កោះកុង៖ នៅថ្ងៃទី១៨ ខែវិច្ឆិកា ឆ្នាំ២០២០ សាលាដំបូងខេត្តកោះកុងបានសាកសួរតំណាងសហគមន៍កោះកុង៣នាក់គឺ អ្នកស្រីផាវ ញុឺង អ្នកស្រី ខន ផុន និងអ្នកស្រី សេង លីន ដែលត្រូវបានចោទពីបទបរិហារកេរ្តិ៍ និងញុះញង់ឱ្យប្រព្រឹត្តបទឧក្រិដ្ឋតាមមាត្រា ៣០៥ និង ៤៩៥ នៃក្រមព្រហ្មទណ្ឌ។
អ្នកទាំង៣នាក់ត្រូវបានចោទ បន្ទាប់ពីពួកគេបានចូលរួមជាមួយសហគមន៍ជាច្រើននាក់ទៀតដាក់ពាក្យបណ្ដឹងទៅក្រសួងមហាផ្ទៃ និងក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៥ ខែធ្នូ កាលពីឆ្នាំ២០១៩។
ពាក្យបណ្ដឹងនេះគឺបានចោទប្រកាន់ អ្នកស្រី ឆាយ វី ដែលត្រូវជាប្អូនស្រីរបស់អតីតមេឃុំជីខលើថាបានលក់ដីរដ្ឋ ហើយពួកគាត់ក៏បានទទូចសុំការអន្តរាគមន៍ពីរដ្ឋាភិបាលផងដែរ។ បន្ទាប់ពីត្រូវបានសាកសួរតំណាងសហគមន៍ខេត្តកោះកុងទាំង ៣ នាក់ត្រូវបានដាក់ឱ្យស្ថិតក្រោមការត្រួតពិនិត្យតាមផ្លូវតុលាការ។
ចំណែកអ្នកនាំពាក្យសាលាដំបូង និងអយ្យការអមសាលាដំបូងខេត្តកោះកុង បានចេញសេចក្តីថ្លែងការណ៍ថា កាលពីថ្ងៃទី១៧ -១៨ ខែវិច្ឆិកា ឆ្នាំ២០២០ ឈ្មោះ ផាវ ញ៉ុង ភេទស្រី អាយុ៤៨ឆ្នាំ ឈ្មោះ សេង លីន ភេទស្រី អាយុ៥៣ឆ្នាំ ឈ្មោះ ខន ខុន ភេទស្រី អាយុ៦០ឆ្នាំ និង ប្រជាពលរដ្ឋមួយចំនួនទៀតមកពីស្រុកចំនួន ៣ នៃខេត្តកោះកុង រួមមាន ស្រុកស្រែអំបិល ស្រុកបុទុមសាគរ និងស្រុកគីរីសាគរ បានមកធ្វើការតវ៉ាជួបជុំគ្នានៅមុខសាលាដំបូង និងអយ្យការអមសាលាដំបូងខេត្តកោះកុង ដោយស្រែកតវ៉ាអះអាងថា ពួកខ្លួន គឺជាជនរងគ្រោះដីធ្លី ។
អ្នកនាំពាក្យសាលាដំបូង និងអយ្យការអមសាលាដំបូងខេត្តកោះកុងសូមជម្រាបជូនសាធារណជនថា ឈ្មោះ ផាវ ញ៉ុង ឈ្មោះ សេង លីន និងឈ្មោះ ខន ខុន ត្រូវបានតំណាងអយ្យការអមសាលាដំបូងខេត្តកោះកុង ធ្វើការចោទប្រកាន់ពីបទ ញុះញង់ឱ្យប្រព្រឹត្តអំពើបង្កឱ្យមានការវឹកវរដល់សន្តិសុខ សង្គម និងបទ បរិហាកេរ្តិ៍ជាសាធារណៈ ដែលមានឈ្មោះ ឆាយ វី ភេទស្រី អាយុ៤៣ឆ្នាំ ជាដើមបណ្តឹងរដ្ឋប្បវេណី ។
នៅថ្ងៃទី១៨ ខែវិច្ឆិកា ឆ្នាំ២០២០ សាលាដំបូងខេត្តកោះកុង បានបង្គាប់ឲ្យជនត្រូវចោទឈ្មោះ ផាវ ញ៉ុង ឈ្មោះ សេង លីន និងឈ្មោះ ខន ខុន ចូលខ្លួននៅចំពោះមុខចៅក្រមស៊ើបសួរនៃសាលាដំបូងខេត្តកោះកុង ប៉ុន្តែបែរជាមានប្រជាពលរដ្ឋមួយចំនួនទៀតមកពីស្រុកចំនួន ៣ នៃខេត្តកោះកុង ខាងលើ មកធ្វើការស្រែក តវ៉ានៅមុខសាលាដំបូង និងអយ្យការអមសាលាដំបូងខេត្តកោះកុង ថា “សុំឱ្យតុលាការជួយដោះស្រាយរឿង ទំនាស់ដីធ្លី” ទៅវិញ ។
ដើម្បីជៀសវាងការភាន់ច្រឡំ សាលាដំបូងនិងអយ្យការអមសាលាដំបូងខេត្តកោះកុង សូមបញ្ជាក់ ជូនសាធារណជនថា សំណុំរឿងខាងលើនេះ គឺជាសំណុំរឿងព្រហ្មទណ្ឌមិនមែនជាសំណុំរឿងពាក់ព័ន្ធនឹង វិវាទកម្មសិទ្ធិដីធ្លីនោះឡើយ ៕ដោយ៖បញ្ញាស័ក្តិ