ភ្នំពេញ៖ សេះត្រូវបានចាត់ទុកជាប្រភេទសត្វដឹកជញ្ជូនពោរពេញដោយកម្លាំង និងភាពស៊ូអំណត់ខ្លាំងណាស់ ពោលគឺវាអាចមានសមត្ថភាពរត់អូសរទេះរាប់គីឡូដី។ ប៉ុន្តែ ទន្ទឹមនេះ ប្រសិនបើម្ចាស់មិនផ្តល់ចំណីគ្រប់គ្រាន់ និងមើលថែឲ្យបានដិតដល់ នោះវាក៏អាចបាក់កម្លាំងពុំអាចបម្រើដល់ម្ចាស់បានដែរ។ តែយ៉ាងណា មុខរបរបររទេះសេះ នាពេលបច្ចុប្បន្ននេះ គេសង្កេតឃើញថាពុំសម្បូរដូចមុនទៀតទេ ព្រោះថាសម័យដ៏ជឿនលឿនេះ អ្នកប្រកបមុខរបរដឹកជញ្ចូនពឹងដោយកម្លាំងសត្វ បានផ្លាស់មកប្រើប្រាស់គ្រឿងម៉ាស៊ីនសឹងតែគ្រប់ផ្ទះទៅហើយ។
យ៉ាងណាមិញ វីដេអូដ៏រន្ធត់មួយនេះ ដែលបង្ហាញពីសត្វសេះ១ក្បាល ត្រូវម្ចាស់បង្ខំឲ្យអូសរទេះដឹកឈើទម្ងន់រាប់តោនរហូតដាច់ខ្យល់ងាប់តាមផ្លូវយ៉ាងអាណោចអាធមបំផុត បានបង្ករលកកំហឹងយ៉ាងខ្លាំងក្លា ពីអ្នកដែលស្រឡាញ់អាណិតសត្វ ព្រោះថា បើទោះគ្នាជាសត្វ តែវាក៏ចង់មានជីវិតរស់ដូចយើងដែរ ដែលមិនគួរណាប្រើគ្នាអូសទម្ងន់ដ៏ហួសប្រមាណបែបនេះ។
ក្នុងនោះ មហាជនជាច្រើនបានបង្ហាញកំហឹងឈឺចាប់ និងសម្តែងនូវក្តីអាណិតអាសូរជាពន់ពេក ចំពោះសត្វសេះដ៏កម្សត់មួយក្បាលនេះយ៉ាងដូច្នេះថា៖ «អាមនុស្សចិត្តយង់ឃ្នងគ្មានធម៌មេត្តាបន្តិចដល់សត្វ អាងតែគ្នាមិនចេះនិយាយតវ៉ា ទោះបីឈឺអស់កម្លាំងក៏មិនដឹងនិយាយយ៉ាងណា មើលសេះទៅស្គមឃើញតែឆ្អឹង ចេះតែប្រើមិនឲ្យគ្នាស៊ី ប្រើគ្នាហួសពីកម្លាំង លោកអើយឃើញហើយទប់ទឹកភ្នែកមិនជាប់ទេអាណិតណាស់កូន, យកអាម្ចាស់សេះចងវាឲ្យវាអូសវិញទៅ, ប្រើគ្នានោះប្រើពួកអាស្លាប់ទាំងរស់ ! ជេរមួយម៉ាត់ចុះ ! ឈើរាប់សិបតោនចងគ្នាអូសរាល់ថ្ងៃ, សម័យនេះហើយគួរឈប់ប្រើកម្លាំងសត្វទៅបាបកម្ម និងកម្មពៀរណាស់លោកអើយ សន្សំលុយទិញរ៉ឺម៉កម៉ូតូដឹកវិញទៅ ខ្ញុំឃើញហើយខ្លោចចិត្តណាស់, ផុតកម្មពារហើយរស់នាំវេទនា ទៅចាប់កំណើតភពថ្មីដែលល្អជាងនេះចុះ សាធុ សាធុ សាធុ»៕ ដោយ៖ លឹម ហុង
