កាលពីសប្តាហ៍មុន មហាជននៅលើបណ្តញសង្គម ពិតជាមានការភ្ញាក់ផ្អើល និងបង្ហាញអារម្មណ៍ខ្មាសអៀនជាខ្លាំង ក្រោយពីបានឃើញជនបរទេសម្នាក់ដែលមានគណនីហ្វេសប៊ុកឈ្មោះ Stevo Kaske បានបង្ហោះរូបថតដេកហាលថ្ងៃជាមួយមិត្តស្រី នៅលើគំនរសំរាមមាត់សមុទ្រកំពតមួយកន្លែង ហើយបានភ្ជាប់សារបង្ហោះផ្លែផ្កាឲ្យប្រជាជនខ្មែរជាភាសាអង់គ្លេស «We found this beautiful beach, PM met for location» ដែលឃ្លានេះមានន័យថា៖ «ពួកយើងបានរកឃើញឆ្នេរសមុទ្រដ៏អាថ៌កំបាំង និងស្រស់ស្អាតមួយ! អាចផ្ញើសារមកខ្ញុំ ប្រសិនបើអ្នកចង់ដឹងពីទីតាំងច្បាស់»។
ទោះយ៉ាងណា ដោយពុំឃើញមានអ្នកណាសម្អាត ស្រាប់តែរំលងបានមួយសប្តាហ៍ក្រោយ បុរសជនជាតិបរទេសរូបនោះ រួមទាំងមិត្តភក្តិជាច្រើននាក់ បានមកសំអាត រួចបង្ហោះរូបភាព និងសាររៀបរាប់បញ្ចាក់នៅលើបណ្តាញសង្គមហ្វេសប៊ុកតាមរយៈគណនីហ្វេសប៊ុកឈ្មោះ Kenny Kemedy ដោយប្រែជាភាសាខ្មែរមានន័យយ៉ាងដូច្នេះថា៖ «បេសកកម្មចោរសមុទ្រកំពតសម្អាតសំរាម! មួយសប្តាហ៍មុនយើងបានធ្វើដំណើរចុះតាមច្រាំងសមុទ្រនេះ នៅពេលនោះយើងពិតជាស្រងាកចិត្តជាខ្លាំង នៅពេលឃើញឆ្នេរពោរពេញដោយគំនរសំរាមដ៏កខ្វក់បែបនេះ។ ខ្ញុំមិនច្បាស់ទេថាតើសំរាមទាំងនោះរសាត់អណ្តែតចេញមកពីប្រភពណា ប៉ុន្ដែវាគួរឱ្យស្អប់ខ្ពើមណាស់។ ដូច្នេះប្រហែលមួយសប្តាហ៍ យើងបានត្រឡប់មកឆ្នេរនេះវិញ ដើម្បីសម្អាតវា! នេះគឺជារូបថតនិងវីដេអូនៃថ្ងៃនេះ។
ខ្ញុំពិតជារីករាយដែលបានឃើញជនជាតិខ្មែរក្នុងស្រុកមួយចំនួន បានសហការចូលរួមជាមួយយើង ក្នុងការសម្អាត ហើយខ្ញុំសង្ឃឹមថាពួកគេនឹងរក្សាឆ្នេរស្អាត។
ឥឡូវនេះយើងជាចោរសមុទ្រកំពត! ឆ្នេរខ្សាច់កខ្វក់ដ៏គួរគ្រោះថ្នាក់! យើងកំពុងមករកអ្នកហើយ!»។
ក្រោយពីបានឃើញបែបនេះ ខ្មែរជាច្រើនពិតជាសម្តែងនូវការខ្មាសអៀន និងអាម៉ាសមុខជំនួសយ៉ាងខ្លាំងព្រោះថា បរិស្ថានដ៏កខ្វក់ ម្ចាស់ប្រទេសមិនខ្វល់ បែរជាទៅជាភ្ញៀវទេសចរមកសម្អាតឲ្យទៅវិញ ដោយសារតែពួកគេទើសភ្នែកពេក៕ ដោយ៖ លឹម ហុង
