ភ្នំពេញ៖នគរបាលនៃមន្ទីរប្រឆាំងបទល្មើសគ្រឿងញៀន បង្ក្រាបបានករណីមានខ្សែរយៈចាត់តាំង ជួញដូរគ្រឿងញៀនឆ្លងដែន ចូលពីប្រទេសឡាវមកកម្ពុជា ដោយចាប់ខ្លួនជនល្មើសម្នាក់រួមជាមួយវត្ថុតាងថ្នាំញៀនជាង ៣គីឡូក្រាម។
អនុវត្តតាមបញ្ជា ឯកឧត្តម នាយឧត្ដមសេនិយ៍ សន្តិបណ្ឌិត អគ្គស្នងការនគរបាលជាតិ និង ឯកឧត្តម នាយឧត្ដមសេនិយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន កាលពីថ្ងៃទី ០៣ខែ វិច្ឆិកា ឆ្នាំ២០២០ វេលាម៉ោង ២០និង ៤៥នាទី កម្លាំងជំនាញ(ក៨) នៃ មន្ទីរប្រឆាំងបទល្មើសគ្រឿងញៀន ដឹកនាំដោយលោក ឧត្តមសេនីយ៍ទោ វ៉ាន់ កុសល នាយករងមន្ទីរ សហការជាមួយកម្លាំងជំនាញ នៃស្នងការដ្ឋាននគរបាលរាជធានីភ្នំពេញ ព្រមទាំងមានការសម្របសម្រួល ពីលោក សឿង មុនីរត្ន័ ព្រះរាជអជ្ញារង នៃអយ្យការអមសាលាដំបូងរាជធានីភ្នំពេញ បានស្រាវជ្រាវ និងបង្ក្រាបករណីជួញដូរដោយខុសច្បាប់នូវសារធាតុញៀន នៅរាជធានីភ្នំពេញ ចំណុចបណ្តោយផ្លូវបេតុង ក្បែររង្វង់ មូលនាងមច្ឆា សង្កាត់ជ្រោយចង្វា ខណ្ឌជ្រោយចង្វា។
ជាលទ្ធផលឃាត់ខ្លួនជនសង្ស័យ ០១នាក់ឈ្មោះ សឿន ពិសិដ្ឋ ភេទប្រុស អាយុ ២២ឆ្នាំ ជនជាតិ ខ្មែរ ។ វត្ថុតាងចាប់យកបាន: គ្រឿងញៀន សរុប ៣១១១.០៧ ក្រាម ក្នុងនោះ-សារធាតុញៀនប្រភេទមេតំហ្វេតាមីន(ICE) ទម្ងន់ ៣១១០ក្រាម -អ៊ិចស្តាស៊ី(MDMA)ទម្ងន់ ១.០៧ក្រាម -ជញីងថ្លឹងគ្រឿងញៀន ០១គ្រឿង ៕ ដោយ៖បញ្ញាស័ក្តិ
