បាត់ដំបង ៖ លោកឧត្តមសេនីយ៍ត្រី សាត គឹមសាន ស្នងការដ្ឋាននគរបាលខេត្តបាត់ដំបង ដឹកនាំកងកម្លាំងនគរបាលជាង២០០នាក់ បានចុះធ្វើអនាម័យលាងសម្អាត នៅលើកំណាត់ដងផ្លូវអមសងខាងតាមដងស្ទឹង និងស្ពានថ្មឆ្លងស្ទឹងសង្កែក្នុងភូមិសាស្ត្រ ក្រុងបាត់ដំបង ក្នុងគោលបំណង ដើម្បីរួមចំណែកក្នុងការរក្សាអនាម័យ និងសម្អាតនៅតាមដងផ្លូវសំខាន់ៗ ក្នុងទីប្រជុំជនក្រុងបាត់ដំបង សម្រាប់បម្រើដល់វិស័យទេសចរណ៍ កាលពីព្រឹកថ្ងៃទី១៧ខែវិច្ឆិកា២០២០។
លោកឧត្តមសេនីយ៍ត្រី សាត គឹមសាន ស្នងការដ្ឋាននគរបាលខេត្តបាត់ដំបង បានមានប្រសាសន៍ថា ការដឹកនាំកងកម្លាំងស្នងការដ្ឋាននគរបាលខេត្តបាត់ដំបង ចំនួនជាង២០០នាក់ ដើម្បីចុះធ្វើការអនាម័យលាងសម្អាត នៅតាមដងផ្លូវនិងស្ពានខាងលើនេះ គឺក្នុងគោលបំណង ដើម្បីរួមចំណែកជាមួយរដ្ឋបាលខេត្ត ក្នុងការរក្សាអនាម័យនិងសម្អាត នៅតាមដងផ្លូវសំខាន់ៗនៃទីប្រជុំជនក្រុង-ខេត្តបាត់ដំបង ឲ្យមានអនាម័យ បរិស្ថានល្អ សម្រាប់បម្រើដល់វិស័យទេសចរណ៍ជាតិអន្តរជាតិ ដែលធ្វើដំណើរឆ្លងកាត់ទៅមក កាត់តាមទីប្រជុំជនទីក្រុងនេះ និងចង់ថែរក្សាកំណាត់ផ្លូវនានា ក្នុងក្រុងបាត់ដំបង ឲ្យមានអនាម័យល្អ ប្រកបដោយបរិស្ថានល្អនៅតាមផ្លូវទាំងនោះ ដោយគ្មានធូលីដីកកស្ទះ នៅលើផ្លូវ និងហុយពេលខ្យល់បក់បោក។
លោកឧត្តមសេនីយ៍ត្រី សាត គឹមសាន បានបញ្ជាក់បន្ថែមថា នេះគឺជាចំណុចចាប់ផ្តើម ដែលលោកបានដឹកនាំ កងកម្លាំងក្នុងការចុះសម្អាតនៅលើដងផ្លូវក្នុងទីប្រជុំជនក្រុងសំខាន់ៗ ដែលបម្រើដល់វិស័យទេសចរណ៍ក្នុងខេត្ត និងដើម្បីលើកកម្ពស់នូវបរិស្ថានតាមដងផ្លូវទាំងនោះ ឲ្យកាន់តែមានភាពទាក់ទាញដល់ភ្ញៀវទេសចរបានកាន់តែល្អប្រសើរឡើងថែមទៀត ហើយការដឹកនាំកម្លាំងស្នងការដ្ឋានចុះលាងសម្អាតផ្លូវទាំងនេះ ធ្វើជាបន្តបន្ទាប់តាមពេលវេលាសមស្របណាមួយ សម្រាប់ថ្ងៃខាងមុខផងដែរ។
លោកឧត្តមសេនីយ៍ត្រី សាត គឹមសាន បានអំពាវនាវដល់ប្រជាពលរដ្ឋ សូមបើកបរយានជំនិះ និងធ្វើចរាចរណ៍នៅលើដងផ្លូវសូមនាំគ្នាគោរពច្បាប់ចរាចរណ៍ផ្លូវគោក និងពាក់មួកសុវត្ថិភាពឲ្យបានគ្រប់ៗគ្នា ដើម្បីរក្សាអាយុជីវិតខ្លួនឯងនិងអ្នកដទៃ៕ ដោយ ៖ អ៊ុងសារុំ