ភ្នំពេញ៖ លោកឃួង ស្រេង បានមានប្រសាសន៍ថា៖ ម៉ាសក្រណាត់ទាំង២លាននេះ គឺជាអំណោយរបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រគល់ឱ្យមកសាលារាជធានីភ្នំពេញ តាមរយៈរដ្ឋមន្ត្រីក្រសួងសុខាភិបាល ដើម្បីយកទៅប្រគល់ជូនទៅដល់ប្រជាពលរដ្ឋក្រីក្រ ដែលមិនមានលទ្ធភាពក្នុងការទិញម៉ាកយកមកប្រើប្រាស់ ខណៈដែលជំងឺកូវីដ-១៩ បាននិងកំពុងរាលដាលនៅក្នុងរាជធានីភ្នំពេញ ។
ម៉ាសទាំងនេះ អភិបាលរាជធានីភ្នំពេញ បានប្រគល់បន្តជូនទៅខណ្ឌទាំង១៤និងផ្សារទាំងអស់ នៅក្នុងរាជធានីភ្នំពេញ ប្រគល់ជូនកងរាជអាវុធហត្ថរាជធានីភ្នំពេញ ប្រគល់ជូនស្នងការរដ្ឋាននគរបាលរាជធានីភ្នំពេញ និងដល់ផ្សារនានាក្នុងរាជធានីភ្នំពេញផងដែរ។
ការលើកឡើងរបស់លោកឃួង ស្រេង អភិបាលរាជធានីភ្នំពេញ បានធ្វើឡើងនារាត្រីថ្ងៃទី១១ខែវិច្ឆិកាឆ្នាំ២០២០នេះ ក្នុងពិធីប្រគល់និងទទួលម៉ាសរបស់សម្តេចតេជោហ៊ុន សែន នាយរដ្ឋមន្ត្រីចំនួន២លានម៉ាស ក្រោមវត្តមាន លោកម៉ម ប៊ុនហេង រដ្ឋមន្ត្រីក្រសួងសុខាភិបាល នៅសាលារាជធានីភ្នំពេញ ខណៈដែលជំងឺនេះបានបន្តការឆ្លងក្រោយព្រឹត្តិការណ៍ ថ្ងៃទី៣វិច្ឆិកានៅរាជធានីភ្នំពេញ។
លោកឃួង ស្រេង អភិបាលរាជធានីភ្នំពេញ បានលើកឡើងទៀតថា៖ ប៉ូលិសចរាចរ ដែលដាក់គោលដៅត្រួតពិនិត្យការអនុវត្តច្បាប់ចរាចរណ៍ផ្សេងៗ ក្នុងរាជធានីភ្នំពេញ អាចផាកពិន័យទៅលើអ្នកមិនពាក់មួកសុវត្ថិភាព តែក៏ត្រូវពិនិត្យមើលទៅលើប្រជាពលរដ្ឋផងដែរ បើពួកគាត់ ធ្វើដំណើរតាមដងផ្លូវមិនពាក់ម៉ាសយើងត្រូវប្រគល់ម៉ាសជូនពួកគាត់ ជាមួយនឹងការណែនាំឱ្យពួកគាត់ពាក់ម៉ាសជាប្រចាំ។ លោកឃួង ស្រេង ក៏បានបញ្ជាក់ផងដែរថា៖ សម្ដេចតេជោហ៊ុន សែន តែងយកចិត្តទុកដាក់យ៉ាងខ្លាំង ចំពោះបងប្អូនប្រជាពលរដ្ឋទាំងអស់ ដោយកន្លងមកនេះ សម្ដេចបានជួយប្រជាពលរដ្ឋរងគ្រោះដោយការលិចលង់ដោយទឹកជំនន់ ហើយមកដល់ពេលនេះសម្ដេចនៅបានបន្តចែកម៉ាសជូនប្រជាពលរដ្ឋក្រីក្រថែមទៀត ដើម្បីឲ្យប្រជាពលរដ្ឋមានលទ្ធភាពក្នុងការការពារនូវជំងឺកូវី-១៩ ។
លោកបញ្ជាក់ថា៖ ម៉ាសនេះ អាចប្រគល់ជូនប្រជាពលរដ្ឋម្នាក់២ម៉ាស ដោយម៉ាសនេះអាចបោកគក់បាន ហើយក៏អាចប្រើប្រាស់បានពី ២ខែទៅ៣ខែផងដែរ បើយើងចេះថែរក្សាវាបានល្អ។ លោកអភិបាលក៏បានអំពាវនាវឲ្យបងប្អូនប្រជាពលរដ្ឋទាំងអស់ ត្រូវរួមគ្នាពាក់ម៉ាសការពារទាំងអស់គ្នា ដើម្បីទប់ស្កាត់នូវការឆ្លងនូវជំងឺកូវីដ-១៩ ។
ដោយឡែកលោកម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានធ្វើការអំពាវនាវដល់ប្រជាពលរដ្ឋទាំងអស់រួមគ្នា ទប់ស្កាត់ការឆ្លងនៃជំងឺកូវីដ-១៩នេះ ពិសេសចំពោះអ្នកដែលកំពុងចត្តាឡីស័ក ត្រូវអនុវត្តឱ្យបានត្រឹមត្រូវទៅតាមការណែនាំរបស់លោកគ្រូពេទ្យ ក៏ដូចជាការណែនាំរបស់ក្រសួងសុខាភិបាល ដោយត្រូវនៅដាច់ដោយឡែកពីគេឯង ដើម្បីកុំឲ្យ មានការចម្លងទៅអ្នកដទៃផ្សេងទៀត ៕ដោយ៖បញ្ញាស័ក្តិ