មជ្ឈមណ្ឌលបណ្តុះធុរកិច្ចថ្មី “តេជោ និង ក្រុមហ៊ុន អាយជីធិកគ្រុប បានចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើកម្មវិធី និងគម្រោងពាក់ព័ន្ធនឹងពាណិជ្ជកម្ម និងការស្រាវជ្រាវនិងអភិវឌ្ឍន៍នានានៅកម្ពុជា។
កិច្ចសហប្រតិបត្តិការគឺមានគោលបំណងរួមចំណែកកសាងសមត្ថភាពនវានុវត្តន៍ សម្រាប់បន្លាស់ប្តូរទៅកាន់បច្ចេកវិទ្យាឌីជីថលនៅក្នុងប្រទេសកម្ពុជា និងជួយពន្លឿនការអភិវឌ្ឍផលិតផល និងដំណោះស្រាយមុខព្រួញនានា ដែលអាចទាញយកកម្លាំងគាំទ្រពីធុរកិច្ចថ្មីក្នុងស្រុក ក៏ដូចជាផ្តល់ការគាំទ្រដល់ពួកគេ ព្រមទាំងជំរុញការអភិវឌ្ឍប្រព័ន្ធអេកូឡូស៊ីធុរកិច្ចថ្មីនៅកម្ពុជាផងដែរ។
មជ្ឈមណ្ឌលបណ្តុះធុរកិច្ចថ្មី “តេជោ” (សរសេរកាត់ថា «ម.ធ.ត.») ដែលជាគ្រឹះស្ឋានសាធារណៈរដ្ឋបាលស្ថិតនៅក្រោមអាណាព្យាបាលនៃក្រសួងសេដ្ឋកិច្ច និងហិរញ្ញវត្ថុ។ ដោយឡែ ក្រុមហ៊ុន អាយជីធិកគ្រុប (សរសេរកាត់ថា «អាយជីធិក») ដែលជាក្រុមហ៊ុននវានុវត្តន៍ និងបច្ចេកវិទ្យាដែលលូតលាស់រហ័សនៅកម្ពុជា និងមានវត្តមាននៅទីផ្សារអន្តរជាតិ ដោយផ្តើមចេញពីក្រុមហ៊ុនដំបូង អាយឌាលីង ខនសាល់ធីង។
តាមរយៈអនុស្សរណៈនៃការយោគយល់នេះ ម.ធ.ត. នឹងបង្ហាញអំពីដំណោះស្រាយ និងគម្រោងបច្ចេកវិទ្យានានារបស់ អាយជីធិក ទៅដល់ បណ្តាញធុរកិច្ចថ្មី និងគម្រោងបច្ចេកវិទ្យាឌីជីថលនានារបស់ម.ធ.ត.។ ជាមួយគ្នានោះផងដែរ អាយជីធិក នឹងផ្តល់នូវធាតុចូល និងការប្រឹក្សាបច្ចេកទេសចំពោះកម្មវិធីទូទៅនានារបស់ ម.ធ.ត. ក៏ដូចជាផ្តល់នូវឱកាសភាពក្នុងការចាប់ដៃគូជាមួយធុរកិច្ចថ្មី និងគម្រោងការណាមួយរបស់ ម.ធ.ត.ផងដែរ។
លើសពីនេះទៅទៀត ម.ធ.ត. និង អាយជីធិក នឹងសហការគ្នាក្នុងការរៀបចំអនុវត្តកម្មវិធីថ្មីមួយរបស់ ម.ធ.ត. ដែលមានឈ្មោះថា កម្មវិធីនវានុវត្តន៍បញ្ច្រាស (Reverse Innovation) ដោយប្រើប្រាស់ជំនាញបច្ចេកវិទ្យា និងវិជ្ជាជីវៈរបស់ អាយជីធិក ក្នុងការផ្តល់នូវដំបូន្មាន និងការបង្ហាត់បង្ហាញដែលពាក់ព័ន្ធនានាដល់អ្នកចូលរួមក្នុងកម្មវិធីនវានុវត្តន៍បញ្ច្រាសនេះ។
លោកបណ្ឌិត តាំង ងួនលី នាយកប្រតិបត្តិនៃ ម.ធ.ត. បានមានប្រសាសន៍ថាការរៀបចំអនុវត្តកម្មវិធីនវានុវត្តន៍បញ្ច្រាស គឺជាជំហានដំបូងរបស់យើងសម្រាប់កិច្ចសហប្រតិបត្តិការមួយនេះ ក្នុងគោលបំណងជួយអ្នកចូលរួមក្នុងកម្មវិធីនេះតាមរយៈការផ្តល់នូវការបង្ហាត់បង្ហាញ និងណែនាំជាប្រចាំ និងការគាំទ្រជាមូលដ្ឋាននានាដែលចាំបាច់ដើម្បីពួកគេអាចបង្កើតផលិតផលរបស់ខ្លួនបាន។
អាយជីធិក ត្រូវបានគេស្គាល់ថាជាក្រុមហ៊ុនដែលលូតលាស់រហ័ស ដូច្នេះអ្នកចូលរួមក្នុងកម្មវិធី នឹងអាចរៀនសូត្របានច្រើនពីបទពិសោធន៍ និងជំនាញរបស់ក្រុមហ៊ុន ដែលរួមមាន ជំនាញបច្ចេកទេស ផ្នត់គំនិតសហគ្រិន និងវប្បធម៌ការងារផងដែរ។
លោក គឹម ពុធគីរី អគ្គនាយក អាយជីធិក បានបន្ថែមថា៖ យើងមានសេចក្តីសោមនស្សក្នុងការសហការជាមួយមជ្ឈមណ្ឌលបណ្តុះធុរកិច្ចថ្មី “តេជោ” ដោយផ្តល់ដំបូន្មាន និងការបង្វឹកនានា ដល់ធុរកិច្ចថ្មីផ្នែកបច្ចេកវិទ្យា ជាមួយនឹងជំនាញរបស់យើងក្នុងផ្នែកបច្ចេកវិទ្យាហិរញ្ញវត្ថុ និងការអនុវត្តគម្រោងដំណោះស្រាយបច្ចេកវិទ្យាសម្រាប់ស្ថាប័នធនាគារ ព្រមទាំងបទពិសោធន៍ក្នុងការអភិវឌ្ឍថ្នាលឌីជីថល។
ជាមួយនឹងមជ្ឈមណ្ឌលឧត្តមភាពនៃអាយជីធិករបស់យើងផ្ទាល់ ដែលត្រូវបានបង្កើតឡើងក្នុងទម្រង់ជាក្រុមហ៊ុនវិនិយោគចម្រុះជាមួយដៃគូបច្ចេកវិទ្យាល្បីៗជុំវិញពិភពលោក រួមមានជាអាទិ៍ សហរដ្ឋអាមេរិក អឺរ៉ុប ឥណ្ឌា សិង្ហបុរី និងម៉ាឡេស៊ី យើងជឿជាក់ថាកិច្ចសហការនេះនឹងផ្តល់នូវការគាំទ្រកាន់តែរឹងមាំដល់ធុរកិច្ចថ្មី និងគម្រោងនានាក្រោមកម្មវិធីរបស់ មជ្ឈមណ្ឌលបណ្តុះធុរកិច្ចថ្មី ”តេជោ” ព្រមទាំងរួមចំណែកដល់ការផ្លាស់ប្តូរទៅកាន់សម័យកាលបច្ចេកវិទ្យាឌីជីថលនៅកម្ពុជាផងដែរ៕ ដោយ ៖ CEN
