សៀមរាប៖ ផ្លូវជាតិលេខ៦ ចាប់ពីចំណុចរង្វង់មូលព្រះរាជដំណាក់ រហូតដល់រង្វង់មូលព្រលានយន្តហោះអន្តរជាតិខេត្តសៀមរាប គ្រោងពង្រីកកាន់តែធំទូលាយជាងមុនរហូតដល់៦គន្លង ដើម្បីសម្រួលដល់ការធ្វើដំណើររបស់ប្រជាពលរដ្ឋ។ នេះបើតាមប្រសាសន៍ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្លែងក្នុងឱកាសអញ្ជើញចុះពិនិត្យ គម្រោងស្ថាបនាផ្លូវជាតិលេខ៦ នាថ្ងៃទី១៥ ខែវិច្ឆិកា ឆ្នាំ២០២០ ។
ឯកឧត្តម បន្តថា គម្រោងពង្រីកផ្លូវជាតិលេខ៦ នេះមានប្រវែងសរុប៦គីឡូម៉ែត្រ ដោយចាប់ផ្តើមស្ថាបនានាពេលឆាប់ៗខាងមុខនេះ។ ដោយគម្រោងស្ថាបនានឹងប្រើប្រាស់ពេលវេលាប្រមាណជាង១ឆ្នាំប៉ុណ្ណោះ។ បើតាមឯកឧត្តម ស៊ុន ចាន់ថុល លើកឡើងថា គម្រោងស្ថាបនាផ្លូវជាតិលេខ៦នេះ គឺការពង្រីកមានលក្ខណ:ធំទូលាយជាងមុន ជាប្រភេទផ្លូវ៦គន្លង និងចិញ្ចើមផ្លូវ៣ម៉ែត្រសងខាង ដោយប្រើប្រាស់ថវិកាកម្ចីពីធគានាអភិវឌ្ឍន៍អាស៊ី(ADB )។
សូមជម្រាបថាក្រុមការងាររបស់ក្រសួងសាធារណការនិងដឹកជញ្ជូន បានចុះមកពិនិត្យកន្លែងនេះ ទាក់ទងនឹងការពង្រីកផ្លូវពីព្រះរាជដំណាក់ទៅរង្វង់មូលព្រះជ័យវរ្ម័នទី៧ផ្លូវបត់ចូលព្រលានយន្តហោះខេត្តសៀមរាបសព្វថ្ងៃ មានទ្រូងផ្លូវកណ្តាលសងខាង នឹងលុបវាចេញ ហើយពង្រីកផ្លូវឲ្យបាន៦គន្លង ៣ទៅ ៣មក នៅកណ្តាលទ្រូវផ្លូវ២ម៉ែត្រ និងចិញ្ចើមសងខាង៣ម៉ែត្រទៀតម្ខាង។
ឯកឧត្តម បន្តទៀតថា ដោយឡែកចាប់ពីចំណុចរង្វង់មូលជ័យវរ្ម័នទី៧ទៅកាន់ស្រុកក្រឡាញ់បានធ្វើការអ៊ុតកៅស៊ូប្រភេទAC រួចរាល់ហើយ ចំណែកឯចាប់ពីស្រុកក្រឡាញ់នៅកាន់ក្រុងសិរីសោភ័ណក្រសួងបានចុះហត្ថលេខាជាមួយក្រុមហ៊ុនសាងសង់ រួចរាល់ហើយដែរ ដើម្បីអ៊ុតប្រភេទកៅស៊ូប្រភេទAC៕ ដោយ៖បញ្ញាស័ក្តិ