សៀមរាប៖ កម្លាំងនគរបាលឃាត់ខ្លួន ជនសង្ស័យម្នាក់ពាក់ព័ន្ធករណីមនុស្សឃាតដោយចេតនា នៅថ្ងៃទី៩ ខែវិច្ឆិកា ឆ្នាំ២០២០ វេលាម៉ោង១និង០០នាទី នៅបន្ទប់ផ្ទះជួលម្តុំខាងក្រោយសាលារៀនបន្ទាយចាស់ ស្ថិតភូមិចុងកៅស៊ូ សង្កាត់ស្លក្រាម ក្រុងសៀមរាប។
ជនសង្ស័យឈ្មោះ ខឿន វីឡា ភេទប្រុស អាយុ២៨ឆ្នាំ មុខរបរកម្មករសំណង់ ជាឪពុកចុង មានស្រុកកំណើត ភូមិជ្រៃធំ ឃុំជ្រៃធំ ស្រុកខ្សាច់កណ្តាល ខេត្តកណ្តាល ត្រូវជាឪពុកចុងបានយកកាំបិត បុ័ងតោ អារកកូនពីខាងក្រោយ បណ្តាលឲ្យស្លាប់ ក្រោយពេលបញ្ជូនទៅដល់មន្ទីរពេទ្យគន្ធបុប្ផា។
តាមការឱ្យដឹងរបស់សាក្សីឈ្មោះ ឌឿ សុផា ភេទស្រី អាយុ២១ឆ្នាំ មុខរបរលក់ដូរ រស់នៅកន្លែងកើតហេតុខាងលើ ត្រូវជាម្តាយក្មេងរងគ្រោះបានឲ្យដឹងថា ខណៈពេលដែលកំពុងបោកខោអាវ ស្រាប់តែឮសំឡេងកូនស្រែក ពេលស្ទុះមកមើល ក៏ឃើញប្តីកំពុងកាន់កាំបិតអារកកូនដែលដេកផ្កាប់មុខនៅលើគ្រែ ហើយស្រែកឲ្យគេជួយ និងយកកូនទៅពេទ្យ។ ចំណែកឯជនសង្ស័យបានជិះកង់គេចខ្លួន តែត្រូវសមត្ថកិច្ចតាមចាប់ខ្លួនបានមកវិញ ហើយធ្វើតេស្តរកសារធាតុញៀនគឺវិជ្ជមាន។ បច្ចុប្បន្ន ជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីអនុវត្តតាមនីតិវិធីច្បាប់បន្ត ៕
ដោយ៖បញ្ញាស័ក្តិ
