ភ្នំពេញ ៖ លោករដ្ឋមន្ត្រីវេងសាខុន និងភរិយាត្រូវដាក់ឲ្យនៅបន្ទុប់ក្នុងផ្ទះ រយៈពេល ១៤ថ្ងៃ តាមវិធានការរបស់ក្រសួងសុខាភិបាលដើម្បីធ្វើចត្តាឡីស័កបន្ទាប់ពីលោករដ្ឋមន្ត្រីបានជួបប្រាស្រ័យទាក់ទងជាមួយនឹងរដ្ឋមន្ត្រីការបរទេសហុងគ្រីនាពេលកន្លងមក។
លោករដ្ឋមន្ត្រីវេងសាខុនបានសរសេរសារនៅលើហ្វេសប៊ុកនាព្រឹកថ្ងៃសុក្រនេះ “យើងខ្ញុំទាំងពីរនាក់ត្រូវដាក់ឲ្យនៅបន្ទុប់ក្នុងផ្ទះ រយៈពេល ១៤ថ្ងៃ តាមវិធានការរបស់ក្រសួងសុខាភិបាល ទន្ទឹមនឹងនេះខ្ញុំសូមអភ័យទោសចំពោះការលុបចោលកម្មវិធីជាច្រើនដែលត្រូវចុះមូលដ្ឋានតាមបណ្តាខេត្ត ដែលយើងខ្ញុំបានសន្យាកន្លងមក។ ប៉ុន្តែអ្វីដែលជាភាកិច្ចរបស់ខ្ញុំដែលត្រូវបំពេញជាប្រចាំរាល់ថ្ងៃនោះ នៅតែបំពេញគឺ ការហាត់ប្រាណ ការត្រួតពិនិត្យឯកសារ និងការសម្រេចទៅលើរាល់ឯកសារនានាតាមសមត្ថកិច្ចទទួលខុសត្រូវ របស់ខ្ញុំ ដែលប្រមុខរាជរដ្ឋាភិបាលបានប្រគល់ជូន”។
ក្រសួងសុខាភិបាល នៅយប់ថ្ងៃទី៥ ខែវិច្ឆិកា ឆ្នាំ២០២០នេះ បានប្រកាសឲ្យអ្នកប៉ះពាល់ដោយផ្ទាល់ ឬប្រយោលជាមួយ រដ្ឋមន្ត្រីការបរទេស និងពាណិជ្ជកម្មហុងគ្រី ទាំងអស់ដែលបានធ្វើ តេស្តអវិជ្ជមានមេរោគកូវី១៩ លើកទី១ ទៅធ្វើតេស្តចំនួន៣ ដងទៀត ដើម្បីឲ្យប្រាកដថាខ្លួនមិនឆ្លងមេរោគនេះ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានប្រាប់ឲ្យដឹងថា ទីតាំងធ្វើតេស្តមេរោគកូវីដ១៩សម្រាប់មនុស្សទាំង៦២៨នាក់ ចំនួន៣ដងទៀត គឺនៅវិមានមិត្តភាព ចាប់ពីម៉ោង៧ព្រឹកតទៅ តាម កាលបរិច្ឆេទ ដូចខាងក្រោមនេះ៖ លើកទី២ នៅថ្ងៃទី៩ ខែវិច្ឆិកា ឆ្នាំ២០២០ , លើកទី៣ នៅថ្ងៃទី១៤ ខែវិច្ឆិកា ឆ្នាំ២០២០ និងលើកទី៤ នៅថ្ងៃទី១៨ ខែវិច្ឆិកា ឆ្នាំ២០២០។
ក្រសួងសុខាភិបាល បានអំពាវនាវយ៉ាងទទូច ដល់អ្នកដែលបានធ្វើតេស្តរកមេរោគកូវីដ១៩ លើកទី១រួចរាល់ហើយ ដែលទទួលបានលទ្ធផលអវិជ្ជមាននោះ ត្រូវបន្តធ្វើចត្តាឡីស័កឲ្យបានខ្ជាប់ខ្ជួន កុំធ្វេសប្រហែសឲ្យសោះ ដើម្បីចៀសវាងការចម្លងរោគទៅក្នុងសហគមន៍។
លោកស្រី យក់ សម្បត្តិ ថែម ទៀតបានអំពាវនាវ ថ្នាក់ដឹកនាំ មន្ត្រី និងអ្នកសារព័ត៌មាន ដែលបានប៉ះពាល់ដោយផ្ទាល់ ឬប្រយោលជាមួយរដ្ឋមន្ត្រីការបរទេសហុងគ្រី ដែលមិនទាន់បានធ្វើតេស្ត ត្រូវទៅពិនិត្យសុខភាពរកមេរោគកូវីដ១៩ ជាបន្ទាន់។
