សេដ្ឋី និងជាម្ចាស់ហាងលក់គ្រឿងអលង្ការមាស&ពេជ្រ តាមអនឡាយយីហោ «ថងស៊ីវ៉ាឡៃ» នៅក្នុងប្រទេសថៃ ដែលមានឈ្មោះថា Teerachai Kongthong ឬហៅថា “Gigi Pipo” បានកំពុងធ្វើឲ្យកក្រើកពិភពអ៊ីនធឺណិត ជាមួយការរិះគន់យ៉ាងចាស់ៗដៃ ពីសំណាក់ប្រជាពលរដ្ឋថៃយ៉ាងច្រើន ក្រោយពីបានឃើញពិធីបំបួស និងក្បួនដង្ហែនាគដ៏គគ្រឹកគគ្រេងរបស់បុគ្គលម្ចាស់ហាងរូបនេះ ប្រៀបដូចស្តេចឡើងគ្រងរាជសម្បត្តិអ៊ីចឹង។
ព្រឹត្តិការណ៍ដ៏មហាអស្ចារ្យយ៉ាងនេះ ត្រូវបានដឹងថាត្រូវបានធ្វើឡើងកាលពីថ្ងៃទី៣, ៥ ខែវិច្ឆិកា ឆ្នាំ២០២០ កន្លងទៅថ្មីៗនេះ នៅក្នុងភូមិប្រជុំជន គឿឡង ស្រុក បានណង ខេត្តយ៉ាឡា ប្រទេសថៃ។
អ្វីដែលធ្វើឲ្យមហាជនមានការចាប់អារម្មណ៍ខ្លាំងៗនោះ គឺថាព្រឹត្តិការណ៍ដ៏ញាក់សាច់នេះត្រូវបានធ្វើឡើងហាក់មិនដូចពិធីបំបួសទូទៅនោះទេ តែផ្ទុយទៅវិញគឺដូចពិធីៈ ស្តេចឡើងគ្រងរាជសម្បត្ដិ ឬ ពិធីដង្ហែស្រីស្នំថ្វាយស្តេច អង្គុយក្នុងរថយន្តដ៏ទំនើបស្ព័រ Porche ពណ៌លឿង និងស្លាកលេខក្រហមដ៏អស្ចារ្យ ដោយមានមនុស្សម្នាចូលរួមហែហមយ៉ាងអធិកអធមតែម្តង។ ហើយបើតាមសាម៉ីខ្លួនផ្ទាល់បានបញ្ជាក់ឲ្យដឹងញាក់សាច់ថា កម្មវិធីបួសនេះខ្លួនបានចំណាយអស់ទឹកប្រាក់ចំនួន 100 លានបាត (ប្រហែលជាង ៣ លានដុល្លារ) ប៉ុន្តែបួសតែមួយអាទិត្យទេ។
តែយ៉ាងណា នាយកការិយាល័យពុទ្ធសាសនាយ៉ាឡា បានចេញមកបញ្ជាក់ថា ពិធីបួសនាគរបស់ Teerachai ត្រូវបានអនុញ្ញាតឲ្យធ្វើតាមច្បាប់ត្រឹមត្រូវ។ ប៉ុន្តែ ក៏សូមស្នើដល់មហាជនបញ្ឈប់ការផុសរាល់រូបភាពទាំងនោះទៀតទៅ។
គួរបញ្ជាក់ឲ្យដឹងផងដែរថា Gigi Pipo ដែលមានឈ្មោះពិត Teerachai Kongthong គឺជាបុគ្គលល្បីល្បាញម្នាក់ ត្រូវបានចាត់រកស៊ីអនឡាយបោកប្រាស់ ដោយធ្លាប់មានជនរងគ្រោះប្រមាណជាង ៥ពាន់នាក់ បានកើតទុក្ខមិនសុខចិត្តចេញមកដាក់ពាក្យបណ្តឹងជាបន្តបន្ទាប់ និងរងបទចោទប្រកាន់២ករណីកាលពីឆ្នាំ២០១៨ និង២០១៩ រឿងរកស៊ីលក់មាស&ពេជ្រ បោកប្រាស់គេឡាយតាមហ្វេសប៊ុក ដោយអួតសុទ្ធតែទឹកសុទ្ធ ៩៩,៩៩%៕ ដោយ៖ លឹម ហុង