ខេត្តព្រះសីហនុ៖ ជនសង្ស័យជនជាតិចិន២នាក់ដែលបើករថយន្តបុកចូលរោងកម្មករស្នាក់នៅ បណ្តាលឲ្យជនរងគ្រោះ២នាក់ប្តីប្រពន្ធស្លាប់ ត្រូវបាននគរបាលចរាចរណ៍បញ្ជូនទៅសាលាដំបូងខេត្តព្រះសីហនុ ក្នុងនោះបច្ចុប្បន្នជនសង្ស័យទាំង២ត្រូវបានសាលាដំបូងខេត្តចេញដីកាបង្គាប់ឲ្យឃុំខ្លួនបណ្ដោះអាសន្ន នៅពន្ធនាគារខេត្ត ព្រះសីហនុហើយ កាលពីថ្ងៃ១៤ ខែវិច្ឆិកា ឆ្នាំ២០២០។
របាយការណ៍ពីនគរបាលបញ្ជាក់ថា ជនសង្ស័យជនជាតិចិនទាំង២នាក់ បើករថយន្តបង្កឲ្យមានគ្រោះថ្នាក់ចរាចរណ៍ កាលពីវេលាម៉ោង ១២និង២៥នាទីរំលងអធ្រាត្រឆ្លងចូល ថ្ងៃទី១៣ ខែវិច្ឆិកា ឆ្នាំ២០២០លើផ្លូវ ១៤៩C (ផ្លូវបំបែក៦០ម៉ែត្រ) ត្រង់ចំណុចចំណោតទី២អាឡាំងឌឺឡុង ក្នុងសង្កាត់លេខ៤ ក្រុងព្រះសីហនុ ។ រថយន្តម៉ាក COLORADO ពណ៌ខ្មៅ ពាក់ផ្លាកលេខភ្នំពេញ2AZ-0264 ( រថយន្តជាកម្មសិទ្ធិរបស់ក្រុមហ៊ុនបេតុង អ៊ុយ ប៉ាង) អ្នកបើកបរឈ្មោះ WANG XUSHENG ភេទប្រុស អាយុ ៣០ឆ្នាំ ជនជាតិចិន មានអ្នករួមដំណើរម្នាក់ឈ្មោះ ZHANG QI ភេទប្រុស អាយុ ២៦ឆ្នាំ ជនជាតិចិន អ្នកទាំងពីរ មានមុខរបរ បុគ្គលិកក្រុមហ៊ុនបេតុង អ៊ុយប៉ាង ស្នាក់នៅបច្ចុប្បន្ន ភូមិ១ សង្កាត់លេខ១ ក្រុងព្រះសីហនុ បុកចូលរោងកម្មករកំពុងសម្រាកលង់លក់ ដែលមានចម្ងាយចេញពីផ្លូវប្រហែល ជាង១០ម៉ែត្រ បណ្ដាលឲ្យបុរស ស្ត្រី២នាក់ ប្តីប្រពន្ធស្លាប់ ក្នុងនោះស្ត្រីជាភរិយាឈ្មោះ ឆាន រី អាយុ៤៧ឆ្នាំ ស្លាប់នៅនឹងកន្លែងកើតហេតុ និងបុរសជាប្តីឈ្មោះ នឹម អៀបអាយុ៤៧ឆ្នាំដូចគ្នា ស្លាប់ពេលបញ្ជូន ទៅកាន់មន្ទីរពេទ្យបង្អែកខេត្តព្រះសីហនុ។
ជនរងគ្រោះទាំងពីរនាក់ ប្ដីប្រពន្ធពេលស្លាប់ បាន បន្សល់ទុកកូនៗចំនួន៣នាក់ក្នុងបន្ទុក ។ បច្ចុប្បន្ន សមត្ថកិច្ច កំពុងដោះស្រាយការងារបន្តជូនជនរងគ្រោះតាមនីតិវិធីច្បាប់៕ដោយ៖បញ្ញាស័ក្តិ
