ភ្នំពេញ៖ ពិតមែនហើយ ការចាប់ខ្លួនអ្នកលក់ផលិតផលអនឡាញ ទ្រី សុផានិត ដែលត្រូវបានធ្វើឡើងដោយប្អូនស្រីបង្កើត គឺអ្នកស្រី ទ្រី ដាណា បានបង្កជាព័ត៌មានដ៏ក្តៅគគុក នៅលើបណ្តាញសង្គមកាលពីម្សិលមិញ ជាមួយការមតិវែកញែកខុសត្រូវឡើងចម្រូវចម្រាស់ ពីសំណាក់អ្នកប្រើប្រាស់បណ្តាញសង្គម។ ហើយក្នុងនោះផងដែរ គេក៏សង្កេតឃើញមានមតិភាគច្រើនគាំទ្រលើអ្នកស្រី ទ្រី ដាណា ដែលបានសម្រេចជ្រើសយកផ្លូវច្បាប់មកដោះស្រាយ ដើម្បីបញ្ចប់ជម្លោះបងប្អូនខ្លួនឯងដ៏រ៉ាំរ៉ៃនេះ ជាជាងយកវប្បធម៌ជេរបញ្ចោរគ្នាទៅវិញទៅមក ដែលជាគំរូដ៏អាក្រក់នៅលើប្រព័ន្ធអនឡាញ។
ទាក់ទងនឹងរឿងរ៉ាវប្តឹងផ្តល់ឈានដល់មានការចាប់ខ្លួន ដោយសារតែការជេរបញ្ចោរ ហែកកេរ្តិ៍បងប្អូនខ្លួនឯងជាសាធារណៈខាងលើនេះផងដែរ ក្នុងនោះ គណនីហ្វេសប៊ុកឈ្មោះ «ប៊ុនរឿន ប្រុសស្អាតជ្រោយចង្វារ» ក៏បានធ្វើការលើកឡើង ដែលមានខ្លឹមសារដើមទាំងស្រុងថា៖ «ចូលចិត្តឱបដុំភ្លើង ហើយស្រែកថាក្ដៅ ដូចពាក្យចាស់ថា ដំបៅមិនឈឺ យកឈើទៅរុគ ខ្ញុំសុំនិយាយពាក្យពិត ខ្ពើមហ្មង អ្នករកសុីណា ឡាយអាសអាភាស ដូចគេស្រាត ជាពិសេសអាវប្បធម៍ជេរបញ្ចោរ ហែកគេរ្ត៍ គ្នានឹង ឈប់បានឈប់ទៅ !!!
ខ្ញុំធ្លាប់និយាយ ជាច្រើនដងហើយ កុំអាងតែមានFacebook ឃើញគេ like Share ច្រើន អង្គុយតែពុលទឹកមាត់ ពិតមែនហើយថា យើងមានសិទ្ធិបញ្ចេញមតិ តែសូមកុំបំពានអ្នកដទៃ កុំបំភ្លៃការពិត ហើយជេរបញ្ចោរ ហែកហួង ជីវិតឯកជនគេ ហើយមួយៗអាងអីខ្ញុំនិយាយការពិត តើមានគិតពាក្យខ្លះ វាប៉ះពាល់ជាមួយផ្លូវច្បាប់ទេ ។
ហើយតាំងជំទាលថា ប្ដឹងអីប្ដឹងទៅ យកទៅណា យកទៅ មកពីដឹងពាក្យនឹងខុស ហើយនៅតែបំពាន ទើបនិយាយបែបនឹង ពេលគេប្ដឹងតាំងស្រែកថាអយុត្តិធម៌ណាស់ រកខ្សែទុយោឲ្យជួយ ពេលខ្នងបង្អែកគេដឹងយើងខុស មិនហ៊ានចេញមុខ មានតែក្បាច់ចុងក្រោយ ចុះពីឡានមុខឡើងអឿ ចូលដល់របងតុលាការដួលសន្លប់ ដូចពាក្យចាស់ថា ឃើញគុក បានស្រក់ទឹកភ្នែក ( ឃើញចឹងនឹកឃើញក្រុមពួក បាតុកម្មអាជីព បឹងកក់ ) ឬក៏ថា ខ្មែរដូចគ្នាសោះ បងប្អូនឯងសោះ ចុះបើដឹងខ្មែរដូចគ្នា បងប្អូនឯងសោះ ម៉េចក៏មិនយោគយល់ ឡាយវីដេអូ ជេរ ហែកគេរ្តិ៍ គ្នាធ្វើអី ។
