ភ្នំពេញ៖ ដូចដែលយើងទាំងអស់គ្នា បានទទួលជ្រាបហើយ នាពេលនេះ ជំងឺដ៏កាចសាហាវវាយលុកជាសកល Covid-19 បានចាប់ផ្តើមផ្ទុះឡើងសារជាថ្មី ហើយក្រសួងសុខាភិបាលក៏បានចេញសេចក្តីណែនាំឲ្យប្រជាជនទូទាំងប្រទេស អនុវត្តគម្លាតសុវត្ថិសង្គម និងគម្លាតសុវត្ថិភាពបុគ្គល និងក៏ដូចវិធីបង្ការការពារផ្សេងៗ ដើម្បីទប់ស្កាត់ការចម្លងវីរុសនេះ នៅក្នុងសហគមន៍។
ពិតមែនហើយ ការផ្ទុះឡើងសារជាថ្មី ពីជំងឺកូវីដ១៩ នេះ ឃើញថាពុំត្រឹមតែបង្កហានិភ័យដល់អាយុជីវិតមនុស្សប៉ុណ្ណោះទេ តែវាក៏បានធ្វើឲ្យប្រជាជនទាំងអស់គ្នា ជួបប្រទះនូវការលំបាកក្នុងការប្រកបរបររកស៊ីប្រចាំថ្ងៃផងដែរ។ លើសពីនេះ ជំងឺចម្លងនេះក៏បានបង្កដល់បងប្អូនខ្លះ ត្រូវខកខានធ្វើកម្មពិធីជួបជុំសប្បាយ និងពិធីផ្សេងៗទៀតដូចជាកម្មពិធីបុណ្យ ឬ មង្គលការជាដើម។
ជាក់ស្តែង គូស្រករថ្មីថ្មោងជាគូពេទ្យមួយគូ រស់នៅក្នុងស្រុកក្រគរ ខេត្តពោធិ៍សាត់ ដែលនឹងត្រូវរៀបមង្គលការនៅថ្ងៃទី២១ ខែវិច្ឆិកា ខាងមុខនេះ ក៏បានលើកពេលវិញផងដែរ ដោយសារតែជំងឺកូវីដ១៩នេះ។
នេះបើយោងតាមនារីជាកូនក្រមុំមានគណនីហ្វេសប៊ុកឈ្មោះ Kimmuoy Vann កាលពីល្ងាចថ្ងៃទី១០ ខែវិច្ឆិកា ឆ្នាំ២០២០ ម្សិលមិញនេះ បានបង្ហោះសារជូនដំណឹងដល់ភ្ញៀវកិត្តយសបានជ្រាបថា៖ «ក្នុងនាមយើងខ្ញុំជាម្ចាស់កម្មវិធីសូមអធ្យាស្រ័យដល់ភ្ញៀវកិត្តិយសទាំងអស់ឲ្យបានជ្រាបថា កម្មវិធីមង្គលការយើងខ្ញុំនឹងត្រូវពន្យារពេលវិញ ដោយសារមានការរីករាលដាលម្តងទៀតនៃជំងឺកូវីដ១៩ ហើយក៏ដើម្បីចូលរួមទប់ស្កាត់នៃការឆ្លងនេះផងដែរ»៕ ដោយ៖ លឹម ហុង