កណ្ដាល៖ លោកព្រុំ សំណាង អធិការប៉ូលិសស្រុកកៀនស្វាយ បានឲ្យដឹងថា សមត្ថកិច្ចចាប់ខ្លួនយុវជនម្នាក់ ករណីធ្វើឲ្យខូចខាតដោយចេតនានិងគំរាមសម្លាប់ម្ដាយចោល ដោយខឹងសុំលុយម្ដាយទិញគ្រឿងញៀនមិនបាន នៅយប់ថ្ងៃទី១៤ខែវិច្ឆិកាឆ្នាំ២០២០នេះ នៅចំណុចភូមិស្តៅកន្លែង៣ ឃុំដីឥដ្ឋស្រុកកៀនស្វាយ ខេត្តកណ្តាល
។
លោកអធិការឲ្យដឹងថា ជនរងគ្រោះឈ្មោះប៉ា អូន ភេទស្រី អាយុ៥០ ឆ្នាំជនជាតិខ្មែរ
មានទីលំនៅភូមិស្ដៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្ដាល មុខរបរកសិករ (ត្រូវជាម្តាយបង្កើត)
រីឯជនសង្ស័យឈ្មោះភា រស្មី ភេទប្រុស អាយុ២៦ ឆ្នាំ ជនជាតិខ្មែរមានទីលំនៅភូមិ ឃុំកើតហេតុ មុខរបរមិនពិតប្រាកដ ត្រូវជាកូនបង្កើត (ឃាត់ខ្លួន)។ ចំពោះសម្ភារខូចខាតរួមមាន ៖ ១-ឆ្នាំងដាំបាយខ្សែភ្លើងចំនួន១ , ២-កង្ហាលចំនួន១
៣-ព្រះភូមរានទេវតាចំនួន០១, ៤- បង្កាន់ដៃកាន់ជណ្តើរផ្ទះធ្វើអំពីថ្មខូចខាតផ្នែកខាងក្រោម ៥- ស៊ុមរូបថតចំនួន០៣ និងមែកឈើហូបផ្លែមួយចំនួន។ ចំពោះវត្ថុតាងចាប់យករួមមាន ៖ ១-ញញួរផ្លែដែកដងឈើប្រវែង០,២២ម៉ែត្រចំនួន០១, ២- កាំបិតកញ្ចែតប្រវែង០,៤៨ម៉ែត្រ ចំនួន០១, ៣-ដែកស្រួចចំនួន០២ដើម មួយដើមប្រវែង០,៤៣ម៉ែត្រ
និងដែកកេះហ្គាសចំនួន០១ពណ៌ស្វាយ។
លោកអធិការបន្តទៀតថា នៅយប់ថ្ងៃ ខែ ឆ្នាំកើតហេតុខាងលើ ជនសង្ស័យបានសំលុយពីម្តាយឈ្មោះប៉ា អូន ជាជនរងគ្រោះចំនួន២.០០០០៛(ពីម៉ឺនរៀល) តែម្តាយជាជនរងគ្រោះមិនមានលុយឲ្យ ស្រាប់តែជនសង្ស័យខឹងក៏បានទាត់ឆ្នាំងដាំបាយខ្សែភ្លើង និងកង្ហារបណ្តាលឲ្យខូចខាត រួចយកញញួរវាយកាំជណ្តើផ្ទះ និងវាយព្រះភូមរានទេវតាបណ្តាលឲ្យបែកខូចខាតទាំងអស់ បន្ទាប់មកយកកាំបិតកាប់ស៊ុមរូបថត និងដើមឈើនៅខាងមុខផ្ទះរួចយកដែកចង់ស្រួចគំរាម រកចាក់ម្តាយជាជនរងគ្រោះ ថែមទាំងយកដែកកេះគំរាមរកដុតផ្ទះចោលថែមទៀត។
ក្រោយពីទទួលបានពាក្យបណ្តឹងពីជនរងគ្រោះជាម្តាយ កម្លាំងប៉ុស្តិ៍នគរបាលរដ្ឋបាលដីឥដ្ឋបានចុះដល់ចំណុចកើតហេតុ ពិនិត្យជាក់ស្តែង រួចនាំយកជនសង្ស័យមកប៉ុស្តិ៍ដើម្បីសួរនាំ។ ក្រោយពីសួរនាំរួចនៅចំពោះមុខសមត្ថកិច្ចជនសង្ស័យបានសារភាពថា ៖ខ្លួនពិតជាបានធ្វើសកម្មភាពវាយ និងកាប់បំផ្លិចបំផ្លាញ់ទ្រព្យសម្បត្តិរួមនិងគំរាម រកចាក់ម្តាយ និងរកដុតផ្ទះពិតប្រាកដមែនដោយសារសុំលុយម្តាយយកទិញថ្នាំញៀនមិនបាន ។
ក្រោយពីសួរនាំជនសង្ស័យរួច កម្លាំងប៉ុស្តិ៍នគរបាលរដ្ឋបាលដីឥដ្ឋបានបញ្ជូនជនសង្ស័យ រួមទាំងវត្ថុតាង មកកាន់អធិការដ្ឋាននគរបាលស្រុកកៀនស្វាយ ដើម្បីបន្តនីតិវិធី៕ដោយ៖បញ្ញាស័ក្តិ