ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា សម្តេចបានទទួលដំណឹងដ៏គួរឱ្យសោកស្តាយមួយថា មានអង្គរក្សម្នាក់ អាយុ ៣១ឆ្នាំជាជនជាតិខ្មែរ ដែលការពារផ្ទាល់គណៈប្រតិភូហុងគ្រី ពេលធ្វើទស្សនកិច្ចផ្លូវការនៅកម្ពុជាបានឆ្លងវីរុសកូវីដ១៩។
សម្តេចតេជោ បានប្រកាសអំពាវនាវ នៅព្រលប់ថ្ងៃទី៧ ខែវិច្ឆិកា ឆ្នាំ២០២០ ឱ្យអ្នកពាក់ព័ន្ធទាំងអស់យកចិត្តទុកដាក់ធ្វើចត្តាឡីស័ក ឱ្យបានហ្មត់ចត់។ លទ្ធផលធ្វើតេស្តរបស់អង្គរក្សរូបនោះ បានបង្ហាញនៅថ្ងៃទី៧ ខែវិច្ឆិកានេះថា រូបគេមានវិជ្ជមានវីរុសកូវីដ១៩។
អង្គរក្សម្នាក់នោះ មានអាយុ ៣១ឆ្នាំ ជាអង្គរក្សការពារផ្ទាល់ជូនប្រតិភូ ដែលមានអាសយដ្ឋាននៅសង្កាត់អូរបែកក្អម ខណ្ឌ សែនសុខ រាជធានីភ្នំពេញ។ រូបគេចេញរោគសញ្ញាក្តៅខ្លួន ដោយមានកំដៅ ៣៦,៤ អង្សារសេ, រមាស់បំពង់កបន្តិច និងក្អកបន្តិចបន្តួច គាត់ពាក់មាស់ជាប់ពេលរួមដំណើរជាមួយគណៈប្រតិភូ ពេលនេះគាត់កំពុងធ្វើចត្តាទ្បីស័ក។
សម្តេចតេជោ ហ៊ុន សែន បានចាត់ទុកថា នេះជាព័ត៌មានដ៏គួរឱ្យសោកស្តាយ និងជាគ្រោះធំមួយ។ សម្តេចបានអំពាវនាវដល់អ្នកដែលបានទាក់ទងផ្ទាល់ជាមួយរដ្ឋមន្ត្រីក្រសួងការបរទេសហុងគ្រី ឱ្យយកចិត្តទុកដាក់ឱ្យបានខ្លាំងក្លា ក្នុងការធ្វើចត្តាឡីស័ក ហើយអំពាវនាវឱ្យក្រសួងពាក់ព័ន្ធជាពិសេសក្រសួងសុខាភិបាល ត្រូវតាមដានចំពោះអ្នកធ្វើចត្តាឡីស័កឱ្យបានច្បាស់លាស់។
សម្តេចតេជោ ហ៊ុន សែន បានអំពាវនាវដល់អ្នកដែលមានការពាក់ព័ន្ធទាំងអស់រួមគ្នាជម្នះនូវឧបសគ្គនេះ ហើយត្រូវរក្សាអនាម័យ ក៏ដូចជាអនុវត្តឱ្យបានម៉ឺងម៉ាត់ តាមវិធានការសុខាភិបាល។
សម្តេចតេជោ ហ៊ុន សែន ក៏បានបញ្ជាឱ្យ លោក ឃួង ស្រេង អភិបាលរាជធានីភ្នំពេញ ពិភាក្សាជាមួយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីរៀបចំកន្លែងឱ្យបានសមរម្យ ដើម្បីធ្វើចត្តាឡីស័កដល់អ្នកពាក់ព័ន្ធទាំងអស់ ដែលមិនមានលទ្ធភាពធ្វើចត្តាឡីស័ក ដោយការចំណាយទាំងអស់រាជរដ្ឋាភិបាលជាអ្នករាប់រង៕
