អូស្ត្រាលីកំពុងពិចារណាបើកព្រំដែនរបស់ខ្លួនទៅកាន់បណ្តាប្រទេសអាស៊ី រួមទាំងផ្នែកខ្លះនៃប្រទេសចិនផងដែរ ខណៈដែលទីក្រុងកង់បេរ៉ាព្យាយាមស្តារសេដ្ឋកិច្ចដែលញាំញីដោយវីរុសកូវីដ១៩។ នេះបើយោងតាម លោកនាយករដ្ឋមន្ត្រីអូស្ត្រាលី ស្កត់ ម៉ូរីសុន (Scott Morrison)។
ប្រទេសអូស្ត្រាលីកាលពីខែមីនា បានបិទព្រំដែនរបស់ខ្លួនចំពោះពលរដ្ឋដែលមិនមែនជាពលរដ្ឋអូស្ត្រាលីនិងអ្នករស់នៅជាអចិន្ត្រៃយ៍ ទោះបីជានៅក្នុងខែតុលាទីក្រុងកង់បេរ៉ាបានអនុញ្ញាតឱ្យប្រជាជននូវែលសេឡង់ចូលក៏ដោយ។
ការធ្វើដំណើរនៅខាងក្នុងមានកម្រិត ទោះបីជាការរឹតត្បិតទាំងនោះត្រូវបានគេគ្រោងនឹងដកចេញនៅដំណាច់ឆ្នាំក៏ដោយ។
ម៉ូរីសុនបានហាមឃាត់អ្នកដំណើរមកពីសហរដ្ឋអាមេរិកឬអឺរ៉ុប ប៉ុន្តែបាននិយាយថាអូស្ត្រាលីអាចអនុញ្ញាតឱ្យប្រជាជនពីកន្លែងដែលមានហានិភ័យទាប ដូចជា តៃវ៉ាន់ ជប៉ុន សិង្ហបុរី និងសូម្បីតែខេត្តនានានៅក្នុងប្រទេសចិន។
លោក ម៉ូរីសុន បានប្រាប់អ្នកយកព័ត៌មាននៅ កង់បេរ៉ា (Canberra) ថា៖« យើងកំពុងពិនិត្យមើល ថាតើការរៀបចំបែបណាដែលអាចកើតឡើង ដើម្បីនាំភ្ញៀវទេសចរតាមរយៈការរៀបចំដាច់ការដាក់ឲ្យនៅដាច់ដោយឡែកនៃភ្ញៀវទេសចរសម្រាប់ប្រទេសដែលមានហានិភ័យទាប” ។ ប្រទេសចិនគឺជាប្រទេសមួយក្នុងចំណោមប្រទេសដំបូងគេ ដែលប្រទេសអូស្ត្រាលីបានរឹតត្បិតការចូល។
ការពិចារណាលើការបន្ធូរបន្ថយការទប់ស្កាត់ការធ្វើដំណើរកើតឡើងនៅពេលដែលលោក Morrison បាននិយាយថា អូស្ត្រាលីបានឆ្លងកាត់រយៈពេល ៣ ថ្ងៃហើយ ដោយគ្មានករណីកូវីដ១៩ ដែលបានចម្លងនៅក្នុងតំបន់។ គ្រប់ករណីទាំងអស់ត្រូវបានគេរកឃើញនៅក្នុងតំបន់ដាច់ពីគ្នា ដែលភាគច្រើនពួកគេទើបត្រឡប់មកពីបរទេស។
ការធ្វើឱ្យវិស័យទេសចរណ៍មានភាពរស់រវើកឡើងវិញ គឺជាការជំរុញដែលត្រូវការជាចាំបាច់ដល់សេដ្ឋកិច្ចអូស្ត្រាលីដែលបានធ្លាក់ចុះ ៧ ភាគរយក្នុងរយៈពេល ៣ ខែ ដែលបានបញ្ចប់នៅក្នុងខែមិថុនា ដែលជាចំនួនច្រើនបំផុតចាប់តាំងពីកំណត់ត្រាបានចាប់ផ្តើមក្នុងឆ្នាំ ១៩៥៩ ។
ទិន្នន័យរបស់រដ្ឋាភិបាលបានបង្ហាញថាវិស័យទេសចរណ៍ក្នុងឆ្នាំ ២០១៩ មានចំនួន ៣,១ ភាគរយនៃផលិតផលក្នុងស្រុកសរុបរបស់ប្រទេស ដែលបានរួមចំណែកជិត ៦១ ពាន់លានដុល្លារអូស្ត្រាលី (៤៤,៤២ ពាន់លានដុល្លារ) ដល់សេដ្ឋកិច្ច។
ទោះបីជាប្រជាជនអូស្ត្រាលីជាច្រើន កំពុងឈប់សម្រាកនៅតាមមូលដ្ឋានក៏ដោយក៏ប្រតិបត្តិករទេសចរណ៍ជាច្រើនកំពុងតស៊ូនិងត្រូវបានបញ្ឈប់បុគ្គលិក។ ទិន្នន័យផ្លូវការបានបង្ហាញថា ភាពអត់ការងារធ្វើបានកើនឡើងដល់ ៦,៩ ភាគរយនៅក្នុងខែកញ្ញា។
លោក Morrison បាននិយាយថាអូស្ត្រាលីនឹងពង្រីកអត្ថប្រយោជន៍ភាពអត់ការងារធ្វើខ្ពស់ជាងមុនរហូតដល់ដំណាច់ខែមីនាទោះបីក្នុងអត្រាមួយទាបក៏ដោយ។ បច្ចុប្បន្នអ្នកអត់ការងារធ្វើទទួលបាន ៨១៥ ដុល្លាររៀងរាល់ ២ សប្តាហ៍ ប៉ុន្តែនេះនឹងធ្លាក់ចុះដល់ ៧១៥ ដុល្លារអូស្ត្រាលីនៅចុងខែធ្នូ៕
ដោយ៖CEN