ឃើញគេមិនតបត មិនមាត់ ហើយបាន like share ច្រើនផង ភ្លេចអស់វប្បធម៍ ប្រពៃណី ខ្លួនឯងជាស្រី សំដីដូចហែកសារ៉ុង ដើរកណ្ដាលផ្សារ ។
អ្នកធ្លាប់រងគ្រោះ ទើបយល់អារម្មណ៍ឈឺចាប់មួយនេះ ដែលត្រូវគេលាបពណ៌ និយាយអាក្រក់ ទាំងយើងខំព្យាយាមមិនតបត ខ្ញុំសូមគាំទ្រប្រពន្ធ័ច្បាប់ នឹងបងៗសមត្ថិកិច្ច សូមកុំមានការលើកលែង ចំពោះបុគ្គលធុនៗនឹង ព្រោះទុកក៏មិនចំណេញជាតិដែរ ហើយក៏ដើម្បីបញ្ចប់អាវប្បធម៌ លក់ឡេ លក់ស្អីផ្សេងៗ ក៏ដោយ កុំអោយជេរបញ្ចោរ ហែកហួងគ្នា ចឹងទៀត ខូចអស់វប្បធម៌ជាតិ សេចក្ដីថ្លៃថ្នូរ របស់ស្ត្រី ជាពិសេសជាគំរូមិនល្អ ដល់ក្មេងៗជំនាន់ក្រោយ ។
ហើយក៏សូមសរសើរ បងស្រី ទ្រី ដាណា និងស្វាមី និងបងប្អូនប្រជាជនខ្មែរជាច្រើន ដែលសាងអំពើល្អ កន្លងមក ហើយបានរើសយកផ្លូវច្បាប់ មិនតបត មិនប្រើប្រាស់ហឹង្សា តាមរយៈប្អូនៗមេធាវី ដែលចេះច្បាប់ជ្រៅជ្រះ នេះជាគំរូដ៏ល្អណាស់ ព្រោះបងនឹងគ្រួសារ មិនយកជំរើសជេរបញ្ចោរ តបតគ្នា ធ្វើអោយបរទេសគេមើលងាយ ស្ត្រីខ្មែរ ពេលខ្លះការអត់ធ្មត់ របស់មនុស្សគឺមានព្រំដែន សូមបីតែព្រះសង្ឃខឹងខ្លះ ក៏អោយញោមកាន់បាត ឲ្យអាត្មា វ៉ៃមីចុយម្រាយនឹងម្ដង ។
ជាចុងក្រោយខ្ញុំសូមអង្វរ សូមបងប្អូនចូលរួមគោរពច្បាប់ទាំងអស់គ្នា ល្មមដល់ពេលហើយ ជេរគ្នា គ្រាន់តែរឿងកើបលុយ ធ្វើមានបាន ខ្លួនឯងសោះ ក្នុងនាមជាកូនខ្មែរមួយរូប ខ្ញុំខ្មាសបរទេសណាស់»។
យ៉ាងណាមិញ ក្រោយពីបានឃើញការរៀបរាប់ដ៏មានអត្ថន័យជ្រាលជ្រៅរបស់ម្ចាស់គណនីខាងលើ លោកជំទាវ ហ៊ុន ស៊ីណាត ក៏បានដាក់ប៉ុន្មានឃ្លាបន្ថែមយ៉ាងចាក់ដោតថា៖ «សូមគាំទ្រនៅអត្ថបទក្មួយ100% ម្យ៉ាងទៀតល្មមឈប់ទៅអាវប្បធម៌អន្តរាគមន៍ពីថ្នាក់លើនោះ អ្នកឡាយជេរគេរាប់ម៉ោង ដល់គេប្ដឹង តាំងមានអ្នកលូកដៃអន្តរាគមន៍ទៅឲ្យតុលាការដោះ បើនៅតែមានអាវប្បធម៌ជេររួចខ្លួននោះលប់ច្បាប់ចោលទៅ ហើយនាំគ្នាឡាយជេរទៅ ពីព្រោះជេរគេហើយអត់មានទោសនោះ ។»៕ ដោយ៖ លឹម ហុង
