ភ្នំពេញ៖មកដល់ព្រលប់ថ្ងៃទី១៧ខែវិច្ឆិកានេះ សាលាដំបូងរាជធានីភ្នំពេញ បានសម្រេចមិនឃុំខ្លួនអតីតពិធីករទូរទស្សន៍និងជាពាណិជ្ជករម្នាក់ ពាក់ព័ន្ធបទល្មើស ចេញសែកគ្មានប្រាក់ឲ្យម្ចាស់បំណុល រួចដោះលែងឲ្យមានសេរីភាពវិញ ។
សមត្ថកិច្ចចាប់ខ្លួនអតីតពិធីកររូបនេះនៅយប់ថ្ងៃទី១៦ខែវិច្ឆិកាឆ្នាំ២០២០ នៅចំណុចហាងកាហ្វេអាម៉ាហ្សូន ផ្លូវព្រះមុនីង្ស សង្កាត់ស្រះចក ខណ្ឌដូនពេញ រាជធានីភ្នំពេញ ពីបទ មិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែមិថុនាឆ្នាំ២០២០ តាមដីកាបង្គាប់ឲ្យនាំខ្លួនលេខ១៣០០ «ឃ១»ដ.ច.ន ចុះថ្ងៃទី ២៩ ខែ កញ្ញា ឆ្នាំ២០២០ ចេញដោយលោក វ៉ាន់ សែនវិសុទ្ធ ចៅក្រមស៊ើបសួរសាលាដំបូងរាជធានីភ្នំពេញ។
អតីតពិធីករដែលត្រូវបានចាប់ខ្លួនមានឈ្មោះ ភោ សុផានិត ភេទប្រុស អាយុ ៤៤ឆ្នាំ មុខរបរពាណិជ្ជករ ទីលំនៅបច្ចុប្បន្នផ្ទះគ្មានលេខ ផ្លូវបេតុង ភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ៕ដោយ៖បញ្ញាស័ក្តិ