កណ្តាល៖ឯកឧត្តម គី តិច ប្រធាន ក្រុមមេធាវីស្ម័គ្រចិត្ត សម្ដេចតេជោ នៅរសៀលថ្ងៃទី១៥ ខែវិច្ឆិកា ឆ្នាំ ២០២០ បានចាត់ តាំង មេធាវីស្ម័គ្រចិត្តសម្ដេចតេជោ ដើម្បីការពារក្ដីតាមផ្លូវច្បាប់ជូនប្អូនស្រី ហុក ស្រីណុច ដែលគ្មានលទ្ធភាពតតាំងតាមផ្លូវច្បាប់ ចំពោះ បណ្ដឹងចោទប្រកាន់ពីសំណាក់ប្រពន្ធចុងនៅសាលាដំបូងខេត្តកណ្ដាល ។ នេះបើតាមការបញ្ជាក់របស់លោកផែង វណ្ណៈនៅលើផេកហ្វេសប៊ុក។
គួរបញ្ជាក់ថា កាលពី ខែ កុម្ភៈ ឆ្នាំ ២០២០ កន្លងមក ប្អូនស្រី ហុក ស្រីណុច បាននាំកូ ប្រុសទៅជួបប្ដីដែលបានលែងលះគ្នា ហើយកំពុងរៀបការជាមួយប្រពន្ធថ្មីនៅភូមិរកាខ្ពស់ ក្រុងតាខ្មៅ ដើម្បីឲ្យប្ដីដោះស្រាយបំណុលដែលរួមគ្នាខ្ចីធនាគារ ឲ្យបានរួចរាល់សិនចាំមករៀបការ ។ តែការមកទាមទារបែបនេះ ធ្វើឲ្យប្រពន្ធចុងក្ដៅស្លឹកត្រចៀក ក៏ប្ដឹងទៅតុលាការខេត្តកណ្តាល ដោយចោទប្អូនស្រី ពីបទរំលោភលើលំនៅឋាន និងបរិហារកេរ្តិ៍ជាសាធារណៈ ។
តំណាងអយ្យការអមសាលាដំបូងខេត្តកណ្តាល បានចោទប្រកាន់ប្អូនស្រីហុក ស្រីណុច តាមបណ្ដឹងរបស់ ប្រពន្ធចុងរួចបញ្ជូនទៅ ចៅក្រមស៊ើបសួរ ។ នៅក្នុងដំណាក់កាលស៊ើបសួរ ចៅក្រមបានកោះហៅប្អូនស្រី ហុក ស្រី ណុច ចូលបំភ្លឺ តែប្អូនស្រីអាក់ខាន តាមដីកាកោះ ក៏ត្រូវបានចៅក្រមចេញដីកាបង្គាប់ឲ្យនាំខ្លួនទៅសាកសួរតែម្ដង ។
ការនាំខ្លួនប្អូនស្រី មកសាកសួរនៅថ្ងៃទី១៣ ខែវិច្ឆិកា ឆ្នាំ២០២០កន្លងមកថ្មីៗនេះ បានធ្វើឲ្យមហាជនរិះគន់តុលាការយ៉ាងខ្លាំង ដោយចោទថា តុលាការលំអៀងទៅរកប្រពន្ធចុងធ្វើបាបប្រពន្ធដើម ។ ទោះជាយ៉ាងណាក្ដី បន្ទាប់ពីសាកសួររួច ចៅក្រមបាន អនុញ្ញាតឲ្យត្រឡប់ទៅផ្ទះវិញ ។
បន្ទាប់ពីទទួលដំណឹងថា ឯកឧត្តម គី តិច ប្រធានក្រុមមេធាវីស្ម័គ្រចិត្តសម្ដេចតេជោ ចាត់តាំងមេធាវីស្ម័គ្រចិត្តសម្ដេចតេជោ ការពារ ក្ដីតាមផ្លូវច្បាប់ជូនប្អូនស្រី ហុក ស្រីណុច ដែលកំពុង ភ័យព្រួយនោះ បានត្រេកអរយ៉ាងខ្លាំងនិងបានគោរពអរគុណឯកឧត្តម គី តិច ប្រធានក្រុមមេធាវីស្ម័គ្រចិត្តសម្ដេចតេជោ ជាពិសេសគោរពអរគុណសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានបង្កើតក្រុមមេធាវីស្ម័គ្រចិត្តសម្ដេចតេជោ ជួយការពារស្ត្រីទន់ខ្សោយ ។ ប្អូនស្រី ហុក ស្រី ណុច បានគោរពជូនពរសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត សូមឲ្យមានសុខភាពល្អបរិបូរណ៍ អាយុយឺនយូរដើម្បី បន្តដឹកនាំនាវាកម្ពុជា រក្សាបានសុខសន្តិភាព និងការអភិវឌ្ឍន៍ ៕ ដោយ៖បញ្ញាស័ក្តិ