ភ្នំពេញ៖ដើម្បីទប់ស្កាត់ការចម្លងវីរុសកូវីដ១៩ ក្នុងព្រឹត្តិការណ៍ ៣ វិឆ្ឆិកា ២០២០ សម្តេចព្រះអភិសិរីសុគន្ធាមហាសង្ឃរាជ បួរ គ្រី ស្នើឲ្យរៀបចំឱ្យមានកន្លែងសម្រាប់ត្រួតពិនិត្យសុខភាព មុននឹងអនុញ្ញាតឱ្យចូលទៅក្នុងទីបរិវេណវត្តអារាម ឬកន្លែងបំពេញបុណ្យកុសលនានា ត្រូវមានឧបករណ៍វាស់កម្ដៅ ម៉ាស់ អាល់កុល អាល់កុលដែល ឬសាប៊ូសម្រាប់លាងសម្អាតដៃជាប្រចាំ។
សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា បានចែញព្រះរាជសប្រកាសការអនុវត្តការទប់ស្កាត់ការចម្លងវីរុសកូវីដ-១៩ ក្នុងព្រឹត្តិការណ៍ ៣ វិច្ឆិកា ២០២០។
យោងសេចក្តីណែនាំរបស់ក្រសួងធម្មការ និងសាសនា ស្តីពីការអនុវត្តគម្លាតសុវត្ថិភាពសង្ហើម និងគម្លាត សុវត្ថិភាពបុគ្គលដើម្បីបង្ការ និងទប់ស្កាត់ការចម្លងវីរុសក្ខវីដ-១៩ និងព្រឹត្តិការណ៍ ៣ វិច្ឆិកា ២០២០ និងយោង តាមប្រសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា ដើម្បីបញ្ចៀសពីហានិភ័យដែលពិបាកនឹងប៉ាន់ស្មានបាននៃការចម្លងវីរុសដ៏កាច សាហាវនេះចូលទៅក្នុងសហគមន៍ សម្តេចព្រះមហាសង្ឃរាជ ព្រះរាជាគណៈ ព្រះមេគណរាជធានី ខ្ញុំ សូមពិតប្រគេនសម្តេចព្រះសង្ឃនាយករង -ខេត្ត ព្រះសហការីណគណរាជធានី -ខេត្ត ព្រះអនុគណក្រុង-ស្រុក – ខណ្ឌ ព្រះគ្រូចៅអធិការគ្រប់វត្ត និងភិក្ខុ-សាមណេរគ្រប់ព្រះអង្គទាំងអស់ ត្រូវចូលរួមសហការជាមួយមន្ទីរធម្មការ និងសាសនារាជធានី -ខេត្តបន្តការពារសុខភាពរបស់ខ្លួនគ្រប់ព្រះអង្គ ដោយត្រូវអនុវត្តតាមវិធានការសាមញ្ញៗ ដូចជាការរក្សាគម្លាតសុវត្ថិភាពបុគ្គលជាចាំបាច់ រួមជាមួយនឹងការអនុវត្ត “អនាម័យ ដៃស្អាត ” ជានិច្ច និងពាក់ ម៉ាស់នៅពេលចាំបាច់ ជាពិសេសពេលធ្វើដំណើរ ឬបម្លាស់ពីទីកន្លែងមួយទៅទីកន្លែងមួយទៀត ហើយរួមគ្នា អនុវត្តនូវវិធានការដូចខាងក្រោម៖
១- ចៀសវាង ឬបើចៀសមិនបានត្រូវកាត់បន្ថយ លុបចោល ឬពន្យារពេលឱ្យបានអតិបរិមាផ្លូវការជួបជុំគ្នា ឬក៏ការប្រជុំ និងព្រឹត្តិការណ៍ដែលបង្កឱ្យមានមនុស្សច្រើន។
២- រៀបចំឱ្យមានកន្លែងសម្រាប់ត្រួតពិនិត្យសុខភាព មុននឹងអនុញ្ញាតឱ្យចូលទៅក្នុងទីបរិវេណវត្តអារាម ឬកន្លែងបំពេញបុណ្យកុសលនានា ត្រូវមានឧបករណ៍វាស់កម្ដៅ ម៉ាស់ អាល់កុល អាល់កុលដែល ឬសាប៊ូសម្រាប់លាងសម្អាតដៃជាប្រចាំ។
៣-ត្រូវរក្សាគម្លាតសុវត្ថិភាពពីម្នាក់ទៅម្នាក់ទៀតក្នុងពេល គង់ អង្គុយ ឈរ ឬក៏ឈរជជែកគ្នាត្រូវឃ្លាត ពីគ្នាយ៉ាងតិចមួយម៉ែត្រកន្លះឡើងទៅ។
៤- ត្រូវបន្តបង្កើនការប្រុងប្រយ័ត្នខ្ពស់ និងចូលរួមថែរក្សាសុភាពទាំងអស់គ្នាតាមរយៈការពាក់ម៉ាស់ការពារ លាងសម្អាតដៃរដោយសាប៊ូ ឬអាល់កុល ឬក៏អាល់កុលដែល។
៥- ព្រះមេគណរាជធានី -ខេត្ត ត្រូវធ្វើការណែនាំបន្ថែមទៅដល់ព្រះអនុគណ និងព្រះគ្រូចៅអធិការគ្រប់វត្ត ទាំងអស់ ឱ្យអនុវត្តតាមគោលការណ៍គម្លាតសង្គមឱ្យបានខ្ជាប់ខ្លួន ស្របតាមការណែនាំរបស់ក្រសួង សុខាភិបាល និងសេចក្តីណែនាំនានាក្រសួងធម្មការ និងសាសនា ព្រមទាំងព្រះរាជសង្ឃប្រកាស របស់ព្រះប្រមុខសង្ឃនិកាយធម្មយុត្តខ្មែរគ្រប់ពេលវេលា។
៦- ព្រះមេគណរាជធានី-ខេត្ត ត្រូវសហការយ៉ាងជិតស្និទ្ធបំផុតជាមួយប្រធានមន្ទីរធម្មការ និងសាសនា រាយការណ៍ជាប្រចាំស្តីពី ការទប់ស្កាត់ការរីករាលដាលជំងឺកូវីដ-១៩ មកកាន់គណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា តាមរយៈព្រះរាជលេខាធិការដ្ឋាន នៃសម្ដេច ព្រះមហាសង្ឃរាជ ដែលមានទួរសព្ទលេខ (០១២ ៧៨៩ ៩៥៧ / ០១១ ៦៤៩ ១០១) អំពីស្ថានភាពជំងឺកូវីដ-១៩ តាមវត្តអារាមនីមួយៗ។
សម្តេចព្រះមហាសង្ឃរាជ បានសង្ឃដីកាថា ខ្ញុំ សង្ឃឹមក្នុងព្រះហឬទ័យយ៉ាងមុតមាំថា ព្រះមន្ត្រីសង្ឃគ្រប់ព្រះឋានានុក្រម ទាំងអស់ រួមគ្នាអនុវត្តតាមយ៉ាងខ្ជាប់ខ្លួនបំផុតដើម្បីកម្ពុជាគ្មានជំងឺកូវីដ-១៩៕ដោយ៖បញ្ញាស័ក្តិ