ភ្នំពេញ៖បណ្តាញព័ត៌មានសង្គមហ្វេសប៊ុក គណនីឈ្មោះ “អ្នកខេត្ត ព្រៃវែង បានសរសេរផ្សព្វផ្សាយថា “លាហើយស្ថាប័ន ដែលខ្ញុំស្រឡាញ់បំផុត ៖ ខ្ញុំមិនអាចទ្រាំនៅបានបន្តទៀតទេ។ មេដាក់បទបញ្ជាគ្មានភាពទទួលខុសត្រូវ លាហើយកន្លែងបក្សពួកនិយម អង្គភាពស្រាវជ្រាវព័ត៌មាននិងសន្តិសុខ អ ហ ផ ទ ។
ករណីនេះលោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានដឹងថា នៅថ្ងៃទី១៦ ខែវិច្ឆិកា ឆ្នាំ២០២០ កងរាជអាវុធហត្ថបានចេញសេចក្តីប្រកាសព័ត៌មាន ពាក់ព័ន្ធនឹងនាយអាវុធហត្ថ១រូប បានបង្ហោះផ្សព្វផ្សាយព័ត៌មាន ដែលនាំឱ្យប៉ះពាក់ដល់កិត្តិយសកងរាជអាវុធហត្ថ។
តាមសេចក្តីប្រកាសព័ត៌មាន ឯកឧត្តមនាយឧត្តមសេនីយ៍ សៅ សុខា បានបង្កើតគណៈកម្មការចំពោះកិច្ច ធ្វើការត្រួតពិនិត្យលើករណីនេះ។
លោកអេង ហ៊ី បានបញ្ជាក់ថា នៅថ្ងៃទី១៥ ខែវិច្ឆិកា ឆ្នាំ២០២០ កងរាជអាវុធហត្ថបានឃើញ ក្នុងបណ្តាញព័ត៌មានសង្គមហ្វេសប៊ុក គណនីឈ្មោះ “អ្នកខេត្ត ព្រៃវែង បានសរសេរផ្សព្វផ្សាយថា “លាហើយស្ថាប័ន ដែលខ្ញុំស្រឡាញ់បំផុត ៖ ខ្ញុំមិនអាចទ្រាំនៅបានបន្តទៀតទេ។ មេដាក់បទបញ្ជាគ្មានភាពទទួល ខុសត្រូវ លាហើយកន្លែងបក្សពួកនិយម អង្គភាពស្រាវជ្រាវព័ត៌មាននិងសន្តិសុខ អ ហ ផ ទ ។ ខ្ញុំចូលកងទ័ពបម្រើប្រទេសជាតិ និងបម្រើប្រជាជន និងការពារសាសនាព្រះមហាក្សត្រនិង រាជរដ្ឋាភិបាលស្របច្បាប់ និងការពារទ្រព្យសម្បត្តិជាតិ តែខ្ញុំមិនទៅបំរើក្រុមបក្ខពួកនិយមមួយ ក្តាប់តូចកំពុងតែឃុបឃិតគ្នាបិតបាំងថ្នាក់លើដើម្បីបំផ្លាញទ្រព្យសម្បត្តិជាតិនោះឡើយ។
ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមជម្រាបជូនសាធារណជន អ្នកសារព័ត៌មាន ជ្រាបថា ក្រោយពីទទួលបាននូវព័ត៌មាននេះ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស បានបង្កើតគណៈកម្មការចំពោះកិច្ច កងរាជអាវុធហត្ថលើផ្ទៃប្រទេស ដើម្បីធ្វើការត្រួតពិនិត្យ ផ្ទៀងផ្ទាត់នូវព័ត៌មានឱ្យបានច្បាស់លាស់ និងរកឱ្យឃើញការពិតៗ នៅក្នុងកងរាជអាវុធហត្ថ ជាគោលការណ៍មុននឹងធ្វើការវិនិច្ឆយនូវកំហុសណាមួយ ត្រូវតែមានការត្រួតពិនិត្យទៅលើការអនុវត្តតួនាទី ភារកិច្ច ក្រមសីលធម៌ លក្ខន្តិកៈ ទូទៅ និងបទវិន័យទូទៅ ករណីបុគ្គលណាអនុវត្តដោយបំពានច្បាប់ ត្រូវតែអនុវត្តតាមច្បាប់ គឺបញ្ជូនទៅតុលាការ។
ចំពោះនាយទាហាននៃកងរាជអាវុធហត្ថ ឈ្មោះ ហេង ហៃ អត្តលេខ ២០០២១៤ ឋានន្តរសក្តិ អនុសេនីយ៍ត្រី មុខងារ នាយអាវុធហត្ថ អង្គភាពសន្តិសុខកងរាជអាវុធហត្ថលើផ្ទៃប្រទេស បានបោះបង់ចោលអង្គភាព ហើយប្រធានអង្គភាពសន្តិសុខ បានកោះហៅឱ្យចូលបង្ហាញខ្លួន បុគ្គលនេះនៅតែមិនបានចូលបង្ហាញនោះទេ ប្រធានអង្គភាពសន្តិសុខ បាន ធ្វើសេចក្តីរាយការណ៍តាមឋានានុក្រម។ តាមការទទួលបានព័ត៌មានជំហានដំបូង អនុសេនីយ៍ត្រីហេង ហៃ បានប្រព្រឹត្តល្មើសនឹងច្បាប់ស្តីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ ដែលមានចែងក្នុងជំពូកទី២ “សិទ្ធិ កាតព្វកិច្ច និងភារកិច្ចទទួលខុសត្រូវ មាត្រា១០ មាត្រា១១ និងមាត្រា១២៕ដោយ៖បញ្ញាស័ក្តិ
