សៀមរាប ៖ កម្លាំងការិយាល័យប្រឆាំងបទល្មើសបច្ចេកវិទ្យា បានធ្វើការឃាត់ខ្លួនជនសង្ស័យម្នាក់ពីបទ ឆបោកលើបណ្ដាញទំនាក់ទំនងសង្គម ដោយបានធ្វើសកម្មភាពលក់ដូរគ្រឿងអង្ការ (ខ្សែកមាស និងបន្តោង) ទៅឲ្យជនរងគ្រោះម្នាក់ ជាពលករកូរ៉េ តាមបណ្ដាញទំនាក់ទំនងសង្គម រួចមិនបានធ្វើការប្រគល់អីវ៉ាន់ឲ្យទៅជនរងគ្រោះតាមការសន្យា។
នគរបាលបានបញ្ជាក់ថា ជនសង្ស័យឈ្មោះ ភ័ន្ត ភក្ដី អាយុ ២៨ ឆ្នាំ មានស្រុកកំណើត ភូមិកណ្ដាល ឃុំសន្លុង ស្រុកខ្សាច់កណ្ដាល ខេត្តកណ្ដាល ដើម្បីកសាងសំណុំរឿងបញ្ជូនទៅសាលាដំបូងខេត្តសៀមរាប តាមបញ្ជារបស់ ឯកឧត្ដមព្រះរាជអាជ្ញាអមសាលាដំបូងខេត្តសៀមរាប ពាក់ព័ន្ធនឹងករណីឆបោក ប្រព្រឹត្តលើបណ្ដាញទំនាក់ទំនងសង្គម នៅថ្ងៃទី ៦ ខែវិច្ឆិកា ឆ្នាំ២០២០ វេលាម៉ោង ១៤និង០០ នាទី ។
តាមការឲ្យដឹងរបស់សមត្ថកិច្ចជំនាញបានបញ្ជាក់ថា កាលពីថ្ងៃទី៧ ខែកក្កដា ឆ្នាំ២០២០ ជនសង្ស័យបានធ្វើសកម្មភាពលក់ដូរគ្រឿងអង្ការ (ខ្សែកមាស និងបន្តោង) ទៅឲ្យជនរងគ្រោះឈ្មោះ សាំង វីរុន ភេទប្រុស អាយុ ៣២ ឆ្នាំ ( ជាពលករកូរ៉េ ) តាមបណ្ដាញទំនាក់ទំនងសង្គម រួចមិនបានធ្វើការប្រគល់អីវ៉ាន់ឲ្យទៅជនរងគ្រោះតាមការសន្យា ។
បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តតាមនីតិវិធីច្បាប់បន្ត ៕ដោយ៖បញ្ញាស័ក្តិ
