ភ្នំពេញ៖ បន្ទាប់ពីមានករណីមេធាវីម្នាក់ស្លាប់មកនោះ ក្រសួងសុខាភិបាល បានចេញសេចក្តីសម្រេច ស្តីពីការបិទមន្ទីរសម្រាកព្យាបាល លី ស្រីវីណា ដោយយោងរបាយការណ៍បស់ក្រុមការងារត្រួតពិនិត្យសេវាឯកជន នៃក្រសួងសុខាភិបាល ចុះថ្ងៃទី០២ ខែវិច្ឆិកា ឆ្នាំ២០២០ និងយោងរបាយការណ៍របស់គណៈគ្រូពេទ្យជាតិ ចុះថ្ងៃទី០៦ ខែវិច្ឆិកា ឆ្នាំ២០២០។
ក្រសួងសុខាភិបាល សម្រេច បិទមន្ទីរសម្រាកព្យាបាលឯកជនឈ្មោះ លី ស្រីវីណា ដែលមានទីតាំងនៅផ្ទះលេខ៣៣៩A ផ្លូវលេខ១៦៣ សង្កាត់ទួលទំពូងទី២ ខណ្ឌចំការមន រាជធានីភ្នំពេញ របស់លោកវេជ្ជបណ្ឌិត ស៊ុយ ប៊ុនថន ជាអ្នកទទួលខុសត្រូវមន្ទីរសម្រាកព្យាបាល លី ស្រីវីណា ដោយមូលហេតុ ពុំមានលក្ខណៈសម្បត្តិគ្រប់គ្រាន់ក្នុងការផ្តល់សេវាសង្គ្រោះអ្នកជំងឺ។ ត្រូវទុកជាមោឃៈនូវសេចក្តីសម្រេចលេខ ១៩៤/១៩ អបស/មព ចុះថ្ងៃទី២៩ ខែវិច្ឆិកា ឆ្នាំ២០១៩ របស់ក្រសួងសុខាភិបាល ។ អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាលរាជធានីភ្នំពេញ និង លោកវេជ្ជបណ្ឌិត ស៊ុយ ប៊ុនថន ត្រូវអនុវត្តសេចក្តីសម្រេចនេះឱ្យមានប្រសិទ្ធភាព ។ សេចក្តីសម្រេចនេះមានប្រសិទ្ធភាពចាប់ពីថ្ងៃចុះហត្ថលេខានេះតទៅ។
សូមបញ្ជាក់ថា មន្ត្រីរបស់មន្ទីរសុខាភិបាលរាជធានីភ្នំពេញ សហការជាមួយ និងអាជ្ញាធរខណ្ឌចំការរមន បានចុះបិទអាជីវកម្មគ្លីនិក លី ស្រីវីណា ក្រោយពីបានព្យាបាលបណ្តាលឲ្យលោកមេធាវី ទេព ពៅ អាយុ៤៦ឆ្នាំ បាត់បង់ជីវិត នៅពេលដែលលោកមានអាការចុកពោះ ហើយចូលមកព្យាលបាល កាលពីវេលាម៉ោង២ និង១៥នាទីយប់ថ្ងៃទី២៩ ខែតុលា ឆ្នាំ២០២០ ហើយពេទ្យចាក់ថ្នាំ និងដាក់សេរ៉ូមឲ្យអស់ចំនួន៣ប្លោក ដល់ម៉ោង៣ និង២០នាទី ប្រហែលជា១ម៉ោងនិង៥នាទី ក៏បាត់បង់ជីវិត ។
ករណីនេះដែរ បានបង្កឱ្យមានការភ្ញាក់ផ្អើលកើតឡើង កាលពីព្រឹកថ្ងៃទី២៩ ខែតុលា ឆ្នាំ២០២០ នៅចំណុចគ្លីនិក លី ស្រីវីណា ដែលមានទីតាំងនៅចំណុចផ្លូបលេខ១៦៣ កែងផ្លូវលេខ ៤៧២ ក្នុងសង្កាត់ទួលទំពូងទី២ ខណ្ឌចំការមន ។ ជនរងគ្រោះឈ្មោះ ទេព ពៅ អាយុ ៤៦ឆ្នាំ មានតួនាទីជាមេធាវី មានទីលំនៅភូមិកំពង់ឃ្លាំង ឃុំ កំពង់ឃ្លាំង ស្រុកជីក្រែង ខេត្តសៀបរាប។ ជនរងគ្រោះដោយមានអាការចុកពោះ ក៏បានជិះម៉ូតូកង់បីមកចូលសម្រាកព្យាបាលនៅគ្លីនិក លី ស្រីវីណា ដោយក្រុមគ្រូពេទ្យបានចាក់ថ្នាំ និងដាក់សេរ៉ូមឲ្យអស់ចំនួន៣ប្លោក តែក្នុងរយៈពេល១ ម៉ោង និង០៥នាទីនោះមិនដឹងជាមូលហេតុអ្វីក៏បណ្តាលឲ្យលោកបាត់បង់ជីវិតចោលនារីជាគូរដណ្តឹង ដែលនៅតែ ២ខែទៀតដល់ថ្ងៃការ ។
បន្ទាប់ពីមានករណីនេះកើតឡើង កម្លាំងមានសមត្ថកិច្ចមូលដ្ឋាន និងជំនាញកោសល្យវិច័យរបស់ស្នងការនគរបាលរាជធានីភ្នំពេញ បានចុះទៅដល់ធ្វើកោសល្យវិច័យទៅលើសាកសពរបស់លោកមេធាវីបានបញ្ជាក់ថា «ជនរងគ្រោះមានជំងឺបេះដូង ហើយខាងក្រុមគ្រួសារធ្វើការសម្របសម្រួលជាមួយ និងគ្លីនិកដោយទាមទារសំណងចំនួន ៤ម៉ឺនដុល្លារ និងបញ្ចប់ត្រឹម៣ម៉ឺនដុល្លារ និងដឹកសាកសពកទៅធ្វើបុណ្យនៅវត្តសំពៅមាសនៅវេលាថ្ងៃត្រង់ថ្ងៃដដែល៕ដោយ៖បញ្ញាស័ក្តិ
