បន្ទាយមានជ័យ ៖ ការិយាល័យព្រហ្មទណ្ឌកងរាជអាវុធហត្ថ ខេត្តបញ្ជូន ជនសង្ស័យពីរនាក់ជាប់ចោទពីបទកាច់កម៉ូតូ និងទទួលទិញផលចោរកម្មទៅសាលាដំបូង ចំណែកជនសង្ស័យពីរនាក់ទៀត ដែលកំពុងរត់គេចខ្លួនត្រូវសមត្ថកិច្ចស្រាវជ្រាវតាមចាប់។
យោងតាមពាក្យបណ្ដឹងចុះថ្ងៃទី១១ ខែវិច្ឆិកា ឆ្នាំ២០២០ របស់ជនរងគ្រោះឈ្មោះ អេង បៀកនី ភេទស្រី អាយុ៣៥ឆ្នាំ រស់នៅភូមិក្បាលស្ពាន២ សង្កាត់/ក្រុងប៉ោយប៉ែត ខេត្ត ប/ជ និងពាក្យបណ្ដឹងឈ្មោះ លន់ ម៉េងទ្រី ភេទប្រុស អាយុ៣៥ឆ្នាំ រស់នៅភូមិមិត្តភាព សង្កាត់/ក្រុងប៉ោយប៉ែត ស្ដីពីករណីបាត់ម៉ូតូ កាលពីថ្ងៃទី៩ ខែវិច្ឆិកា ឆ្នាំ២០២០ នៅចំណុចមុខសណ្ឋាគារ ហាក់ហួត និងចំណុចមុខកាស៊ីណូនាគទិព្វ ក្នុងក្រុងប៉ោយប៉ែត ។
ក្រោយពីបានទទួលពាក្យបណ្ដឹងរួច លោក វរសេនីយ៍ត្រី នួន នីណារ៉ូ មេបញ្ជាការ មូលដ្ឋានកងរាជអាវុធហត្ថ ក្រុង បានដឹកនាំកម្លាំងចុះធ្វើការស្រាវជ្រាវរហូតរកឃើញជនសង្ស័យកំពុងជិះម៉ូតូចំនួន២គ្រឿង មានគ្នា០៣នាក់ ពេលនោះកម្លាំងធ្វើការឃាត់ខ្លួនបាន១នាក់ឈ្មោះ សារុន សារិ ភេទប្រុស អាយុ២៣ឆ្នាំ រស់ភូមិមិត្តភាព សង្កាត់/ក្រុងប៉ោយប៉ែត ខេត្តបន្ទាយមានជ័យ នៅចំណុចវត្តថ្មី ស្ថិតក្នុងភូមិបាលិលេយ្យ២ សង្កាត់/ក្រុងប៉ោយប៉ែត ព្រមទាំងដកហូតបានម៉ូតូ០២គ្រឿង ដែលពួកគេជិ:ធ្វើសកម្មភាព០១គ្រឿង ម៉ាកហុងដាឌ្រីម និង០១គ្រឿងទៀតម៉ាកហុងដាស្យូម័រអិច ពណ៌ឈាមជ្រូក លាយខ្មៅ ផលិតឆ្នាំ២០១៨ ពាក់ផ្លាកលេខ ប/ជ 1R-4165 ដែលជារបស់ជនរងគ្រោះឈ្មោះ អេង បៀកនី ចំណែកជនសង្ស័យ០២នាក់ទៀតបានរត់គេចខ្លួនបាត់។
លោក វរសេនីយ៍ត្រី នួន នីណារ៉ូ បានឱ្យដឹងថា ជនសង្ស័យដែលឃាត់ខ្លួនបាន ត្រូវនាំមកមូលដ្ឋានកងរាជអាវុធហត្ថ ក្រុងដើម្បីសាកសួរចម្លើយ។ ក្រោយពីសួរនាំរួច កម្លាំងបានបន្តឃាត់ខ្លួនជនសង្ស័យម្នាក់ទៀតឈ្មោះ ជួង តុល ហៅតាកាហ្វេ ភេទប្រុស អាយុ៤៥ឆ្នាំ រស់នៅភូមិព្រៃព្រិច សង្កាត់/ក្រុងប៉ោយប៉ែត ដែលជាអ្នក់ទទួលទិញផលចោរកម្ម និងដកហូតម៉ូតូ១គ្រឿង ដែលទិញពីជនសង្ស័យខាងលើ ម៉ាកហុងដាស្គុបពី ពណ៌ឈាមជ្រូក ផលលិតឆ្នាំ២០១២ គ្មានស្លាកលេខ ដែលមានក្នុងពាក្យបណ្ដឹងរបស់ជនរងគ្រោះឈ្មោះ លន់ ម៉េងទ្រី ។
ជនសង្ស័យឈ្មោះ សារុន សារិ បានឆ្លើយសារភាពថា ពួកគេតែងតែធ្វើសកម្មភាពលួចកាច់សោម៉ូតូ ក្នុងក្រុងប៉ោយប៉ែតជាញឹកញាប់ ហើយទៅលក់ឱ្យឈ្មោះ ជួង តុល ដែលជាអ្នកទទួលទិញ ក្រោយពីបានម្លើយសារភាព និងមានវត្ថុតាង ទើបកម្លាំងជំនាញព្រហ្មទណ្ឌកងរាជអាវុធហត្ថ ក្រុងកសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្តចាត់ការបន្ត។ បច្ចុប្បន្នជនសង្ស័យ រួមទាំងវត្ថុតាងម៉ូតូហុងដាឌ្រីមដែលជាមធ្យោបាយប្រព្រឹត្តបទល្មើស ត្រូវបានកម្លាំងជំនាញការិយាល័យព្រហ្មទណ្ឌ អ.ហ ខេត្តបញ្ជូនទៅសាលាដំបូងចាត់ការតាមនីតិវិធី ចំណែកម៉ូតូរបស់ម្ចាស់បណ្ដឹងទាំងពីរត្រូវបានប្រគល់ឱ្យវិញហើយ រីឯជនសង្ស័យ២នាក់ដែលរត់គេចខ្លួន សមត្ថកិច្ចកំពុងធ្វើការស្រាវជ្រាវបន្ត៕ ដោយ៖បញ្ញាស័ក្តិ