ខេត្តស្វាយរៀង ៖ មានករណីចងកធ្វើអត្តឃាតម្តាយ និងកូន ធ្វើឲ្យមានការភ្ញាក់ផ្អើលយ៉ាងខ្លាំង ដោយអ្នកភូមិដាក់ការសង្ស័យជាអំពើឃាដកម្ម ក៏ប៉ុន្តែសមត្ថកិច្ចពិនិត្យ និងធ្វើកោសលវិច័យឃើញថា គឺជាករណីចងកធ្វើអត្តឃាតពុំមែនជាអំពើឃាដកម្មនោះទេ។
បើតាមសមត្ថកិច្ចនគបាលស្រុករមាសហែក បានឲ្យដឹងថា ករណីចងកធ្វើអត្តឃាតនេះ កើតឡើងប្រមាណជាម៉ោង៣ទៀបភ្លឺ ថ្ងៃទី៥ ខែវិច្ឆិកា ឆ្នាំ២០២០នេះ នៅភូមិក្រសាំង ឃុំក្រសាំង ស្រុករមាសហែក។ ជនដែលគិតខ្លីឈ្មោះ លឹម មុំ ភេទស្រី អាយុ៣៨ឆ្នាំ មានទីលំនៅស្រុកកៀនស្វាយ ខេត្តកណ្តាល មានស្រុកកំណើតភូមិកើតហេតុខាងលើ។
ប្រភពដដែលបន្តទៀតថា ស្ត្រីចងកធ្វើអត្តឃាតមានប្តីឈ្មោះទី រស់នៅស្រុកកៀនស្វាយ ហើយជាមនុស្សញៀនស្រា ផឹកស្រាស្រវឹងរាល់ថ្ងៃ បង្កជម្លោះជាមួយប្តី រហូតប្តីឲ្យត្រឡប់មកផ្ទះឪពុកម្តាយ នៅស្រុកកំណើតភូមិក្រសាំងនេះ កាលពីថ្ងៃទី៣ ខែវិច្ឆិកា ឆ្នាំ២០២០ ហើយស្ត្រីរងគ្រោះបាននាំកូនប្រុសម្នាក់ឈ្មោះ យ៉េន តុលា អាយុ ១ឆ្នាំមកជាមួយ។
បើតាមអ្នកជិតខាងឲ្យដឹងថា ពេលស្ត្រី និងកូនមកដល់ផ្ទះឪពុកម្តាយ គឺមិននៅផ្ទះទេ បានចេញទៅរស់នៅជាមួយកូន នៅឯខេត្តកំពង់ចាម ក៏ទៅនៅផ្ទះបងស្រីដែលបងស្រីក៏អត់នៅផ្ទះដែរ ពេលនោះស្ត្រីរងគ្រោះផឹកស្រាស្រវឹងកើតសរសៃប្រសាទ យកខ្សែគោបម្រុងនឹងចងកធ្វើអត្តឃាត តែអ្នកជិតខាងមកទាន់ក៏បានចាប់ ហើយយកខ្សែចេញពីដៃ រួចអប់រំកុំឲ្យគិតខ្លី មិននឹកស្មានថា គិតខ្លីចងកកូនព្យួរឲ្យស្លាប់ហើយចងកខ្លួនឯងបែបនេះសោះ ហើយនៅថ្ងៃកើតហេតុវេលាម៉ោង៦ និង២០នាទីព្រឹក អ្នកភូមិបានមកប្រទះឃើញជនរងគ្រោះចងកស្លាប់ទាំងពីរនាក់ម្តាយ និងកូនក៏ឆោឡោប្តឹងសមត្ថកិច្ចតែម្តង។
ប្រភពបន្តទៀតថា ក្រោយពីទទួលពាក្យបណ្តឹង ពីប្រជាពលរដ្ឋ លោកអធិការបានរាយការណ៍លោកស្នងការដ្ឋាននគរបាលខេត្តស្វាយរៀងភ្លាមៗដែរ។ លោកស្នងការ ក៏បានបញ្ជាឲ្យលោកស្នងការរងទទួលបន្ទុកផ្នែកព្រហ្មទណ្ឌ ដឹកនាំកម្លាំងការិយាល័យជំនាញបច្ចេកទេស និងក្រុមគ្រូពេទ្យចុះពិនិត្យ និងធ្វើកោសលវិច័យ សន្និដ្ឋានថា ពិតជាចងកធ្វើអត្តឃាតពិតប្រាកដមែន ដោយស្ត្រីរងគ្រោះជាមនុស្សញៀនស្រា និងមានវិបត្តិក្នុងគ្រួសារផងទើបគិតខ្លីបែបនេះ។ ចំណែកឯប្តីមិនអាចរកការបំភ្លឺបានទេ។ សមត្ថកិច្ចក៏បានប្រគល់សពម្តាយ និងកូនឲ្យក្រុមគ្រួសារធ្វើបុណ្យតាមប្រពៃណី៕ ដោយ៖វ៉ៃកូ
