បាត់ដំបង៖ ឯកឧត្តម ស្រេង វង្សហៀងប្រធានក្រុមការងារគណបក្សប្រជាជនកម្ពុជាចុះជួយឃុំព្រះផុស បានមានប្រសាសន៍ថាការជួសជុលស្ដារប្រឡាយទាំង២ខ្សែនេះ ព្រោះមានសភាពតូចមិនទាន់មានលូដាក់ត្រឹមត្រូវ ហើយសុំជំរុញអាជ្ញាធរស្រុក ជួយពន្លឿនការស្ដារ ហើយត្រូវពិនិត្យមើលនូវផលប៉ះពាល់និងដោះស្រាយជូនពលរដ្ឋ កុំឲ្យពួកគាត់មានការអាក់អនចិត្ត ។
អាជ្ញាធរតាមបណ្ដាស្រុកក្នុងខេត្តបាត់ដំបង បានចាប់ផ្ដើមពិនិត្យនិងធ្វើការស្ដារកែលម្អឡើងវិញ នូវប្រព័ន្ធធារាស្ត្រតូចធំនានា ដែលបានរងការប៉ះពាល់ដោយជំនន់ទឹកភ្លៀងកន្លងទៅថ្មីៗនេះ ដើម្បីជាប្រយោជន៍ដល់ការប្រើប្រាស់របស់ពលរដ្ឋនិងនាំទឹកទៅស្រោចស្រពដំណាំកសិកម្មផ្សេងៗ ជាក់ស្ដែងអាជ្ញាធរស្រុកគាស់ក្រឡដែលជាស្រុកមួយតែជួបបញ្ហាគ្រោះរាំងស្ងួត និងបានជួបបញ្ហាទឹកជំនន់នៅចុងរដូវវស្សានេះ។ ដោយមានការជួយឧបត្ថម្ភជ្រោមជ្រែង ពីក្រុមការងារថ្នាក់ជាតិចុះមូលដ្ឋានចុះជួយស្រុកនេះ ក៏បាននិងកំពុងធ្វើការពិនិត្យលទ្ធភាពស្ដារប្រឡាយ ដើម្បីនាំទឹកយកទៅតំបន់មួយចំនួនដែលតែងតែខ្វះទឹកប្រើប្រាស់នោះ។
លោក ញឹក សារ៉ែន អភិបាលស្រុកគាស់ក្រឡស្តីទី បានមានប្រសាសន៍ថា ទឹកជំនន់នៅឆ្នាំ២០២០នេះ បានប៉ះពាល់ជាច្រើនទៅលើដំណាំកសិកម្ម ផ្ទះសម្បែង ផ្លូវថ្នល់ រួមទាំងប្រឡាយតូចធំនៅក្នុងឃុំមួយចំនួន និងហេដ្ឋារចនាសម្ព័ន្ធរងផលប៉ះពាល់និងខូចខាតនោះ តម្រូវឲ្យអាជ្ញាធរត្រូវធ្វើការស្ដារឡើងវិញ ដើម្បីជាប្រយោជន៍ដល់ពលរដ្ឋបានប្រើប្រាស់។ ការស្ដារនេះ មានការជួយឧបត្ថម្ភថវិកាទាំងស្រុងពីក្រុមការងារចុះជួយឃុំព្រះផុស ដែលជាជំហានដំបូង។អាជ្ញាធរស្រុកនឹងស្ដារប្រឡាយចំនួន២ខ្សែ សរុបប្រវែង ២៦០០ម៉ែត្រស្ថិតក្នុងឃុំព្រះផុស ដែលប្រឡាយទាំង២នេះនឹងអាចនាំទឹកពីផ្នែកខាងលើ យកទៅផ្គត់ផ្គង់ពលរដ្ឋក្នុងភូមិមួយចំនួន ដែលតែងតែខ្វះទឹកប្រើប្រាស់នៅរដូវប្រាំង។
ឯកឧត្តម ស្រេង វង្សហៀង ប្រធានក្រុមការងារគណបក្សប្រជាជនកម្ពុជា ចុះជួយឃុំព្រះផុស មានប្រសាសន៍ថា ការជួសជុលស្ដារប្រឡាយទាំងពីរខ្សែនេះ ព្រោះមានសភាពតូចមិនទាន់មានលូដាក់ត្រឹមត្រូវ ហើយសុំជំរុញអាជ្ញាធរស្រុក ជួយពន្លឿនការស្ដារ ហើយក៏ត្រូវពិនិត្យមើលនូវផលប៉ះពាល់ និងដោះស្រាយជូនពលរដ្ឋ កុំឲ្យពួកគាត់មានការអាក់អនចិត្ត។
គួរបញ្ជាក់ថា ក្នុងនាមតំណាងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចុះទៅចែកអំណោយដល់ពលរដ្ឋចំនួន ៣០០គ្រួសារ ក្នុងឃុំព្រះផុស អំណោយនេះដែលទទួលការឧបត្ថម្ភពីសមាគមខ្មែចិន ត្រកូលលឹម កាលពីថ្ងៃទី០៥ខែវិច្ឆិកា ឆ្នាំ២០២០៕ ដោយ៖អ៊ុងសារុំ
