ភ្នំពេញ ៖ នគរបាលខណ្ឌព្រែកព្នៅ ឃាត់ខ្លួនសង្ស័យ២នាក់ ពាក់ព័ន្ធកាន់កាប់ និងដឹកជញ្ជូនអាវុធដោយគ្មានការអនុញ្ញាត ហើយបានបញ្ជូនទៅការិយាល័យនគរបាលព្រហ្មទណ្ឌកម្រិតធ្ងន់។ បច្ចុប្បន្ន ជនសង្ស័យទាំង២នាក់ខាងលើ ការិយាល័យបានរៀបចំនីតិវិធីបញ្ជូនទៅសាលាដំបូងរាជធានីភ្នំពេញចាត់ការតាមច្បាប់។
អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី៩ ខែវិច្ឆិកា ឆ្នាំ២០២០ ការិយាល័យនគរបាលព្រហ្មទណ្ឌកម្រិតធ្ងន់ បានទទួលជនសង្ស័យចំនួន ១នាក់ឈ្មោះ សេង សៀងហា ហៅជ្រូក ភេទប្រុស អាយុ២៩ឆ្នាំ ជនជាតិខ្មែរ រួមនឹងអាវុធម៉ាកបេរឺតា លេខM50935Z ចំនួន១ដើម ដែកកាច់កម៉ូតូចំនួន១ ពីអធិការដ្ឋាននគរបាលខណ្ឌព្រែកព្នៅ ឃាត់ខ្លួន នៅចំណុចយឿលក់ត្រីភូមិពោធិ៍មង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ពីបទកាន់កាប់និងដឹកជញ្ជូនអាវុធដោយគ្មានការអនុញ្ញាត កាលពីថ្ងៃទី៩ ខែវិច្ឆិកា ឆ្នាំ ២០២០ ហើយបញ្ជូនជនសង្ស័យមកកាន់ការិយាល័យនគរបាលព្រហ្មទណ្ឌកម្រិតធ្ងន់ ។
ដោយអនុវត្តវិធានការជំនាញ និងមានការសម្របសម្រួលពីលោក គុជ គឹមឡុង ព្រះរាជអាជ្ញារងអមសាលាដំបូងរាជធានីភ្នំពេញ នៅវេលាម៉ោង១៥និង០០នាទីថ្ងៃដដែល កម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់បាននាំខ្លួន ឈ្មោះ ឈាង ដាវីត ហៅវីតភេទ ប្រុស អាយុ១៩ឆ្នាំ ជនជាតិខ្មែរ ទីលំនៅបច្ចុប្បន្នផ្ទះជួលភូមិព្រៃសាលាសង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ មុខរបរ មិនពិតប្រាកដ ត្រូវបានឃាត់ខ្លួននៅចំណុចស្តុបផ្សារសេនជូរីផ្លាហ្សា សង្កាត់កាកាប២ ខណ្ឌពោធិ៍សែនជ័យ ។
ក្រោយការសាកសួរជនសង្ស័យបានសារភាពថា នៅថ្ងៃទី១ ខែតុលា ឆ្នាំ២០២០ ខ្លួននិងបក្ខពួក ឈ្មោះភ័ក្ត្រ(គេចខ្លួនមានសាវតារជាតិ) បានធ្វើសកម្មភាពគាស់ផ្ទះនៅភូមិដំណាក់ សង្កាត់គោកឃ្លាង ខណ្ឌសែនសុខ យកបានអាវុធម៉ាកបេរឺតាចំនួន១ដើម អាយផេត១ ប្រាក់៤០០ដុល្លារ ចំណែកអាវុធម៉ាកបេរឺតាខ្លួនបានយកទៅលក់ឲ្យឈ្មោះជ្រូ (សេង សៀងហា) តម្លៃ៦០០ដុល្លារ តែឈ្មោះជ្រូក ពុំទាន់មានលុយឲ្យនៅឡើយ៕ដោយ៖បញ្ញាស័ក្តិ
