ភ្នំពេញ៖ អ្នកស្រី ទ្រី សុផានិត ក្រោយពីត្រូវសមត្ថកិច្ចព្រហ្មទណ្ឌនៃក្រសួងមហាផ្ទៃចាប់ខ្លួនកាលពីព្រឹកមិញ នៅចំណុចផ្លូវលេខ១៨២ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ តាមបណ្តឹងពីលោកស្រី ទ្រី ដាណា ដែលត្រូវជាប្អូនបង្កើតនោះ បានដួលសន្លប់ភ្លាមៗក្រោយបញ្ជូនដល់តុលាកា។
គួរបញ្ជាក់ថា ការឃាត់ខ្លួនលោកស្រី ទ្រី សុផានិត គឺធ្វើឡើងតាមដីកាបង្គាប់ឲ្យនាំខ្លួនរបស់លោក ហម ម៉េងសែ ចៅក្រមស៊ើបសួរសាលាដំបូងរាជធានីភ្នំពេញ ក្រោមការចោទប្រកាន់ពីបទ «បរិហារកេរ្តិ៍ជាសាធារណៈ, ញុះញង់ឲ្យមានការរើសអើង និង អំពើនៃការប្រកួតប្រជែងមិនស្មោះត្រង់» ប្រព្រឹត្តទៅនៅរាជធានីភ្នំពេញ កាលពីឆ្នាំ២០១៨ រហូតដល់ឆ្នាំ២០២០។ ហើយក៏ត្រូវតុលាការចេញដីកាបង្គាប់ឲ្យនាំខ្លួនក្រោយរកឃើញថា ជនត្រូវចោទរូបនេះ មានចេតនាភូតកុហក ស្តែងចេញនូវអត្តចរិតរឹងរូស ប្រឆាំងការបង្គាប់ឲ្យចូលខ្លួនរបស់តុលាការ។
យ៉ាងណាក៏ដោយ តាមរយៈគណនីហ្វេសបុករបស់អ្នកស្រី ទ្រី សុផានិត ដែលបានឡាយកាលពីព្រឹកមិញ កំឡុងត្រូវចាប់ខ្លួនបានឲ្យដឹងថា អ្នកស្រីបានសុំពន្យាពេលចូលសវនាការរួចហើយ ដោយសារបញ្ហាសុខភាព ហើយការចាប់ឃាត់ខ្លួនអ្នកស្រីធ្វើឡើងខណៈអ្នកស្រីកំពុងធ្វើដំណើរទៅកាន់មន្ទីរពេទ្យដើម្បីពិនិត្យសុខភាព៕ ដោយ៖ កូលាប ក្រហម