ភ្នំពេញ៖ អ្នកតំណាងសហគមន៍ចំនួនពីរនាក់មកពីខេត្រកោះកុង ត្រូវបានតុលាការដាក់ឱ្យនៅក្រោមការត្រួតពិនិត្យតាមផ្លូវតុលាការ នៅខណៈដែលសមាជិកសហគមន៍របស់អ្នកទាំងពីរជាង ១០០ នាក់ មកពីស្រុកស្រែអំបិល បានប្រមូលផ្តុំគ្នានៅមុខតុលាការខេត្ត ដើម្បីគាំទ្រតំណាងរបស់ពួកគេ និងអំពាវនាវសុំឱ្យតុលាការទម្លាក់ចោល បទចោទលើអ្នកតំណាងរបស់ពួកគេ ។ ស្ត្រីទាំងពីរ អាចនឹងប្រឈមមុខនឹងពន្ធនាគាររហូតដល់ ២ឆ្នាំ ប្រសិនបើអ្នកទាំងពីរត្រូវបានតុលាការរកឃើញថាមានទោស ។ នេះបើតាមការចេញផ្សាយព័ត៌មាន របស់អង្គការសម្ព័ន្ធខ្មែរជំរឿននិងការពារសិទ្ធិមនុស្ស (LICADHO / លីកាដូ ) នៅថ្ងៃទី១៨ ខែវិច្ឆិកាឆ្នាំ២០២០។
អ្នកស្រី ផាវ ញ៉ើង និងអ្នកស្រី សេង លីន បានមកឆ្លើយបំភ្លឺនៅមុខចៅក្រមស៊ើបសួរ ពីបទបរិហាកេរ្តិ៍ និងញុះញង់បង្កភាពវឹកវរដល់សង្គម ។ ស្ត្រីទាំងពីរ នឹងត្រូវបង្ហាញខ្លួននៅអធិការដ្ឋាននគរបាលស្រុកស្រែអំបិលជារៀងរាល់ខែ ត្រូវបង្ហាញខ្លួនតាមដីកាកោះហៅរបស់មន្ត្រីតុលាការ និងមិនត្រូវផ្លាស់ទីលំនៅដោយមិនមានការអនុញ្ញាតពីតុលាការនោះទេ ។ អ្នកទាំងពីរ ជាអ្នកតំណាងពលរដ្ឋចំនួនជិត ២០០ គ្រួសារ ដែលដីស្រែចំការរាប់រយហិកតារបស់អ្នកទាំងនោះ ត្រូវបានរំលោភបំពានដោយក្រុមហ៊ុនកសិឧស្សាហកម្មរបស់លោក ឧកញ៉ា ហេង ហ៊ុយ ចាប់តាំងពីឆ្នាំ ២០០៨ ដើម្បីយកដីធ្វើចំការអំពៅ ។
អ្នកតំណាងទាំងពីរនាក់ ត្រូវបានប្តឹងដោយបងប្រុសរបស់អតីតអ្នកតំណាងសហគមន៍ម្នាក់ឈ្មោះ ឆាយ វី ដែលលោកជាអតីតមេឃុំ និងជាអ្នកដែលត្រូវបានស្ត្រីទាំងពីរ ចោទប្រកាន់ថាបានលួចរំលោភយកដីរបស់សមាជិកសហគមន៍ សម្រាប់ផលប្រយោជន៍ផ្ទាល់ខ្លួន កាលពីឆ្នាំ ២០១៩ អំឡុងពេលជម្លោះដីធ្លីនៅទីនោះ មិនទាន់ត្រូវបានដោះស្រាយ ។ ស្ត្រីម្នាក់ទៀត អ្នកស្រី ខន ផុន ក៏ត្រូវបានកោះហៅសាកសួរពីបទបរិហាកេរ្តិ៍ផងដែរ ។ ប៉ុន្តែក្នុងករណីបទល្មើសខាងលើនេះ វិធានការត្រួតពិនិត្យតាមផ្លូវតុលាការ មិនអាចត្រូវបានដាក់លើអ្នកស្រីនោះទេ ។
ត្រឹមតែពីរសប្តាហ៍ចុងក្រោយប៉ុណ្ណោះ អ្នកតំណាងសហគមន៍ចំនួន ១០ នាក់ផ្សេងទៀត ក៏ត្រូវបានតុលាការដាក់ឱ្យស្ថិតក្រោមការត្រួតពិនិត្យរបស់តុលាការផងដែរ ពាក់ព័ន្ធនឹងជម្លោះដីធ្លីជាមួយឧកញ៉ា ហេង ហ៊ុយ ៕ដោយ៖បញ្ញាស័ក្តិ
