ខេត្តព្រៃវែង ៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានចេញរបាយការណ៍ព័ត៌មានលម្អិតថា អគ្គិភ័យបានឆេះផ្សារកំពង់ពពិល កាលពីម៉ោងប្រមាណ ២១និង០០ នាទី រហូតដល់ម៉ោង១២និង៣០នាទីរំលងអធ្រាត្រ ឈានចូល ថ្ងៃទី៥ ខែវិច្ឆិកា ឆ្នាំ២០២០ បណ្តាលឱ្យខូចខាតតូបអស់៧៥តូប និងខូចខាតទ្រព្យសម្បត្តិផ្សេងៗ គិតជាទឹកប្រាក់អស់ប្រហែល៣៥ ម៉ឺន ដុល្លាអាមេរិក។
នៅថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២០ វេលាម៉ោង ២១និង០០ នាទី មានករណីអគ្គីភ័យឆេះនៅចំនុចផ្សារកំពង់ពពិលស្ថិតក្នុង ភូមិកំពង់ពពិល ឃុំកំពង់ពពិល ស្រុកពារាំ ខេត្តព្រៃវែង ដោយមូលហេតុ ទូស្សេខ្សែភ្លើង ។ ក្នុងហេតុការណ៍នោះ សមត្ថកិច្ចបានប្រើប្រាស់រថយន្តអគ្គិភ័យអន្តរាគមន៍ចំនួន ២១ គ្រឿង ៖ ១- នាយកដ្ឋាននគរបាលបង្ការពន្លត់អគ្គិភ័យ ៥ គ្រឿង ២- ស្នងការខេត្តកណ្តាលចំនួន ៣ គ្រឿង ៣- ស្នងការខេត្តព្រៃវែងចំនួន ៦ គ្រឿង ៤- ក្រុមហ៊ុន OCIC ចំនួន ៧ គ្រឿង ប្រើប្រាស់ទឹកអស់ចំនួន ៧០ ស៊ីទែន ។ ក្នុងហេតុការណ៍នេះ មិនបង្កឲ្យស្លាប់មនុស្សទេ ។
សមត្ថកិច្ចបានបញ្ជាក់ថា ការខូចខាតមានទំហំ ប្រហែល៧០ភាគរយ ខូចខាត ៧៥តូប លើ ១០៥ តូប ដោយមិនទាន់គិតអ្នកលក់កញ្ច្រែងល្អី ស្មើនឹងទឹកប្រាក់ប្រហែល ៣៥ ម៉ឺនដុល្លារអាមេរិក ។
ស្នងការរងនៃស្នងការដ្ឋាននគរបាលខេត្តព្រៃវែង ទទួលបន្ទុកផ្នែកអគ្គិភ័យ លោក រស់ ភឿន បានប្រាប់កាសែតក្នុងស្រុកថា ដើមចមដែលនាំឱ្យអគ្គិភ័យឆេះនោះ ទំនងជាទុស្សេខ្សែភ្លើង។ ប៉ុន្តែលោកថា ក្រុមការងារជំនាញកំពុងធ្វើការស្រាវជ្រាវបន្ថែមទៀតជុំវិញបញ្ហានេះ និងបូកសរុបរបាយការណ៍ដើម្បីស្រង់ស្ថិតិនៃទំហំដែលខូចខាតពិតប្រាកដ ដើម្បីជូនដំណឹងទៅសាធារណជនឱ្យបានដឹងពីរឿងនេះ។ អគ្គិភ័យនេះ សមត្ថកិច្ចបានសហការជាមួយស្ថាប័នពាក់ព័ន្ធ រួមមាន កម្លាំងអាជ្ញាធរខេត្តព្រៃវែងនិងខេត្តកណ្តាល បានរួមគ្នាចុះអន្តរាគមន៍បន្ទាន់ រហូតដល់អាចពន្លត់ទាំងស្រុង៕ដោយ៖បញ្ញាស័ក្តិ
