ភ្នំពេញ ៖ បុរសម្នាក់បានបាត់បង់ជីវិត បន្ទាប់ពីជួបគ្រោះថ្នាក់ចរាចរណ៍ ដើរឆ្លងផ្លូវត្រូវរថយន្តបើកទៅបុកពេញទំហឹង បណ្តាលឲ្យបែកក្បាលស្លាប់យ៉ាងអាណោចអាធ័ម។ ចំណែកឯតៃកុងរថយន្តក៏រត់គេចខ្លួនបាត់ស្រមោល។
ហេតុការណ៍នេះដែរ កើតឡើងនៅវេលាម៉ោង ១១ និង៣០ នាទីយប់ថ្ងៃចន្ទទី១៦ ខែវិច្ឆិកា ឆ្នាំ២០២០ នៅតាមបណ្តោយផ្លូវ ៦០ ម៉ែត្រ ក្នុងសង្កាត់ចក្រអង្រែលើ ខណ្ឌមានជ័យ រាជធានីភ្នំពេញ។
បើយោងតាមប្រភពព័ត៌មាន ពីប្អូនជនរងគ្រោះនៅកន្លែងកើតហេតុ បានឲ្យដឹងថា មុនពេលកើតហេតុរូបគេ និងជនរងគ្រោះបានមកទិញបាយហូបរួចបម្រុងដើរត្រឡប់ទៅផ្ទះវិញ ខណៈពេលកំពុងតែដើឆ្លងផ្លូវ ក៏ឃើញរថយម៉ាក lexus 570 មួយគ្រឿង ដែលពាក់ផ្លាកលេខ ភ្នំពេញ 2BB 1339 បើកបរដោយជនជាតិចិនធ្វើដំណើរក្នុងទិសដៅពីត្បូង មកជើងក្នុងលឿនលឿន ខណៈមកដល់ចំណុចកើតហេតុ ក៏ជ្រុលទៅបុកជនរងគ្រោះពេញទំហឹង បណ្តាលឲ្យបោកក្បាលនៅនឹងថ្នល់ស្លាប់យ៉ាងអាណោចអាធ័ម។
សពជនរងគ្រោះមានឈ្មោះ រុំ រុណ អាយុ ២៨ ឆ្នាំ មុខរបរ អ្នកថែសួន បច្ចុប្បន្នស្នាក់នៅជិតស្តុប ៦០ ម៉ែត្រ មានទីលំនៅក្នុងភូមិកណ្ដាលស្ទឹង ស្រុករតនមណ្ឌល ខេត្តបាត់ដំបង។
ក្រោយពេលកើតហេតុ សមត្ថកិច្ចមូលដ្ឋានសហការជាមួយនឹងជំនាញ ចុះមកដល់និងទំនាក់ទនាំទៅខាងចរាចរណ៍ក្រុង ឱ្យចុះមកវាស់វែងយកម៉ូតូទៅរក្សាទុក និងធ្វើកំណត់ហេតុប្រគល់សព ឲ្យក្រុមគ្រួសារធ្វើបុណ្យតាមប្រពៃណី៕ដោយ៖ សា ម៉េត
