ភ្នំពេញ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង បានណែនាំឲ្យកងកម្លាំងសមត្ថកិច្ចចំណុះឱ្យរដ្ឋបាលរាជធានីភ្នំពេញ និងអាជ្ញាធរខណ្ឌទាំង ១៤ បន្តការពង្រឹងលើការបង្ក្រាបល្បែងស៊ីសងគ្រប់ប្រភេទ នៅក្នុងមូលដ្ឋានរបស់ខ្លួនឲ្យបានម៉ឺងម៉ាត់បំផុត ដើម្បីការពារសន្តិសុខជូនប្រជាពលរដ្ឋនៅរាជធានីភ្នំពេញ ឲ្យបានល្អប្រសើរ។
ការជំរុញនឹងការដាក់ចេញជាវិធានការជាថ្មីទៀតនេះ របស់លោកឃួង ស្រេង បានធ្វើឡើងនាព្រឹកថ្ងៃទី៥ ខែវិច្ឆិកា ឆ្នាំ២០២០នេះ នៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ។
លោកឃួង ស្រេង បានមានប្រសាសន៍ថា ល្បែងស៊ីសងគ្រប់ប្រភេទ មានទាំងល្បែងតាមអនឡាញល្បែងស៊ីសង បៀ អាប៉ោង ជល់មាន់ ជាដើម នៅតែបន្តកើតមាននៅក្នុងរាជធានីភ្នំពេញ ។ អាជ្ញាធរនិងកម្លាំងសមត្ថកិច្ចទាំងអស់ ត្រូវចុះធ្វើការស្រាវជ្រាវ និងមានវិធានការបង្ក្រាប ដើម្បីរក្សាសន្តិសុខ សុវត្ថិភាពជូនបងប្អូនប្រជាពលរដ្ឋ។ ដោយឡែកចំពោះអ្នកកត់ឆ្នោតឡូតូ យើងគួរចុះទៅណែនាំពួកគាត់ផងដែរ ដោយមិនគួរឲ្យពួកគាត់ឆ្នោតឡូតូ ដែលមានច្បាប់អនុញ្ញាតនេះ ដូចគេលក់អីវ៉ាន់ចាប់ហួយនោះទេ ។
ជាងនេះទៅទៀត លោកក៏បានណែនាំឲ្យមានវិធានការផងដែរ ទៅលើការបង្ក្រាបគ្រឿងញៀន ការជួញដូរមនុស្ស និងការពិនិត្យរដ្ឋបាលនៅតាមផ្ទះសំណាក់ ខុនដូ និងបុរីជាដើម ដើម្បីធ្វើយ៉ាងរក្សាបាននូវសន្តិសុខល្អជូនប្រជាពលរដ្ឋ ។
លោកបញ្ជាក់ទៀតថា ចំពោះកិច្ចការងាររក្សាសន្តិសុខសណ្ដាប់ធ្នាប់ជូនប្រជាពលរដ្ឋ អាជ្ញាធរនិងកម្លាំងសមត្ថកិច្ចរបស់យើងកន្លងមកនេះ ឃើញថាអនុវត្តបានល្អប្រសើរហើយ ប៉ុន្តែក៏នៅមានចំណុចខ្វះខាតមួយចំនួនផងដែរ ដែលយើងត្រូវខិតខំបំពេញបន្ថែមឲ្យបានល្អថែមទៀត ។ លោកថា យើងបានបំពេញការងារល្អហើយ តែបើយើងធ្វេសប្រហែសតែបន្តិចនោះ វានឹងនាំឱ្យយើងខូចឈ្មោះដែលយើងខំកសាងយ៉ាងលំបាកកន្លងមក ត្រូវតែប្រឹងប្រែងនិងម៉ឺងម៉ាត់ ។
បន្ថែមពីលើនេះទៀត ចំពោះបញ្ហាសណ្តាប់ធ្នាប់សាធារណៈ លោកឃួង ស្រេង ក៏បានជំរុញឲ្យអាជ្ញាធរពង្រឹងបន្ថែមផងដែរ ពិសេសលើបណ្ដោយផ្លូវទាំង១១ខ្សែ ដែលយើងបាននិងកំពុងអនុវត្ត ដោយមិនត្រូវឱ្យមានការរំលោភបំពាន ធ្វើឲ្យបាត់បង់សណ្ដាប់ធ្នាប់នោះទេ។ ដោយឡែកចំពោះឡានដឹកដី ដឹកខ្សាច់ដែលធ្វើឱ្យប្រឡាក់ផ្លូវធ្វើឱ្យដីហុយ ធ្វើឱ្យខូចផ្លូវ អាជ្ញាធរបស់យើងក៏ត្រូវតែមានវិធានការឲ្យបានតឹងរ៉ឹងផងដែរ ៕
ដោយ៖បញ្ញាស័ក្តិ