បើតាមសារអំពាវនាវរបស់សម្តេចតេជោ ហ៊ុន សែន ដូចតទៅ៖ “ខ្ញុំសូមជម្រាបដល់ថ្នាក់ដឹកនាំរបស់យើងទាំងអស់ ឲ្យបានជ្រាបថា ខ្ញុំបានទទួលដំណឹងដ៏គួរឱ្យសោកស្ដាយ ឥឡូវនេះបញ្ហាបានមកដល់ហើយអង្គរក្សដែលការពារផ្ទាល់គណៈប្រតិភូការបរទេសរបស់ហុងគ្រី ត្រូវបានពិនិត្យឃើញថាមានវិជ្ជមានកូវីដ១៩ រួចស្រេចទៅហើយ ដូច្នេះតាមរយៈនេះខ្ញុំសូមអំពាវនាវចំពោះបងប្អូនទាំងអស់ ដែលមានការទាក់ទងផ្ទាល់ ជាពិសេសបានចាប់ដៃនឹងទាក់ទងផ្ទាល់ជាមួយនឹងរដ្ឋមន្ត្រីការបរទេសហុងគ្រី គួរយកចិត្តទុកដាក់មែនទែន ទៅលើបញ្ហាការធ្វើចត្តាឡីស័ក និងការប៉ះពាល់ទៅលើអ្នកដទៃ។ អ្នកមានការពាក់ព័ន្ធផ្ទាល់ និងអ្នកមានការពាក់ព័ន្ធដែលចូលទៅកៀកផ្ទាល់ ក៏ដូចជាបានមកជួបផ្ទាល់ ជាមួយក្រុមគ្រួសារគាត់ត្រូវគ្រប់គ្រងកូនចៅឲ្យបានហ្មត់ចត់ ជៀវាងការចល័តពីកន្លែងមួយទៅកន្លែងមួយ ដែលមានការធ្វើឲ្យឆ្លងចូលក្នុងសហគមន៍។ ខ្ញុំចាត់ទុកថានេះជាបញ្ហាធ្ងន់ធ្ងរសម្រាប់រាជធានីភ្នំពេញរបស់យើង ដោយខ្ញុំសុំស្នើឱ្យអាជ្ញាធររាជធានីភ្នំពេញ ក៏ដូចជាវិស័យសុខាភិបាលនិងអំពាវនាវដល់គ្រប់ក្រសួងស្ថាប័ន ដែលគ្រប់គ្រងមន្ត្រីបុគ្គលិក ក៏ដូចជាស្ថាប័នព័ត៌មានទាំងឡាយ ដែលគ្រប់គ្រងព័ត៌មានបុគ្គលិកត្រូវយកចិត្តទុកដាក់បន្ថែមទៀត តាមដានចំពោះអ្នកដែលត្រូវធ្វើចត្តាឡីស័កឲ្យបានហ្មត់ចត់ បើមិនដូច្នោះទេ ហាននិភ័យនិងមានខ្ពស់បំផុត សម្រាប់ប្រទេសយើងនៅក្នុងកាលៈទេសៈនេះ ចាត់ទុករឿងនេះជាបញ្ហាដ៏ធំនៅក្នុងវិស័យសុខភាពសាធារណៈរបស់យើង ដែលមិនធ្លាប់មានក្នុងរយៈពេល ១០ ខែកន្លងមកនេះ ពីព្រោះមនុស្សប្រមាណជាង ៩០០ នាក់ ដែលរាប់ទាំងកូនប្រពន្ធនៅតាមផ្ទះ មានបញ្ហានេះ ដូច្នេះខ្ញុំសូមស្នើឲ្យយកចិត្តទុកដាក់ប្រុងប្រយ័ត្ន ខ្ញុំមិនធ្វើការប្រកាសដាក់ប្រទេសក្នុងគ្រាអាសន្នទាំងស្រុង ឬផ្នែកណាមួយនោះទេ ហើយខ្ញុំក៏មិនរាំងទៅលើដំណើរចំពោះអ្នកដែលមិនពាក់ព័ន្ធនោះដែរ ប៉ុន្តែខ្ញុំស្នើឲ្យអ្នកណាក៏ដោយយកចិត្តទុកដាក់ទៅលើបញ្ហាការការពារ នៅក្នុងកាលៈទេសៈ ដែលយើងមិនទាន់មានភាពច្បាស់លាស់នេះ ដោយធ្វើការពាក់ម៉ាសនឹងរក្សាគម្លាតសុវត្ថិភាព