ខេត្តកំពង់ធំ៖ ចៅអធិការវត្តស្ដីទី ប្រព្រឹត្តអំពើហិង្សាវាយទាត់ធាក់កូននេនកាលពីល្ងាច ថ្ងៃទី២ ខែវិច្ឆិកា ឆ្នាំ២០២០ ស្ថិតនៅក្នុងព្រះវិហារវត្តពណ្ណរាយ ឃុំចើងដើង ស្រុកបារាយណ៍ ខេត្តកំពង់ធំ ព្រះនាម ហ៊ុម ហឿន អាយុ៣៦ឆ្នាំ បានទទួលសារភាពកំហុសប្រព្រឹត្តខុសពីធម៌វិន័យព្រះពុទ្ធសាសនា និងក៏បានសម្រេចចិត្តសរសេរលិខិតលាចាកសិក្ខាបទនៅចំពោះមុខព្រះនុគុណស្រុក ការិយាល័យធម្មការស្រុក និងអាជ្ញាធរពាក់ព័ន្ធ។
លិខិតលាចាកសិក្ខាបទនៅចំពោះមុខព្រះនុគុណស្រុក មានខ្លឹមសារថា ខ្ញុំព្រះករុណាភិក្ខុកល្យាណធម្មោ ហ៊ុម ហឿន អាយុ៣៦ឆ្នាំ ជាចៅអធិការស្តីទី វត្តពណ្ណរាយ ឃុំចឹងដឹង ស្រុកបារាយណ៍ ខេត្តកំពង់ធំ សូមក្រាបថ្វាយបង្គំ ព្រះគ្រូចរិយានុរំក្ខ ព្រហ្មសារូ ព្រះគ្រូអនុគណស្រុកបារាយណ៍ ខេត្តកំពង់ធំ ជាទីសក្ការៈ។ ខ្ញុំព្រះករុណា សូមលាចាកសិក្ខាបទដោយខ្ញុំព្រះករុណាបានប្រព្រឹត្តកំហុសពុទ្ធវិន័យរបស់អ្នកបួស ក្នុងព្រះពុទ្ធសាសនារបស់រដ្ឋដូច្នេះខ្ញុំព្រះករុណា សូមលាចាកសិក្ខាបទនៅល្ងាចថ្ងៃទី៤ ខែវិច្ឆិកា ឆ្នាំ២០២០ វេលាម៉ោង៧និង៣០នាទី ដោយពុំមានការបង្ខិតបង្ខំឡើយ ។
ចំណែកលោក តាន់ តៃជ្រាន់ ប្រធានមន្ទីរធម្មការខេត្តបានបញ្ជាក់បន្ថែមថា ចំពោះសង្ឃដែលប្រព្រឹត្តល្មើសច្បាប់ធម៌វិន័យ នៅពេលដែលផ្សឹករួចហើយនោះ គឺដូចជាពលរដ្ឋធម្មតា រឿងមានចំណាត់ការយ៉ាងណានោះគឺអាស្រ័យលើនីតិវិធី និងជំនាញពាក់ព័ន្ធ។
ដោយឡែកអធិការដ្ឋាននគរបាលស្រុកបារាយណ៍ ពុំទាន់បានទទួលពាក្យបណ្ដឹងពីជនរងគ្រោះនៅឡើយទេ ក្នុងករណីដែលជនរងគ្រោះ ឬក្រុមគ្រួសារមកដាក់ពាក្យបណ្តឹង ជំនាញនឹងអនុវត្តតាមនីតិវីធី។
កូននេនបានទៅដល់ពេទ្យបានពិនិត្យទៅឃើញថា លោកនេនរងគ្រោះ បានបាក់ធ្មេញខាងលើ ពីរ និងរងើធ្មេញពីរ ពកក្បាល ហើមជើង ហើមដៃ ព្រមទាំងដងខ្លួនធ្ងន់ធ្ងរណាស់ ពេទ្យក៏ឲ្យថ្នាំលេប និងចាក់ថ្នាំបំបាត់ការ ឈឺចុកចាប់។ហេតុការណ៍នេះកើតឡើងនៅ វត្តពណ្ណរាយ ឃុំចឹងដឹង ស្រុកបារាយណ៍ ខេត្តកំពង់ធំ៕ ដោយ៖បញ្ញាស័ក្តិ