នៅមុននេះបន្តិចតារាចម្រៀង ទេព បូព្រឹក្ស បានបង្ហោះវីដេអូពញ្ញាក់អារម្មណ៍មួយទៅកាន់លោក ជី ដេវីត ដោយកុហកថាខ្លួនមានកូន បានធ្វើឲ្យលោក ជី ដេវីត ខំត្រេកអរញញឹមអៀនប្រៀនបិទមាត់មិនជិត តែចុងក្រោយក៏ប្រាប់ថាជាការ prank ធ្វើឲ្យលោក ជី ដេវីត អស់សង្ឃឹមមិនស្ទើរទម្លាក់ទឹកមុខស្ងួតចែស។
តាមរយៈវីដេអូនោះ ទេព បូព្រឹក្ស បានយកប្រដាប់ធ្វើតេស្តទឹកនោមមួយមកគូសប៉ិចក្រហមឲ្យចេញជា២ឆ្នូតធ្វើដូចជាខ្លួនមានទំងន់មែនទែន ហើយក៏បានយកវាឲ្យលោក ជី ដេវីត មើល។ ក្រោយពីមើលរួច លោក ជី ដេវីត បានបង្ហាញអារម្មណ៍ជឿរបន្តិចអត់បន្តិច ហាក់បីដូចជាត្រៀមខ្លួនមិនទាន់ជាមួយនិងដំណឹងនេះ តែក៏ញញឹមបិទមាត់មិនជិតរួចហក់ទៅអោប ទេព បូព្រឹក្ស តែម្តង ព្រោះពិតជាចង់បានកូននិងគេដែរ។ បន្ទាប់ពីជឿរស្លុងថាវាជាការពិត ស្រាប់តែ ទេព បូព្រឹក្ស ប្រាប់ថានាងគ្រាន់តែធ្វើលេងទេមិនបានមានកូនមែនទែននោះទេ ធ្វើឲ្យលោក ជី ដេវីត ខកចិត្តជាខ្លាំងទម្លាក់ទឹកមុខភ្លាមៗហាក់អស់សង្ឃឹមរលីងតែម្តង។ និយាយពី ទេព បូព្រឹក្ស ក្រោយពីបោកគូស្នេហ៍បានសម្រេច បានសើចក្អាកក្អាយហាក់គ្មានយល់អារម្មណ៍លោក ជី ដេវីត បន្តិចសោះ ហើយក៏សួរឌឺទៀតថា បើមានកូនមែន តើលោក ជី ដេវីត មានអារម្មណ៍បែបណា!! ស្រាប់តែ លោក ជីដេវីត ឆ្លើយទាំងញញឹមស្ងួតថាអាយុជិត៣០ហើយ បើមានមានឲ្យហើយទៅកុំចាំដល់អាយុ៣០ទាន់។ យ៉ាងណាក៏ដោយមិនត្រឹមតែលោក ជី ដេវីត ទេ ដែលភ្ញាក់ផ្អើលនិងការ prank នេះ សូម្បីតែអ្នកគាំទ្រតារាទាំង២ ក៏ហួសចិត្តនិងអាណិតលោក ជី ដេវីត ដែរ ដែលមកត្រូវ ទេព បូព្រឹក្ស កុហកឡើងដាច់ចង្កេះបែបនេះ។
គួរបញ្ជាក់ថា ទេព បូព្រឹក្ស និងជី ដេវីត បានទាក់ទងស្រឡាញ់គ្នាដូចជាប្តីប្រពន្ធអស់រយៈពេលជាច្រើនឆ្នាំមកហើយ និងបានចាប់ដៃគ្នាដើរលើវិថីសីល្បៈព្រមទាំងបើកមុខជំនួញជាមួយគ្នារហូតជោគជ័យសល់មាសប្រាក់លុយកាក់ និងទិញរថយន្តសេរីទំនើបៗតម្លៃរាប់ម៉ឺនដុល្លារ មានទាំង Mercedes និង Rollroy ជាដើម ហើយថ្មីៗនេះក៏បង្ហើបពីវីឡាដែលកំពុងសាងសង់ជិតរួចផងដែរ តែទោះបីជាជោគជ័យបែបនេះក៏ដោយក៏អ្នកទាំង២មិនទាន់បង្ហើបពីគម្រោងរៀបការពេលណាដែរ៕ ដោយ៖ កូលាប ក្រហម