ក្រសួងសុខាភិបាលបានបញ្ជាក់ថា ការធ្វើតេស្តលើសំណាកអ្នកប៉ះពាល់ជាមួយរដ្ឋមន្ត្រីក្រសួងការបរទេស និងពាណិជ្ជកម្មប្រទេសហុងគ្រី លើមនុស្ស៦២៨នាក់ រួមទាំងថ្នាក់ដឹករាជរដ្ឋាភិបាល និងមន្ត្រីជាន់ខ្ពស់ផងនោះ ដោយលទ្ធផលតេស្តបញ្ជាក់ថា មិនមានឆ្លងវីរុសកូវីដ១៩នេះទេ។ ក្រសួងសុខាភិបាល នៅព្រឹកថ្ងៃទី៥ ខែវិច្ឆិកា ឆ្នាំ២០២០នេះ បានចេញសេចក្តីប្រកាសព័ត៌មាន បញ្ជាក់ថា មិនមានអ្នកឆ្លងវីរុសកូវីដ១៩ថ្មីទេ និងមានអ្នកជំងឺ៣នាក់ព្យាបាលជាសះស្បើយ។
សម្រាប់អ្នកប៉ះពាល់ជាមួយនឹង រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី ត្រូវបានក្រសួងបញ្ជាក់ថា ក្រោយពីទទួលបានសេចក្ដីជូនព័ត៌មាន ស្ដីពីករណីវិជ្ជមានវីរុសកូវីដ-១៩ របស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី ក្នុងពេលដែលគាត់កំពុងបំពេញបេសកកម្មផ្លូវការនៅថៃ នៅថ្ងៃទី៤ ខែវិច្ឆិកា ឆ្នាំ២០២០ ក្រសួងសុខាភិបាលកម្ពុជា បានធ្វើការស្រាវជ្រាវ ភ្លាមៗ ដើម្បីរកអ្នកដែលបានប៉ះពាល់ជាមួយគាត់ ក្នុងរយៈពេលដែលបានធ្វើទស្សនកិច្ចផ្លូវការនៅកម្ពុជា កាលពីថ្ងៃទី៣ ខែវិច្ឆិកា ឆ្នាំ២០២០ កន្លងទៅនេះ ហើយបាន និងកំពុងយកវត្ថុសំណាកអ្នកដែលប៉ះពាល់ ទៅវិភាគនៅវិទ្យាស្ថានប៉ាស្ទ័រកម្ពុជា។
គិតត្រឹមម៉ោង២៣និង០០នាទីយប់ថ្ងៃទី៤ ខែវិច្ឆិកា ឆ្នាំ២០២០ អ្នកប៉ះពាល់សរុបចំនួន ៦២៨នាក់ ត្រូវបានធ្វើតេស្តវត្ថុសំណាក ដោយវិទ្យាស្ថានប៉ាស្ទ័រកម្ពុជា ដែលទទួលបានលទ្ធផល «អវិជ្ជកមានវីរុសកូវី១៩» ទាំងអស់គ្នា ហើយក្រសួងកំពុងស្រាវជ្រាវ និងជម្រាបជូនសាធារណជន នៅពេលទទួលបានលទ្ធផលវិភាគវត្ថុសំណាកជាបន្តបន្ទាប់ទៀត។
លើសពីនេះ ក្រសួងសុខាភិបាល សូមក្រើនរំលឹក និងធ្វើការអំពាវនាវសារជាថ្មីម្តងទៀត សូមប្រជាពលរដ្ឋទាំងអស់ បន្តអនុវត្តឲ្យបានខ្ជាប់ខ្ជួននូវវិធានការការពារខ្លួន ត្រូវពាក់ម៉ាស (ក្នុងករណីចាំបាច់) ជាពិសេសនៅពេលចល័តធ្វើដំណើរ និងពេលជួបមនុស្សម្នាច្រើន ប្រើកន្សែង ឬក្រម៉ាខ្ទប់មាត់ពេលក្អក កណ្តាស់ ដើម្បីចៀសវៀងការចម្លងវីរុសកូវីដ១៩ ដែលអាចកើតមានឡើងគ្រប់ពេលវេលា គ្រប់កាលៈទេសៈ និងគ្រប់ទីកន្លែង៕ ដោយ៖បញ្ញាស័ក្តិ