមួយចំនួន បានរិះគន់បែបៗនេះថា៖ «ខ្ញុំមិនកាន់ជើងខាងណាទេ ហើយខ្ញុំក៏មិនមានឡានម៉ូតូជិះដែរ តែការសង្កេតមើលរាល់ថ្ងៃនេះអ្នករត់កង់បីភាគច្រើន គឺពួកគាត់បើកមិនស៊ូវចេះគោរពច្បាប់អីទេ ពេលដល់ប៉ះឡានគេ គាត់តែងតែអង្វរលើកដៃសំពះគេ ព្រោះកង់បីឥឡូវគេហៅស្តេចផ្លូវហើយ, ខ្លះបើកព្រហើនរុលលឿន ដល់ពេលប៉ះរបស់គេ តាំងថាអីចេះអីចុះរបស់គេ គេស្រលាញ់ណាស់, ពួកអស់លោកកង់បីនឹង គ្មានដឹងខ្យល់អីទេ បើកឈ្លើយៗណាស់ តែឡាននឹងបើតោនថ្នាំថ្មីក៏ ៥០០$ ដែរ តែពេលលក់ចេញ គេដឹងថាបាញ់ថ្នាំ ដឹងតែខាតធ្ងន់ករ»៕ ដោយ៖ លឹម ហុង