តាកែវ ៖ នៅព្រឹកថ្ងៃទី៩ ខែវិច្ឆិកា ឆ្នាំ២០២០ រដ្ឋបាលខេត្តតាកែវបានប្រារព្ធខួបលើកទី៦៧ នៃទិវាបុណ្យឯករាជជាតិ ៩ វិឆ្ឆិកា ១៩៥៣- ៩ វិឆ្ឆិកា ២០២០ និង ទិវាកំណើតកងយោធពលខេមរភូមិន្ទដែលបានតស៊ូយ៉ាងជោគជ័យក្នុងការរំដោះទឹកដីចេញផុតពីនឹមត្រួតត្រារបស់អាណានិគមនិយមបារាំង ។
ទិវានេះបានប្រារព្ធធ្វើឡើងនៅវិមានឯករាជ្យខេត្ត ឋិតក្នុងក្រុដូនកែវ ក្រោមអធិបតីភាព ឯកឧត្តម អ៊ូច ភា អភិបាលនៃអភិបាលខេត្តតាកែវ រួមជាមួយនិងថ្នាក់ដឹកនាំមន្ត្រីរាជការទូរទាំងខេត្ត និងកងកំលាំងប្រដាប់អាវុធទាំង៣ប្រភេទ និងមានការនិមន្តចូលរួមពីសំណាក់ព្រះសង្ឃព្រះមេគណខេត្ត លោកគ្រូអ្នកគ្រូសិស្សានុសិស្ស និង ប្រជាពលរដ្ឋផងដែរ។
បើតាមសន្ទរកថាស្តីពីប្រវត្តិសង្ខេបព្រះរាជបូជនីកិច្ច ទាមទារឯករាជ្យនៅកម្ពុជា ដែលមានខ្លឹមសារថា៖ ខួបលើកទី៦៧ ទិវាបុណ្យឯករាជ្យជាតិ ៩វិច្ឆិកា ២០២០នេះ ដើម្បី រំលឹកនូវព្រះរាជបេសកកម្ម នៃការដឹកនាំ របស់សម្ដេចព្រះនរោត្តម សីហនុ ព្រះមហាវរក្សត្រ ព្រះរាជបិតាឯករាជ្យបូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ដែលទ្រង់បានលះបង់ព្រះកាយពល និងព្រះបញ្ញាញាណយ៉ាងខ្លាំងខ្លាបំផុតធ្វើការតស៊ូក្នុងក្របខ័ណ្ឌ នៃព្រះរាជបូជនីយកិច្ចដើម្បីទាមទា ឯករាជ្យជាតិអោយប្រទេសកម្ពុជាបានរួចផុតពីអាណានិគមនិយមបារាំង ហើយប្រកាសឯករាជ្យជាតិ នៅថ្ងៃ៩ ខែវិច្ឆិកា ឆ្នាំ១៩៥៣ វីរៈភាពដ៏អង់អាចក្លាហាននេះគឺជាគំរូដ៏ល្អដល់កូនខ្មែរ ជំនាន់ក្រោយ ក្នុងការកសាងការពារបូរណភាព និង ទិវាកំណើតកងយោធពលខេមរភូមិន្ទ ក្នុងស្មារតីចងចាំជានិច្ចមិនអាចបំភ្លេចបាននូវគុណូបការៈ ដ៏ថ្លៃង្លារបស់វីរយុទ្ធជនយុទ្ធនារី និង ប្រជាពលរដ្ឋយើងនៅគ្រប់ទិសទី ដែលបានពុះពារប្រយុទ្ធតស៊ូធ្វើពលិកម្ម អាយុជីវិត យ៉ាងអង់អាចក្លាហានបំផុត ដើម្បីសង្គ្រោះជាតិ មាតុភូមិពីរបបប្រល័យពូជសាសន៍ពីភ្នក់ភ្លើងសង្គ្រាមគ្រោះកាចចង្រៃផ្សេងៗព្រមទាំងបានរួមចំណែកយ៉ាងធំធេងក្នុងការការពារទឹកដី អធិបតេយ្យ សេរីភាព សន្តិភាព និង វិបុលភាពជាតិនៃព្រះរាជាណាចក្រកម្ពុជា ។
ក្នុងនោះដែរឯកឧត្តម អ៊ូច ភា អភិបាលខេត្តតាកែវ អំពាវនាវដល់សមាជិក សមាជិកាអង្គមិទិ្ទញទាំងអស់ក្នុងទិវាខួបលើក ទី៦៧នៃទិវាបុណ្យឯករាជ្យជាតិ និងទិវាកំណើតកងយោធពលខេមរភូមិន្ទ ឲប្រែក្លាយជាកម្លាំងមហាសាមគ្គីជាតិដ៏ខ្លាំងក្លា ដើម្បីរក្សាបានសុខសន្តិភាពអោយបានគង់វង្ស ចូលរួមចំណែកកសាង អភិវឌ្ឍន៍ ប្រទេសជាតិអោយកាន់តែទទួលបានសមិទ្ធផលថ្មីៗថែមទៀត ។
ជាចុងបញ្ចប់នៃពិធី ក៏មានការអ៊ុចធូបគោរពដល់វិញ្ញាណខ័ណ្ឌបុព្វបុរស និងលែងព្រាប បង្ហោះប៉ែងប៉ោង ដើម្បីចូលរួមអបអរសាទរនៃទិវាបុណ្យឯករាជ្យជាតិផងដែរ ៕ ដោយ៖តាកែវ
