សៀមរាប ៖ លោក នូ វាសនា ចៅក្រមស៊ើបសួរសាលាដំបូងខេត្តសៀមរាប នៅថ្ងៃទី១៨ ខែវិច្ឆិកា ឆ្នាំ២០២០ បានសម្រេចចោទ លោក ម៉ៅ ប៊ុនធូ នាយកទីចាត់ការអន្តរវិស័យនៃសាលាខេត្តកំពង់ធំ ពីបទ ប៉ុនប៉ងឃាតកម្ម តាមមាត្រា២៧និងមាត្រា១៩៩នៃក្រមព្រហ្មទណ្ឌ ហើយសម្រេចចេញដីកាឃុំខ្លួន ដាក់ពន្ធនាគារបណ្តោះអាសន្ន ពាក់ព័ន្ធករណីយកកាំបិតចាក់បំពង់ក ប៉ុនប៉ងឃាតកម្ម លើលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ ។
ហេតុការណ៍នេះ ប្រព្រឹត្តនៅចំណុចក្នុងភោជនីយដ្ឋានជ្រោះពេជ្រចិន្តា ស្ថិតនៅភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ កាលពីថ្ងៃទី១៦ ខែវិច្ឆិកា ឆ្នាំ២០២០ វេលាម៉ោង២១និង១៣នាទី យប់ ។
លោក កើត រិទ្ធ រដ្ឋមន្ត្រីក្រសួងយុត្តិធម៌ បានសម្រេចផ្ទេរសមត្ថកិច្ចសំណុំរឿងប៉ុនប៉ងឃាតកម្មនេះ ពីអយ្យការអមសាលាដំបូងខេត្តកំពង់ធំ ទៅ អយ្យការអមសាលាដំបូងខេត្តសៀមរាប វិញ ដើម្បីធានាប្រយោជន៍សាធារណៈ និង ដំណើរការល្អនៃយុត្តិធម៌តុលាការ និង ដោយអនុវត្តតាមមាត្រា១៩ នៃច្បាប់ស្តីពីការរៀបចំអង្គការតុលាការ ៕ ដោយ៖បញ្ញាស័ក្តិ