ឱ្យបានហ្មត់ចត់ តាមការណែនាំរបស់ក្រសួងសុខាភិបាល សូមរួមគ្នាចាប់ផ្ដើមពាក់ម៉ាស រៀបចំអនាម័យនៅក្នុងរយៈពេលពីរអាទិត្យខាងមុខនេះ មុននឹងចេញលទ្ធផលមក បន្ទាប់ពីការធ្វើតេស្តជាបន្តបន្ទាប់ ហើយខ្ញុំចាត់ទុកថាបញ្ហានេះ ជាបញ្ហាធ្ងន់ធ្ងរមួយនៅក្នុងប្រទេសរបស់យើងខ្លួនខ្ញុំក៏ត្រូវបន្តធ្វើការធ្វើចត្តាឡីស័ក នឹងការធ្វើតេស្តហ្មត់ចត់ ប៉ុន្តែអ្វីដែលសំខាន់ខ្ញុំសូមអំពាវនាវឲ្យអ្នកដែលចូលពាក់ព័ន្ធផ្ទាល់ និងប្រយោល រាប់ទាំងក្រុមគ្រួសារ ដែលមានការពាក់ព័ន្ធ សូមយកចិត្តទុកដាក់កុំធ្វើការចល័ត ពីកន្លែងមួយទៅកន្លែងមួយឲ្យសោះ និងសូមរក្សានៅសុវត្ថិភាពសម្រាប់ខ្លួនឯង និងសម្រាប់កូនចៅយើង និងអ្នកដែលនៅជុំវិញខ្លួន។ ខ្ញុំសង្ឃឹមថាយើងនឹងជំនះបានការលំបាកនៅក្នុងកាលៈទេសៈ ដែលសភាពការណ៍តម្រូវឲ្យយើងត្រូវតែចាត់វិធានការចាំបាច់ ដោយខានពុំបាន ទោះបីជាខ្ញុំកំពុងស្ថិតធ្វើចត្តាឡីស័ក ក៏ខ្ញុំនៅបន្តតាមដាន និងបញ្ជាលើបញ្ហានេះបន្តទៀត ប៉ុន្តែសុំឲ្យមានកិច្ចសហការពីអ្នក ដែលជាប់ពាក់ព័ន្ធ និងក៏សូមឲ្យអាជ្ញាធរមានសមត្ថកិច្ចតាមដានសម្រាប់អ្នកដែលធ្វើចត្តាឡីស័ក ក្នុងករណីដែលមានការចាំបាច់សូមឲ្យសាលារាជធានីភ្នំពេញ ជួលនៅសណ្ឋាគារណាមួយដើម្បីដាក់សម្រាប់បងប្អូនដែលពុំមានលទ្ធភាព ធ្វើចត្តាឡីស័កនៅក្នុងផ្ទះ ដើម្បីឲ្យពួកគាត់អាចទៅរស់នៅធ្វើចត្តាឡីស័ក នៅទីនោះបានស្រួលហើយរដ្ឋយើងនឹងទទួលបន្ទុក ក្នុងការចំណាយទៅលើការជួលសណ្ឋាគារនៅទីនោះ សូមឯកឧត្តមឃួង ស្រេង ធ្វើការជាមួយឯកឧត្តម ម៉ម ប៊ុនហេង លោកជំទាវយក់ សម្បត្តិ ដើម្បីជ្រើសរើសយកសណ្ឋាគារណាមួយ ហើយប្រមូលបងប្អូនរាប់ទាំងអ្នកសារព័ត៌មានទាំងឡាយ ដែលខ្វះលទ្ធភាពធ្វើចត្តាឡីស័ក ដោយខ្វះផ្ទះសម្បែងយកទៅធ្វើចត្តាឡីស័ក នៅតាមសណ្ឋាគារសូមចាត់ការជាបន្ទាន់ ដោយសារតែផ្នែកខាងសុខាភិបាល ក៏មានបញ្ជារួចស្រេចទៅហើយ ដូច្នេះសូមចាត់ការជាបន្ទាន់ ខ្ញុំនឹងបញ្ជូនសារនេះ ទៅកាន់បណ្ដាញសារព័ត៌មាន ដើម្បីធ្វើការផ្សព្វផ្សាយផងដែរ៕
ដោយ៖បញ្ញាស័ក្តិ
