មុននេះបន្តិច ទ្រី សុផានិត ដែលត្រូវជាបងស្រីបង្កើតអ្នកលក់ឡេអនឡាញដ៏ល្បីឈ្មោះនិងត្រូវជាម្ចាស់ហាងពេជ្រ ទ្រី ដាណា បានបង្ហោះវីដេអូឡាយលើកម្រាមដៃ១០សុំទោសទៅកាន់ប្អូនស្រីបង្កើតរបស់ខ្លួន និងសុំការយោគយល់អធ្យាស្រ័យលើកលែងទោសនូវកំហុសដែលខ្លួនធ្លាប់បានសាងកន្លងមកទៅកាន់ប្អូនស្រី។
ដូចដែលប្រិយមិត្តបានដឹងរួចហើយ ចំពោះរឿងរ៉ាវដ៏កក្រើកពេញបណ្តាញសង្គមកាលពីពេលកន្លងទៅ ទាក់ទងនឹងករណីអ្នកស្រី ទ្រី សុផានិត ត្រូវសមត្ថកិច្ចធ្វើការឃាត់ខ្លួនតាមដីការបង្គាប់ឲ្យនាំខ្លួនរបស់តុលាការពីបទ «បរិហារកេរ្តិ៍ជាសាធារណៈ ញុះញង់ឲ្យមានការរើសអើង និងអំពើនៃការប្រកួតប្រជែងមិនស្មោះត្រង់ ប្រព្រឹត្តទៅនៅរាជធានីភ្នំពេញ កាលពីឆ្នាំ២០១៨ រហូតដល់ឆ្នាំ២០២០» ដោយដើមបណ្តឹងត្រូវជាប្អូនស្រីបង្កើត គឺអ្នកស្រី ទ្រី ដាណា។ តែដោយសារមានបញ្ហាសុខភាពអ្នកស្រី ទ្រី សុផានិត ក៏បានដួលសន្លប់ពេលបញ្ជូនដល់តុលាការ ហើយក៏ត្រូវបានគេបញ្ជូនទៅសង្គ្រោះបន្ទាន់ភ្លាមៗ បង្កឲ្យមានការភ្ញាក់ផ្អើលពេញបណ្តាញសង្គមតែម្តង។
យ៉ាងណាក៏ដោយ ក្រោយពីសម្រាកព្យាបាលខ្លួននៅមន្ទីរពេទ្យមួយរយៈ សភាពជំងឺរបស់អ្នកស្រី ទ្រី សុផានិត ហាក់ធូរស្រាលបន្តិច ដោយអាចក្រោកអង្គុយនិយាយបាន ក៏បានចេញវីដេអូឡាយសុំទោសប្អូនស្រីជាសារធារណៈនាថ្ងៃទី២១ ខែវិច្ឆកា ឆ្នាំ២០២០នេះ ដោយលើកម្រាមដៃ១០សំពះសុំទោស និងបានរៀបរាប់ពីកំហុសខុសឆ្គងកន្លងមកដែលខ្លួនបានប្រព្រឹត្តិបណ្តាលឲ្យប៉ះពាល់កិត្តិយសនិងសេចក្តីថ្លៃថ្នូររបស់ប្អូនស្រី និងសុំការយោគយល់អធ្យាស្រ័យពីអ្នកស្រី ទ្រី ដាណា ទាំងទឹកភ្នែក។ ក្នុងវីដេអូនោះផងដែរ អ្នកស្រី ទ្រី សុផានិត ក៏បានរៀបរាប់ពីការនឹករលឹកកូនប្រុសដែលមានអាយុទើបជាង៣ខែ និងអំពាវនាវសូមឲ្យអ្នកលេងបណ្តាញសង្គមជួយshare វីដេអូនោះឲ្យដល់ប្អូនស្រីខ្លួនគឺ អ្នកស្រី ទ្រី ដាណា បានមើលផង ដើម្បីឲ្យប្អូនស្រីលើកលែងទោស ហើយខ្លួនអាចត្រឡប់ទៅមើលថែរកូនប្រុសជាទីស្រឡាញ់បាន។
គួរជម្រាបថា បើទោះបីជាស្ថានភាពសុខភាពអ្នកស្រី ទ្រី សុផានិត បច្ចុប្បន្នបានធូរស្រាលបន្តិចមែន តែក្រុមគ្រូពេទ្យនៅមិនទាន់អនុញ្ញាតឲ្យអ្នកស្រីចេញពីមន្ទីរពេទ្យនៅឡើយទេ ដោយនៅរង់ចាំតាមដានជាបន្តទៀត៕ ដោយ៖ កូលាប ក្រហម
