ខេត្តកែប៖ រដ្ឋបាលខេត្តកែប បានឲ្យដឹងថា រសៀលថ្ងៃសៅរ៍ ទី៧ ខែវិច្ឆិកា ឆ្នាំ២០២០ ដោយប្រើយុទ្ធសាស្ត្រ ឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម សោម ពិសិដ្ឋ អភិបាល នៃគណៈបាលខេត្តកែប និងឯកឧត្ដម ដួង តារា ជំនួយការសម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា និងជាអនុរដ្ឋលេខាធិការទីស្តីការគណៈរដ្ឋមន្ត្រី បានដោះស្រាយវិវាទដីធ្លី នៅភូមិថ្មី សង្កាត់ព្រៃធំ ក្រុងកែប ដែលអូសបន្លាយជាង១០ឆ្នាំមកហើយ រវាងម្តាយ និងកូនបង្កើត ត្រូវបានកញ្ចប់ ដោយភាគីទាំងពីរព្រមទទួលយកដំណោះស្រាយបែបឈ្នះឈ្នះទាំងសងខាង ដោយបញ្ចប់លែងមានការប្តឹងតវាទៀត។
ព្រមជាមួយនោះ ឯកឧត្តមអភិបាលខេត្ត និងឯកឧត្តម ដួង តារា បានប្រគល់ចុងសន្លឹងការវាស់វែង ដើម្បីត្រៀមធ្វើប័ណ្ណកម្មសិទ្ធិសម្គាល់អចលនទ្រព្យ ជូនភាគីទាំងពីរ ។
ឯកឧត្តមអភិបាលខេត្ត បានអំពាវនាវដល់បងប្អូនប្រជាពលរដ្ឋដែលមានជម្លោះផ្ទៃក្នុងគ្រួសារ សូមដោះស្រាយគ្នាដោយសន្តិវិធី មនោសញ្ចេតនាកុំដើម្បីតែចិត្តមានះ និងផលប្រយោជន៍ផ្ទាល់ខ្លួននាំឲ្យបែកបាក់មនោសញ្ចេតនាសាច់ញាតិគ្រួសារយើង ។
លោកដួង តារា ជំនួយការសម្តេចតេជោ ហ៊ុន សែន នាយករដ្ឋមន្ត្រី បានថ្លែងថា អរគុណសន្តិភាព អរគុណសម្តេចតេជោថ្ងៃនេះ ម្តាយនិងកូនស្រីបង្កើតបានទទួលបង្កាន់ដៃដីរួចហើយនៅខេត្តកែប។
លោកថា កាលពីព្រឹកមិញ ក្រោយពីខ្ញុំបានធ្វើការងារបច្ចេកទេសលើទីតាំងវិវាទរបស់ក្រុមហ៊ុន Today Bokor Development និង លោក មាស ប៊ុនឡី រួចហើយ ខ្ញុំក៏បានមកចូលរួមជាមួយ លោកអភិបាលខេត្តកែប សោម ពិសិដ្ឋ ប្រគល់បង្កាន់ដៃដីជូន លោក យាយ ម៉ក់ ស៊ូន អាយុ៧៤ឆ្នាំ និងកូនស្រីបង្កើតគាត់ជាគ្រូបង្រៀនឈ្មោះ អ៊ុក ពុទ្ធី អាយុ ៥០ឆ្នាំ (មានប្តីជាមន្ត្រីអប់រំក្រុងកែប) ដែលធ្លាប់មានវិវាទដីធ្លីរាំរ៉ៃជាមួយម្តាយបង្កើតអស់រយៈពេលជាង ៩ឆ្នាំមកហើយ (នៅទីតាំងភូមិ ថ្មី សង្កាត់ព្រៃធំ ក្រុង កែប ខេត្ត កែប លើផ្ទៃដីចំនួន១៥,៣២៦ម២) ។
លោកបញ្ជាក់ផងដែរថា ” វិវាទរ៉ាំរ៉ៃខាងលើ ខ្ញុំបានសហការរួមគ្នាដោះស្រាយជាមួយលោកអភិបាលខេត្ត អភិបាលរង ចៅហ្វាយក្រុងកែប និងមន្ត្រីសុរិយោដីខេត្តកែប សម្របសម្រួលដោះស្រាយបញ្ចប់វិវាទក្រៅប្រព័ន្ធតុលាការ កាលពីថ្ងៃទី ១៩ កក្កដា ២០២០ កន្លងទៅ។ នៅរសៀលថ្ងៃនេះទី ៧ វិច្ឆិកា ២០២០ ខ្ញុំនិងលោកអភិបាលខេត្តកែប បានប្រគល់បង្កាន់ដៃដីជូនភាគីទាំង២រួចហើយ។ ប័ណ្ណរឹងនឹងធ្វើហើយក្នុងកំឡុងពេល១អាទិត្យទៀត។ សូមអរគុណមន្ត្រីខេត្តកែបទាំងអស់ ដែលបានសហការរួមដៃគ្នាដោះស្រាយវិវាទជូនបងប្អូនប្រជាពលរដ្ឋយើង។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និង សូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង”៕ ដោយ៖បញ្ញាស័ក្តិ
