ភ្នំពេញ៖ ដូចដែលប្រិយមិត្ត និងមហាជនយ៉ាងច្រើន បានស្គាល់ និងល្បីឈ្មោះជាយូរឆ្នាំមកហើយ ពីមហាសេដ្ឋីដែលជោគជ័យលើមុខជំនួញធំៗជាច្រើននៅស្រុកខ្មែរ គឺអ្នកឧកញ៉ា គិត ម៉េង ដែលគេកម្រឃើញលោកបង្ហោះសារពីនេះពីនោះ ឬ សកម្មភាពលេងសើចនៅលើបណ្តាញសង្គមនោះឡើយ។
តែយ៉ាងណា សម្រាប់ពេលនេះនេះ អ្នកឧកញ៉ា គិត ម៉េង បានក្លាយជា Idol សម្រាប់មនុស្សជាច្រើននៅលើបណ្តាញសង្គម បន្ទាប់ពីលោកបានបង្កើតហ្វេសប៊ុកផ្លូវការ និងបង្ហោះសារបង្ហាញពីអារម្មណ៍ពិតលើកដំបូងទទួលបានភាពជោគជ័យមកទល់ពេលនេះ គឺដោយសារតែមានការជំរុញជាកម្លាំងចិត្តដ៏ធំធេងពីក្រុមគ្រួសារប្រកបដោយសុភមង្គល។
ដោយឡែកថ្មីៗនេះ អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប ក៏បានធ្វើឲ្យហ្វេនៗភ្ញាក់ផ្អើលជាថ្មី ខណៈលោកបានឡើងបកស្រាយបទចម្រៀងរួមគ្នាជាមួយភរិយាជាទីស្រឡាញ់លោក ជំទាវ ស្រីតូច ចំណាន នៅក្នុងកម្មវិធីមួយ។ ដោយបទចម្រៀងនោះមានចំណងជើងថា “ស្នេហ៍លើពសុធា” ដែលជាបទរបស់លោកតា ស៊ីន ស៊ីសាមុត និង លោកយាយ រស់ សេរីសុទ្ធា។
ក្រោយបានស្តាប់រួចមក មហាជនបានសរសើរដល់អ្នកទាំងពីរជាខ្លាំង ហើយអ្វីដែលពិសេសនោះ គឺលោក ជំទាវ ស្រីតូច ចំណាន ពុំត្រឹមតែស្រស់ស្អាតប៉ុណ្ណោះទេ ហើយថែមទាំងរក្សាបាននូវទឹកដមសំឡេងពីរោះខ្លាំងដដែល៕ ដោយ៖ លឹម ហុង
