កំពត៖ កម្លាំងសមត្ថកិច្ចនៃស្នងការដ្ឋាននគរបាលខេត្តកំពត បានស្រាវជ្រាវរហូតឈានដល់ចាប់ខ្លួនបក្ខពួកខ្មាន់កាំភ្លើង២នាក់ ដែលបាញ់សន្ដិសុខក្រុមហ៊ុន សូ ងួន បណ្ដាលឲ្យស្លាប់ម្នាក់ និងរបួសធ្ងន់ម្នាក់ នៅថ្ងៃទី១៩ ខែវិច្ឆិកា ឆ្នាំ២០២០។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានថ្លែងថា បក្ខពួកខ្មាន់កាំភ្លើងដែលបាញ់សន្ដិសុខក្រុមហ៊ុន សូ ងួន បណ្ដាលឲ្យស្លាប់ និងរបួស ត្រូវបានកងកម្លាំងជំនាញស្រាវជ្រាវ ចាប់ខ្លួនបាន២នាក់ហើយ។ លោកបានបញ្ជាក់ថា ចំណែកមេខ្លោងជាជនដៃដល់ដែលមានកាំភ្លើង AK នៅក្នុងដៃ មិនទាន់ចាប់ខ្លួនបាននៅឡើយ ហើយនៅពេលនេះសមត្ថកិច្ចកំពុងឡោមព័ទ្ធនៅខាងក្រោមជើងភ្នំ ចម្ងាយ៥គីឡូពីកន្លែងកើតហេតុ។
ជនសង្ស័យ ឈ្មោះ ញ៉ាន សែង អាយុ២៣ឆ្នាំ រស់នៅភូមិព្រៃពាយ ឃុំត្រពាំងភ្លាំង ស្រុកឈូក និង ឈ្មោះ ស៊ីម ថែ អាយុ២១ឆ្នាំ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។ ចំណែកជនដៃដល់ធ្វើសកម្មភាពបាញ់ប្រហារនោះ គឺឈ្មោះ ស៊ូ ធា។
ជនសង្ស័យបានសារភាពប្រាប់សមត្ថកិច្ចថា ជនដៃដល់ដែលធ្វើសកម្មភាពបាញ់គឺឈ្មោះ ស៊ូ ធា បានប្រើប្រាស់កាំភ្លើង AK បាញ់ មកលើក្រុមសន្តិសុខក្រុមហ៊ុន សូ ងួន ដោយមានគ្នាប្រមាណជិត២០នាក់ ស្លាប់ម្នាក់ របួសម្នាក់។ ចំណែកបក្ខពួកផ្សេងៗ ទៀត បានប្រើប្រាស់អាវុធកែច្នៃ បាញ់មកលើក្រុមសន្តិសុខដែរ។
រីឯជនរងគ្រោះ ឈ្មោះ នួន ភ័ក្ត្រា អាយុ២៧ឆ្នាំ មានស្រុកកំណើតនៅខេត្តស្វាយរៀង រងរបួសត្រង់ក្រោមក្លៀក ស្លាប់នៅកន្លែងកើតហេតុ និង ឈ្មោះ ផន ដា អាយុ៣១ឆ្នាំ មានស្រុកសំពៅមាស ខេត្តពោធិ៍សាត់ (របួសធ្ងន់) បញ្ជូនទៅព្យាបាលនៅមន្ទីរពេទ្យភ្នំពេញ។
សូមរំលឹកថា ជម្លោះដីធ្លីរវាងប្រជាពលរដ្ឋ និងក្រុមហ៊ុនឧកញ៉ា សូ ងួន នៅឃុំត្រពាំងផ្លាំង ស្រុកឈូក ខេត្ដកំពត រហូតឈានដល់ការប៉ះទង្កិចគ្នាមួយប្រាវ រវាងពលរដ្ឋ និងសន្ដិសុខក្រុមហ៊ុន នៅវេលាម៉ោងប្រមាណ១០ព្រឹក ថ្ងៃទី១៨ ខែវិច្ឆិកា ឆ្នាំ២០២០នេះ។ ក្នុងការប៉ះទង្កិចគ្នានេះ ប្រជាពលរដ្ឋបានប្រើប្រាស់កាំភ្លើង ស្នប់កែច្នៃ បាញ់បណ្ដាលឲ្យសន្ដិសុខម្នាក់ស្លាប់នៅកន្លែងកើតហេតុ និងម្នាក់រងរបួសធ្ងន់ ហើយជនដៃដល់និងបក្ខពួកបានរត់គេចខ្លួនចូលព្រៃអស់៕
ដោយ៖បញ្ញាស័ក្តិ