ភ្នំពេញ÷រថយន្តដឹកអ្នកដំណើរវីអាយភីមួយគ្រឿង បានបើកបរក្នុងល្បឿនលឿនមិនប្រយ័ត្នជ្រុលទៅបុកពីក្រោយរថយន្តស្ទូចពេញទំហឹងបណ្ដាលឲ្យគាបជាប់មនុស្សរងរបួសធ្ងន់ស្រាល ៤នាក់បញ្ជូនយកទៅសង្គ្រោះបន្ទាន់ភ្លាមៗ។
ហេតុការណ៍នេះបានកើតឡើងនៅវេលាម៉ោង ១១ និង ៣០ នាទីយប់ ថ្ងៃពុធទី១៨ ខែវិច្ឆិកាឆ្នាំ ២០២០ ស្ថិតនៅតាមបណ្ដោយផ្លូវជាតិលេខ ៦A ក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋ នៅកន្លែងកើតហេតុបានឲ្យដឹងថាមុនពេលកើតហេតុគេឃើញរថយន្តស្ទូចមួយគ្រឿងអត់ផ្លាកលេខ ធ្វើដំណើរក្នុងទិសដៅពីកើតមកលិចក្នុងល្បឿនលឿនពេលមកដល់ចំណុចកើតហេតុគេឃើញរថយន្តដឹកអ្នកដំណើរ វីអាយភីមួយគ្រឿងទៀតដែលពាក់ផ្លាកលេខ ភ្នំពេញ 2AC 0590 ធ្វើដំណើរពីក្រោយស្របទិសគ្នាពីកើតមកលិច មកដល់ចំណុចកើតហេតុក៏អកស្សឺនឹងរថយន្តស្ទូចបម្រុងនឹងបត់ចូលបុរីក៏ជ្រុលទៅបុកពីក្រោយពេញទំហឹងបណ្តាលឲ្យផ្ទប់គាបជាប់មនុស្សប្រុសស្រី ៤ នាក់ត្រូវប្រជាពលរដ្ឋ និងសមត្ថ កិច្ចជួយគាស់យកចេញទៅសង្គ្រោះបន្ទាន់ភ្លាមៗ។
ប្រភពបន្ថែមពីសមត្ថកិច្ចបានបញ្ជាក់ថាក្នុងករណីគ្រោះថ្នាក់ចរាចរណ៍នេះមិនមានអ្នកបាត់បង់ជីវិតនោះទេគ្រាន់តែរងរបួសធ្ងន់និងស្រាល មនុស្ស៤ នាក់តែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងជំនាញចរាចរណ៍ចុះមកដល់ក៏ទំនាក់ទំនងទៅខាងជំនាញចរាចរណ៍ក្រុងឱ្យចុះមកធ្វើការវាស់វែងនិងធ្វើកំណត់ហេតុយករថយន្តទាំងពីរគ្រឿងទៅរក្សាទុកនៅស្នងការក្រុងរង់ចាំដំណោះស្រាយនៅពេលក្រោយ៕ ដោយ៖ សា មេត
