ភ្នំពេញ៖ ក្រុមប្រឹក្សាជាតិដើម្បីកុមារ ប្រកាសថ្កោលទោសយ៉ាងដាច់អហង្ការ ដោយមិនអាចទទួលយកបានឡើយ ចំពោះការប្រព្រឹត្តិអំពើឃោរឃៅ យង់ឃ្នង ព្រៃផ្សៃ អមនុស្សធម៌ទៅលើទារកដែលមានអាយុក្រោមពីរសប្តាហ៍ បណ្តាលឲ្យស្លាប់បាត់បង់ជីវិតនៅក្នុងកេសក្រដាស កាលពីព្រឹកថ្ងៃទី១ ខែវិច្ឆិកា នៅខណ្ឌដូនពេញ រាជធានីភ្នំពេញ។
ក្រុមប្រឹក្សាជាតិកម្ពុជាដើម្បីកុមារ នៅថ្ងៃទី៤ខែវិច្ឆិកានេះ បានចេញសេចក្តីថ្លែងការណ៍ស្តីពីករណីសាកសពទារកនៅក្នុងកេសក្រដាស នៅរាជធានីភ្នំពេញ។
ក្រុមប្រឹក្សាជាតិកម្ពុជាដើម្បីកុមារ (ក.ជ .ក) សូមធ្វើការថ្កោលទោសយ៉ាងដាច់អហង្ការ ដោយ មិនអាចទទួលយកបានឡើយ ចំពោះការប្រព្រឹត្តិអំពើឃោរឃៅយង់ឃ្នង ព្រៃផ្សៃ អមនុស្សធម៌ទៅលើទារក ដែលមានអាយុប្រមាណក្រោម២សប្តាហ៍ បណ្តាលឱ្យស្លាប់បាត់បង់ជីវិតរួចយកទៅដាក់ក្នុងកេសក្រដាស។ ករណីនេះ ត្រូវបានប្រជាពលរដ្ឋប្រទះ ឃើញសពទារកនៅក្នុងកេសក្រដាស កាលពីវេលាម៉ោងប្រមាណ១០និង៣០ នាទីព្រឹក ថ្ងៃទី១ ខែវិច្ឆិកា ឆ្នាំ២០២០ នៅលើចិញ្ចើមផ្លូវជាប់របងវិទ្យាល័យ ហ៊ុន សែន ប៊ុនរ៉ានី វត្តភ្នំ (ផ្លូវលេខ ៧៤ ភូមិទី១៥ សង្កាត់ស្រះចក ខណ្ឌដូនពេញ រាជធានីភ្នំពេញ ដែលករណីនេះសមត្ថកិច្ចគ្រប់លំដាប់ថ្នាក់ បាននិង កំពុងស្រាវជ្រាវរកអ្នកប្រព្រឹត្ត និងចាត់វិធានការតាមនីតិវិធី។
ក្រុមប្រឹក្សាជាតិកម្ពុជាដើម្បីកុមារ ក៏ដូចជាសាធារណជនទូទៅ ពិតជាមានក្តីរន្ធត់ តក់ស្លុតឥតឧបមា និងមានការអាណិតអាសូរក្រៃលែងចំពោះទារកដ៏កំសត់ម្នាក់នេះ ដែលទទួលរងគ្រោះដោយ អំពើព្រៃផ្សៃ អមនុស្សធម៌ និងយល់ឃើញថា អំពើដ៏សាហាវ ឃោរឃៅ យង់ឃ្នងនេះ បានរំលោភបំពានយ៉ាង ធ្ងន់ធ្ងរទៅលើសិទ្ធិកុមារ ជាពិសេស សិទ្ធិរស់រានមានជីវិត ដែលកម្ពុជាបានផ្តល់សច្ចាប័ន និងមានក្នុងរដ្ឋធម្មនុញ្ញជាធរមាន។
ពាក់ព័ន្ធនឹងអំពើឃោរឃៅ ព្រៃផ្សៃ អមនុស្សធម៌នេះ ក្រុមប្រឹក្សាជាតិកម្ពុជាដើម្បីកុមារ (ក. ជ.ក) សូមអំពាវនាវដល់គ្រប់ក្រសួង ស្ថាប័ន និងអង្គការពាក់ព័ន្ធ ជាពិសេសស្ថាប័នតុលាការ មេត្តាយកចិត្តទុកដាក់ចាត់ វិធានការតាមផ្លូវច្បាប់យ៉ាងតឹងរឹងបំផុតចំពោះជនល្មើស ដើម្បីកុំឲ្យអំពើដ៏អាក្រក់នេះកើតមានក្នុងសង្គមយើងបន្តទៀត៕ដោយ៖បញ្ញាស័ក្តិ