ភ្នំពេញ៖សមត្ថកិច្ចចម្រុះរុករកឃើញហើយសពស្ត្រីម្នាក់ ដែលស្លាប់ក្រោយផ្ទះកញ្ចក់លំហែរកាយកម្ពស់២ជាន់ នៅជាប់មាត់ស្រះក្នុងភូមិគ្រឹះរបស់ឧកញ៉ាឃាន បញ្ញា បាក់ស្រុតចូលក្នុងស្រះទឹកសង្កត់លើនោះហើយ នាម៉ោ១១ព្រឹកថ្ងៃទី១៥វិច្ឆិកានេះ ក្រោយម្ចាស់ភូមិគ្រឹះបូមទឹកចេញអស់។
សមត្ថកិច្ចបានឲ្យដឹងថា ៖ជនរងគ្រោះមានឈ្មោះហ៊ុន សំបូរ អាយុ៦១ឆ្នាំ ជាស្ត្រីមេម៉ាយ សព្វថ្ងៃស្នាក់នៅក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ បម្រើការជាកម្មករផ្នែកអនាម័យប្រចាំនៅផ្ទះកើតហេតុខាងលើ។
គួរបញ្ជាក់ថា ៖ ហេតុការណ៍នេះបានកើតឡើងតាំងពីម៉ោង១០ នឹង៣០នាទី ថ្ងៃទី១៤ ខែវិច្ឆិកា ឆ្នាំ២០២០
នៅក្នុងភូមិគ្រឹះដ៏ស្កឹមស្កៃមួយកន្លែង តាមផ្លូវបេតុង ភូមិសំរោងទាវ សង្កាត់ក្រាំងធ្នង់ ខណ្ឌសែនសុខ ។ ប៉ុន្តែម្ចាស់ផ្ទះលាក់លៀមមិនបានរាយការណ៍មកនោះទេគឺ សុខចិត្តសម្ងំកកាយរកសព តែអស់ជម្រើស រហូតដល់វេលាម៉ោង៦ព្រលប់ថ្ងៃដដែល ទើបបែកធ្លាយផ្អើលអ្នកស្រុកតែម្តង។
ប្រជាពលរដ្ននៅក្បែរភូមិគ្រឹះខាងលើបានឲ្យដឹងថា កាលពីវេលាម៉ោង១០ និង៣០នាទីព្រឹកថ្ងៃទី១៤ ខែវិច្ឆិកា ឆ្នាំ២០២០ពួកគាត់ដែលរស់នៅក្បែរកន្លែងកើតហេតុបានឮសូរសំឡេងបាក់ស្រុតរលំផ្ទះកញ្ចក់នោះដែរ តែមិនចាប់អារម្មណ៍ នឹកគិតថា គេវាយផ្ទះចាស់ចោល ដើម្បីសង់ថ្មី ស្រាប់តែមកដល់ព្រលប់ថ្ងៃដដែល ទើបភ្ញាក់ផ្អើលថាមានស្ត្រីម្នាក់បានស្លាប់។
ប្រភពដដែលបានឲ្យដឹងបន្តទៀតថា ផ្ទះកញ្ចក់នេះបានបាត់ស្រុតចូលក្នុងស្រះទឹក តាំងពីពេលព្រឹកមកម្លេះ តែម្ចាស់ផ្ទះ មិនទម្លាយព័ត៌មាន បិទទ្វាររបងជិត សម្ងំឲ្យកម្មករកកាយរើ បូមទឹកចេញរហូតអស់លទ្ធភាព រកសពមិនឃើញទើបទម្លាយព័ត៌មានប្រាប់ទៅសាច់ញាតិក្នុងភូមិ ទើបផ្អើលឆោឡោនៅល្ងាចថ្ងៃកើតហេតុ ។
តែទោះជាយ៉ាងណាក្តី ទីតាំងពីកើតហេតុ ត្រូវបានម្ចាស់ បិទទ្វាររបងជាប់ ក្រៅពីសមត្ថកិច្ច មិនអនុញាតិឲ្យចូលឡើយ ហើយការងារបូមទឹករើកកាយរកសព នៅតែបន្តអស់ច្រើនម៉ោង ក៏រកមិនឃើញរហូតដល់ម៉ោង១១ព្រឹកថ្ងៃទី១៥វិច្ឆិការនេះ ទើបសមត្ថកិច្ចរុករកឃើញ៕
ដោយ៖បញ្ញាស័ក្តិ
