កណ្តាល៖ ករណីគាស់ផ្ទះ និងគាស់ទូដែកលួចយកទ្រព្យសម្បត្តិនៅ ក្រុងតាខ្មៅ រយៈ៣ថ្ងៃហើយ អធិការនគរបាលក្រុងតាខ្មៅមិនទាន់ចាប់បានជនល្មើសនៅឡើយ ខណៈលោកស្នងការនគរបាលខេត្តកណ្តាល បានជម្រុញដល់ កម្លាំងជំនាញពាក់ព័ន្ធធ្វើយ៉ាងណាយកចិត្តទុកដាក់ស្រាវជ្រាវ ស៊ើបអង្កេត ប្រមែប្រមូលវត្ថុតាងទាំងអស់ ប្រើប្រាស់គ្រប់វិធានការជំនាញ ឈានទៅរកការកំណត់មុខសញ្ញាឃាត់ខ្លួនមកធ្វើការវិនិច្ឆ័យទោសតាមច្បាប់។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តកណ្តាល សូមឆ្លើយតបបំភ្លឺជូនម្ចាស់គណនីហ្វេសប៊ុក ឈ្មោះ Hea SA ដែលបានផ្សព្វផ្សាយនៅលើបណ្តាញសង្គមហ្វេសប៊ុករបស់ខ្លួន កាលពីថ្ងៃទី០៣ ខែវិច្ឆិកា ឆ្នាំ២០២០ មានខ្លឹមសារថា «ក្រុងតាខ្មៅ មានករណីគាស់ផ្ទះខ្ញុំទាំងថ្ងៃបងប្អូនក្រុងតាខ្មៅប្រយ័ត្នប្រយែង ចាប់បានមិនឱ្យឯងដកដង្ហើមទេអស់លោកចោរ»។
ស្នងការដ្ឋាននគរបាលខេត្តកណ្តាល សូមបញ្ជាក់ជូនថា ក្រោយពីមានករណីគាស់ផ្ទះប្រជាពលរដ្ឋ ជនរងគ្រោះជាម្ចាស់ផ្ទះបានរាយការណ៍មកកម្លាំងនគរបាលប៉ុស្តិ៍រដ្ឋបាលព្រែកសំរោង ភ្លាមនោះកម្លាំងប៉ុស្តិ៍បានចុះដល់កន្លែងកើតហេតុ ពិនិត្យនិងធ្វើកំណត់ហេតុទីតាំងកន្លែងកើតហេតុភ្លាមៗផងដែរ។ ចំពោះការផ្សព្វផ្សាយរបស់គណនីហ្វេសប៊ុកឈ្មោះ Hea SA គឺជាការពិត ដែលករណីគាស់ផ្ទះលួចយកទ្រព្យសម្បត្តិ នេះ កើតឡើងនៅថ្ងៃទី៣ ខែវិច្ឆិកា ឆ្នាំ២០២០ វេលាម៉ោង ១៣និង៣០នាទី ស្ថិតនៅក្រោយសាលាបឋមសិក្សាព្រែកសំរោង ភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល ដែលមានជនរងគ្រោះជាម្ចាស់ផ្ទះឈ្មោះ គ្រី វួចគៀង ភេទស្រី អាយុ ៥៦ឆ្នាំ មុខរបរមេផ្ទះ មានទីលំនៅភូមិ ឃុំកើតហេតុ។ ចំណែកជនសង្ស័យ(គេចខ្លួន) សមត្ថកិច្ចជំនាញពាក់ព័ន្ធកំពុងស្រាវជ្រាវកំណត់អត្តសញ្ញាណ។
វត្ថុតាងចាប់យករួមមាន៖ កាំបិតប៉័ងតោដងឈើចំនួន០១,ឈើជ្រុងចំនួន០១ (ប្រវែង១.៤ម៉ែត្រ),សោរម៉ាលេក ចំនួន០១ (ប្រវែង០.៣សង់ទីម៉ែត្រ),ញញួរចំនួន០១,ដែកទីបអក្សរLចំនួន០១ និងទូរដែកចំនួន០១ (ទំហំ០.៤ម៉ែត្រ គុណ០.៦ម៉ែត្រ)។ សម្ភារបាត់បង់រួមមាន៖ ១-លុយដុល្លារ ចំនួន ២,៨០០ដុល្លារសហរដ្ឋអាមេរិច,២-ខ្សែដៃប្លាកទីនចំនួន ២ខ្សែ មានទម្ងន់១ដំឡឹងកន្លះ,៣-ចិញ្ជៀនមាស ១វង់ មានទម្ងន់ ២ជី ។
ចំពោះករណីនេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានជម្រុញ និងណែនាំដល់ផែនជំនាញ កម្លាំងការិយាល័យជំនាញ អធិការនគរបាលក្រុងតាខ្មៅ និងកម្លាំងជំនាញពាក់ព័ន្ធធ្វើយ៉ាងណាយកចិត្តទុកដាក់ស្រាវជ្រាវ ស៊ើបអង្កេត ប្រមែប្រមូលវត្ថុតាងទាំងអស់ ប្រើប្រាស់គ្រប់វិធានការជំនាញ ឈានទៅរកការកំណត់មុខសញ្ញាឃាត់ខ្លួនមកធ្វើការវិនិច្ឆ័យទោសតាមច្បាប់៕ ដោយ៖បញ្ញាស័ក្តិ