ភ្នំពេញ៖រាជបណ្ឌិត្យសភាកម្ពុជាគឺជាស្ថាប័នបណ្តុះបណ្តាលនិងស្រាវជ្រាវវិទ្យាសាស្ត្រលើគ្រប់វិស័យជាន់ខ្ពស់មួយរបស់ជាតិ ហើយសមិទ្ធផលរបស់ស្ថាប័នប្រមូលផ្តុំបញ្ញាជនជាតិមួយនេះកើតចេញការអភិវឌ្ឍដោយប្រើប្រាស់រូបមន្ត«យកស្លឹកត្នោតខ្ចប់ស្ករត្នោត»ដែលជារូបមន្តមួយរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះ រាជាណាចក្រកម្ពុជាក្នុងការអភិវឌ្ឍជាតិឱ្យមានការរីកចម្រើនមកដល់បច្ចុប្បន្ន។ នេះជាការលើកឡើងរបស់ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា។
ថ្លែងក្នុងឱកាសដឹកនាំកិច្ចប្រជុំបូកសរុបការងារប្រចាំខែតុលា ឆ្នាំ២០២០ របស់រាជបណ្ឌិត្យសភាកម្ពុជា នៅរសៀលថ្ងៃព្រហស្បតិ៍ ទី៥ ខែវិច្ឆិកា ឆ្នាំ ២០២០ នៅក្នុងបន្ទប់ប្រជុំ RAC ២-១១ អគារឥន្ទ្រទេវី នៃរាជបណ្ឌិត្យ សភាកម្ពុជានេះ ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជាបានលើកឡើងថា ធនធានមនុស្សដែលមកទទួលបណ្តុះបណ្តាលនៅរាជបណ្ឌិត្យសភាកម្ពុជាសុទ្ធតែទទួលបានចំណេះជំនាញច្បាស់លាស់ មានគំនិតវិភាគគ្រប់ជ្រុងជ្រោយ មានក្រមសីលធម៌វិជ្ជាជីវៈ និងទទួលបានមុខតំណែងតួនាទីការងារល្អទាំងនៅក្នុងវិស័យរដ្ឋនិងឯកជន។
ឯកឧត្តមបណ្ឌិត យង់ ពៅ ក្នុងនាមឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានលើកឡើងជាក់ស្តែងថា បច្ចុប្បន្ន មន្ត្រីរាជបណ្ឌិត្យ សភាកម្ពុជាដែលបានទទួលការបណ្តុះបណ្តាលនៅរាជបណ្ឌិត្យ សភាកម្ពុជាតាមរូបមន្ត«យកស្លឹកត្នោតខ្ចប់ស្ករត្នោត»របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានវិវត្តន៍ខ្លួនពីមន្ត្រីក្លាយទៅជាថ្នាក់ដឹកនាំវិទ្យាស្ថាននិងអង្គភាពឧបសម្ព័ន្ធរបស់រាជបណ្ឌិត្យសភាកម្ពុជា ហើយបាននិងកំពុងបញ្ចេញសមត្ថភាពបំពេញការងារស្រាវជ្រាវតាមចំណេះជំនាញរបស់ខ្លួនបម្រើជូនស្ថាប័ន និងសង្គមជាតិយ៉ាងសកម្ម។ ឯកឧត្តមបណ្ឌិតលើកឈ្មោះថ្នាក់ដឹកនាំ៥រូបដែលបានសិក្សារៀនសូត្រថ្នាក់បណ្ឌិតនៅរាជបណ្ឌិត្យសភាកម្ពុជា ហើយបានក្លាយជាថ្នាក់ដឹកនាំស្ថាប័នរួមមាន៖ ១. ឯកឧត្តមបណ្ឌិត យង់ ពៅ ជំនាញវិទ្យាសាស្ត្រនយោបាយមានតួនាទីជាអគ្គលេខាធិការរាជ បណ្ឌិត្យ សភាកម្ពុជា ២. ឯកឧត្តមបណ្ឌិត គិន ភា ជំនាញវិទ្យាសាស្ត្រនយោបាយមានតួនាទីជាប្រធានវិទ្យាស្ថានទំនាក់ទំនងអន្តរជាតិកម្ពុជា ៣. ឯកឧត្តមបណ្ឌិត មាឃ បូរ៉ា ជំនាញសិលាចារឹកមានតួនាទីជាប្រធានវិទ្យាស្ថានភាសាជាតិ ៤. ឯកឧត្តមបណ្ឌិត នុត សម្បត្តិ ជំនាញវិទ្យាសាស្ត្រសុខាភិបាលមានតួនាទីជាប្រធានវិទ្យាស្ថានជីវសាស្ត្រ វេជ្ជសាស្ត្រ និងកសិកម្ម និង៥. ឯកឧត្តមបណ្ឌិត ផុន កសិកា ជំនាញបុរាណវិទ្យាមានតួនាទីជាប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា។
ផ្អែកតាមរូបមន្ត«យកស្លឹកត្នោតខ្ចប់ស្ករត្នោត» រាជបណ្ឌិត្យសភាកម្ពុជាបាននិងកំពុងបន្តបណ្តុះបណ្តាលធនធានមនុស្សបន្ថែមទៀត ដើម្បីចូលរួមចំណែកអភិវឌ្ឍស្ថាប័ន និងសង្គមជាតិឱ្យកាន់តែរីកចម្រើនប្រកបដោយនិរន្តរភាព ថែមទៀត។
ជាមួយនេះ ឯកឧត្តមបណ្ឌិតអគ្គលេខាធិការរាជបណ្ឌិត្យសភាកម្ពុជាបានក្រើនរម្លឹកថ្នាក់ដឹកនាំនិងមន្ត្រីរាជបណ្ឌិត្យសភាកម្ពុជាទាំងអស់នូវអភិក្រមរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាថា៖«ទ្រឹស្តីផ្សារភ្ជាប់នឹងការអនុវត្ត ចងភ្ជាប់ដោយលទ្ធផល ហើយត្រូវមានក្រមសីលធម៌វិជ្ជាជីវៈ»។
ក្នុងន័យនេះ ឯកឧត្តមបណ្ឌិតអគ្គលេខាធិការបានក្រើនរម្លឹកថ្នាក់ដឹកនាំ និងមន្ត្រីទាំងអស់ឱ្យគោរពវិន័យ និងខិតខំប្រឹងប្រែងបំពេញការងារជូនស្ថាប័ន និងសង្គមជាតិ ដើម្បីបន្សល់កេរ្តិ៍ឈ្មោះ និងកិត្តិយសឱ្យស័ក្តិសមនៅក្នុងស្ថាប័នបណ្តុះបណ្តាលនិងស្រាវជ្រាវវិទ្យាសាស្ត្រជាន់ខ្ពស់របស់ជាតិ៕ ដោយ៖បញ្ញាស័ក្តិ